ନୂଆପଡ଼ା,୧୭ା୬ (ମକାରୁ ବେମାଲ) ନୂଆପଡା ସଦର ମହକୁମାସ୍ଥିତ ଜିଲା ପରିଷଦ କାର୍ଯ୍ୟାଳୟ ପରିସରରେ ଓରମାସ ଓ ଜିଲା ପ୍ରଶାସନଙ୍କ ମିଳିତ ଆନୁକୂଲ୍ୟରେ ଜିଲାସ୍ତରୀୟ ଆମ୍ବ ମେଳା ବା ଆମ ଗାଁ ଆମ୍ବ ପସରା ଶୁକ୍ରବାର ଉଦ୍ଯାପିତ ହୋଇଯାଇଛି। ୫ ଦିନ ଧରି ଚାଲିଥିବା ଆମ୍ବ ମେଳାରେ ଜିଲାରେ ଉଦପତ୍ାଦିତ ପ୍ରାୟ ସବୁପ୍ରକାର ଆମ୍ବ ତୋତାଫଳି, ଗୋପାଲ ଭୋଗ, ସୁବର୍ଣ୍ଣରେଖା, ବମ୍ବେଗ୍ରୀନ, ତୋତାପୁରୀ, ମଲ୍ଲିକା, ସୁନ୍ଦରୀ, ଲେଙ୍ଗଡା, ସେନ୍ଦରୀ, ବାଇଗଣପଲି, ଆମ୍ରପଲି ଆଦି ପ୍ରଜାତିର ଆମ୍ବ ଦେଖିବାକୁ ମିଳିଛି। ଜିଲାରେ ଆମ୍ବ ମେଳା ପ୍ରଥମ ହୋଇଥିବାରୁ ଦେଖିବା ପାଇଁ ଭିଡ ପରିଲକ୍ଷିତ ହେଉଛି। ହେଲେ ଏହି ମେଳାରେ ୨.୭୫ ଲକ୍ଷ ଟଙ୍କିଆ ଆମ୍ବ ଦେଖିବାକୁ ଲୋକେ ଅଧିକ ଉତ୍ସାହିତ ହେଉଛନ୍ତି। ପଡୋଶୀ ବରବଡ ଜିଲା ପାଇକମାଲ ବ୍ଲକ ମାଣ୍ଡୋସିଲ ପଞ୍ଚାୟତ ଡୁମେରବାହାଲ ଗାଁର ଚନ୍ଦ୍ରବାବୁ ରାଓ ନିଜ ବଗିଚାରେ ଏହି ଆମ୍ବ ଚାଷ କରିଛନ୍ତି। ଯାହାର ବଜାର ମୂଲ୍ୟ କିଲୋ ପ୍ରତି ୨.୭୫ ଲକ୍ଷ ଟଙ୍କା ରହିଛି। ସେହିଠାରୁ ଗୋଟିଏ ଆଣି ଆମ୍ବମେଳାରେ ପ୍ରଦର୍ଶିତ କରାଯାଇଛି। ଯାହାର ନାମ ମିୟାଜାକି ଆମ୍ବ ବୋଲି କୁହାଯାଉଛି। ଏହି ଆମ୍ବ ପ୍ରଥମେ ଜାପାନର ମିୟାଜାକି ସହରରେ ଉତ୍ପଦାନ ହୋଇଥିବାରୁ ତାହାର ଏପରି ନାମକରଣ ହୋଇଛି। ଏହି ଆମ୍ବ ଜାପାନର ମିୟାଜାକି ସହରର ମୂଲ୍ୟ ଅନୁସାରେ ଏହାର ଦାମ ରଖାଯାଇଛି ବୋଲି ରାଓ କହିଛନ୍ତି। ରାଓଙ୍କ କହିବା ମୁତାବକ ଏହି ଆମ୍ବରେ ଭିଟାମିନ ଏ, ଭିଟାମିନ ସି, ଆଣ୍ଟି ଅକ୍ସିଡାଣ୍ଡ ପ୍ରଚୁର ମାତ୍ରାରେ ରହିଛି। ଖାଇବା ମାତ୍ରେ ପାଟିରେ ଜେଲି ପରି ମିଳାଇ ଯାଉଛି। ଏହି ଆମ୍ବ ଚାରା ରୋପଣର ୩ ବର୍ଷ ପରେ ଫଳ ଆସୁଥିବା ବେଳେ ଗୋଟିଏ ଗଛରେ୧୦ ରୁ ୧୫ଟି ଆମ୍ବ ଫଳିଥାଏ। ବର୍ତ୍ତମାନ ପର୍ଯ୍ୟନ୍ତ ସେ ନିଜେ ଆମ୍ବରେ ଥିବା ପୋଷକ ତତ୍ତ୍ୱ ସମ୍ପର୍କରେ କୌଣସି କ୍ଲିନିକାଲ ପରୀକ୍ଷା କରି ନାହାନ୍ତି କି କୌଣସି ବଜାରୀକରଣ କରିନାହାନ୍ତି। ଜିଲାସ୍ତରୀୟ ଆମ୍ବମେଳା ଦ୍ୱାରା ବହୁ ଚାଷୀ ଆମ୍ବ ବିକ୍ରୟ କରି ଲାଭବାନ ହୋଇଥିବା ବେଳେ ଦେଖିବାକୁ ଆସିଥିବା ଦର୍ଶକ ମଧ୍ୟ ବିଭିନ୍ନ ପ୍ରଜାତିର ଆମ୍ବ ସୁଲଭ ମୂଲ୍ୟ କିଣି ବେଶ ଖୁସି ହୋଇଛନ୍ତି। ଏହିପରି ଆମ୍ବମେଳା ପ୍ରତିବର୍ଷ କରାଗଲେ ଅଞ୍ଚଳର ଆମ୍ବ ଚାଷୀ ଅଧିକ ଉପକୃତ ହୁଅନ୍ତେ ବୋଲି ବୃଦ୍ଧିଜୀବୀ ମହଲରେ ଚର୍ଚ୍ଚା ହେଉଛି।
