ଢେଙ୍କାନାଳ ଅଫିସ, ୩୦।୩: ପୁଣି କାର୍ଯ୍ୟକ୍ଷମ ହେବ ପରିତ୍ୟକ୍ତ ‘ମ୍ୟାଙ୍ଗୋ ହବ୍’। ଚାଷୀଙ୍କୁ ଆଉ ଶାଗମାଛ ଦରରେ ବିକ୍ରି କରିବାକୁ ପଡ଼ିବନି ଆମ୍ବ। ସେମାନଙ୍କୁ ମିଳିବ ଉତ୍ପାଦିତ ଫସଲର ଉଚିତ ମୂଲ୍ୟ। ଢେଙ୍କାନାଳର ପ୍ରସିଦ୍ଧ ଦଶେରୀ ଏବଂ ଆମ୍ରପାଲି ପ୍ରଜାତିର ଆମ୍ବ ସୁବିଧାରେ ପହଞ୍ଚତ୍ବ ଜାତୀୟ ଓ ଅନ୍ତର୍ଜାତୀୟ ବଜାରରେ। ଏଥିଲାଗି ଜିଲା ପ୍ରଶାସନ ପକ୍ଷରୁ ଆରମ୍ଭ ହୋଇଛି ଉଦ୍ୟମ।
ଢେଙ୍କାନାଳର ଜଳବାୟୁ ଆମ୍ବଚାଷ ପାଇଁ ଉପଯୋଗୀ ସାବ୍ୟସ୍ତ ହୋଇଛି। ପ୍ରତିବର୍ଷ ଜିଲାରୁ ପ୍ରଚୁର ଆମ୍ବ ଉତ୍ପାଦନ ହେଉଥିବାବେଳେ ଦିଲ୍ଲୀ, କୋଲକାତା, ଝାଡ଼ଖଣ୍ଡ, ପଡ଼ୋଶୀ ବାଂଲାଦେଶ ବଜାରରେ ଏହାର ଚାହିଦା କାହିଁରେ କେତେ। ଆମ୍ବକୁ ସୁବିଧାରେ ବଜାରରେ ପହଞ୍ଚାଇବାକୁ ସଦର ବ୍ଲକ ଗୋବିନ୍ଦପୁରସ୍ଥିତ ୫୫ନଂ. ଜାତୀୟ ରାଜପଥ ପାର୍ଶ୍ୱରେ ୨୦୧୩ ଜୁନ୍ ୨୭ରେ ପଡ଼ିଥିଲା ‘ମ୍ୟାଙ୍ଗୋ ହବ୍’ର ଭିତ୍ତିପ୍ରସ୍ତର। ୧୧ କୋଟି ଟଙ୍କା (ରାଜ୍ୟ ସରକାରଙ୍କ ୧୦ କୋଟି ଏବଂ ଚାଷୀଙ୍କ ୧ କୋଟି) ବ୍ୟୟରେ ପ୍ରସ୍ତାବିତ ଏହି ବହୁମୁଖୀ ଋତୁଭିତ୍ତିକ ଫଳ ବ୍ୟବସାୟ କେନ୍ଦ୍ରର ଶିଳାନ୍ୟାସ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ରାଜ୍ୟ ସରକାରଙ୍କ ଉଦ୍ୟାନ କୃଷି ବିଭାଗ ଏବଂ ଜିଲାର ଆମ୍ବ, ଫଳ ଓ ପରିବା ଚାଷୀଙ୍କ ମିଳିତ ସହଯୋଗରେ ପିପିପି ମୋଡ୍ରେ ଆରମ୍ଭ ହୋଇଥିବା ଏହି ‘ମ୍ୟାଙ୍ଗୋ ହବ୍’ ୨୦୧୪ରେ କାର୍ଯ୍ୟକ୍ଷମ ହୋଇଥିଲା। ତେବେ ପରିଚାଳନା ଅଭାବରୁ ମାତ୍ର କିଛିବର୍ଷ କାର୍ଯ୍ୟ କରିବା ପରେ ତାହା ପରିତ୍ୟକ୍ତ ହୋଇପଡ଼ିଛି। ଏହାର ପୁନରୁଦ୍ଧାର ଦିଗରେ ଉଦ୍ୟାନ କୃଷି ବିଭାଗ ତତ୍ପରତା ଦେଖାଉନାହିଁ। ତେଣୁ ଚାଷୀ ନିଜ ସୁବିଧାରେ ଆମ୍ବ ବିକ୍ରି କରୁଛନ୍ତି। ୨୦୨୦ରେ ‘ମ୍ୟାଙ୍ଗୋ ହବ୍’କୁ ନିୟନ୍ତ୍ରିତ ବଜାର କମିଟିକୁ ହସ୍ତାନ୍ତର କରିବାକୁ ପ୍ରସ୍ତାବ ଦେଇଥିଲା ଉଦ୍ୟାନ କୃଷି ବିଭାଗ। ତେବେ କୋଭିଡ୍ ମହାମାରୀ ଯୋଗୁ ଏହାର ଭାଗ୍ୟ ପୁଣି ଅନିଶ୍ଚିତତା ଭିତରକୁ ଠେଲି ହୋଇଯାଇଥିଲା। କରୋନା ସମୟରେ ଆମ୍ବଚାଷୀ ବ୍ୟାପକ କ୍ଷତି ସହିଥିବାବେଳେ ‘ମ୍ୟାଙ୍ଗୋ ହବ୍’ ପୁନରୁଦ୍ଧାର ସେମାନଙ୍କ ମଧ୍ୟରେ ନୂତନ ଆଶା ସଞ୍ଚାର କରିଛି। ଏ ନେଇ ଜିଲାପାଳ ସରୋଜ କୁମାର ସେଠୀ କୁହନ୍ତି, ‘ମ୍ୟାଙ୍ଗୋ ହବ୍’ କାର୍ଯ୍ୟକ୍ଷମ କରିବା ଲାଗି ଉଦ୍ୟମ ଆରମ୍ଭ ହୋଇଛି। ଏ ଦିଗରେ ପ୍ରଶାସନ ପକ୍ଷରୁ ତ୍ୱରିତ ପଦକ୍ଷେପ ନିଆଯାଉଛି।
ସୂଚନାଯୋଗ୍ୟ, ଜିଲାରୁ ୨୦୧୯ରେ ୪୩,୨୦୦ ମେଟ୍ରିକ୍ ଟନ୍ ଆମ୍ବ ଉତ୍ପାଦନ ହୋଇଥିଲା। ତେବେ କରୋନା ମହାମାରୀ ଯୋଗୁ ଏହା ଆଶାତୀତ ଭାବେ ହ୍ରାସ ପାଇଛି। ୨୦୨୦ରେ ମାତ୍ର ୧୫, ୨୪୦ ମେଟ୍ରିକ ଟନ୍ ଆମ୍ବ ଉତ୍ପାଦନ ହୋଇଥିବା ବିଭାଗ ପକ୍ଷରୁ ଜଣାପଡ଼ିଛି।
