ନିରାକାରପୁର,୧୫ା୫(ଡି.ଏନ୍.ଏ.): ଖୋର୍ଦ୍ଧା ଜିଲା ଟାଙ୍ଗୀ ବ୍ଲକରେ ୮ହଜାର ୯୬୩ ହେକ୍ଟର ଚାଷଜମି ରହିଥିବା ବେଳେ ୭ ହଜାର ୫୦୦ ହେକ୍ଟର ଚାଷ ଜମି ଚାଷ ଉପେଯାଗୀ ରହିଛି। ଉକ୍ତ ବ୍ଲକରେ ପ୍ରାୟ ୬୦ ପ୍ରତିଶତ ଲୋକ ଚାଷ ଉପରେ ନିର୍ଭର କରିଥାନ୍ତି। ତେବେ ଏଠାରେ ଧାନ ଚାଷ ପରେ ନଦୀ ନିକଟବର୍ତ୍ତି ଅଞ୍ଚଳବାସୀ ପନିପରିବା, ବାଦାମ ଓ ମୁଗ ଚାଷ କରିଥାନ୍ତି। ଏହି ଚାଷ ପ୍ରାୟ ୨୫ ଭାଗ ଜମିରେ ହେଉଥିବା ବେଳେ ଏବେ ଜଳସେଚନ ସୁବିଧା ନ ଥିବାରୁ ଜମିଗୁଡିକ ପଡିଆ ପଡିଥିବା ଦେଖିବାକୁ ମିଳିଛି। ଚାଷୀମାନଙ୍କ ସ୍ବାର୍ଥକୁ ଦୃଷ୍ଟିରେ ରଖି ସରକାର ୧୯୮୧ ଡିସେମ୍ବର ୨୧ରେ ରାମେଶ୍ୱର ସ୍ଥିତ ମନ୍ଦାକିନୀ ନଦୀ ଉପରେ ଏକ ବ୍ୟାରେଜ ନିର୍ମାଣ କରିଥିଲେ।
ଏହି ବ୍ୟାରେଜରୁ ବିଲକୁ କିଭଳି ପାଣି ଭଲରେ ଯାଇପାରିବ ସେଥିପାଇଁ କେନାଲ କରାଯାଇଥିଲା। ଯାହାଦ୍ୱାରା ରାମେଶ୍ୱର, ନିରାକାରପୁର, ଡିଆ, ଲେଣ୍ଡୋ, ନୂଆଗଡ ପଞ୍ଚାୟତର ଚାଷୀମାନେ ଉପକୃତ ହୋଇପାରିବେ। ତେବେ ସବୁ ସୁବିଧା କରାଯାଇଥିବା ସତ୍ତ୍ୱେ ବିଲକୁ ପାଣି ଯାଇପାରୁନାହିଁ। ଏହି ବ୍ୟାରେଜ ଥାଇ ମଧ୍ୟ ଚାଷୀଙ୍କ କାର୍ଯ୍ୟରେ ଆସିପାରୁନାହିଁ। ଫଳରେ ନଦୀ ଏବଂ କେନାଲ ପାର୍ଶ୍ୱରେ ଥିବା ଜମିଗୁଡିକ ପଡିଆ ପଡିରହିଛି ା
ଚାଷୀ ଡମ୍ବୁରଧର ପରିଡା କୁହନ୍ତି, ୨୦ ମାଣ ଚାଷଜମି ରହଥିବା ବେଳେ ପ୍ରାୟ ଜମି କେନାଲ ପାଖରେ ରହିଛି। ପାଣି ନ ଆସିବାରୁ ବହୁ ଜମି ପଡିଆ ପଡୁଛି। ଅଧିକ ଟଙ୍କା ଖର୍ଚ୍ଚ କରି କେବଳ ଧାନ ଫସଲ କରୁଛି। ପ୍ରଶାସନ ପକ୍ଷରୁ କେହି ଦେଖିବାକୁ ନ ଆସିବାରୁ ବର୍ଷ ବର୍ଷ ଧରି କେନାଲ ସଫା ହେଉନି। ଚେକଡ୍ୟାମ ଗୁଡିକ ମଧ୍ୟ ମରାମତି ହେଉନାହିଁ। ତୁରନ୍ତ ଏଥିପ୍ରତି ପ୍ରଶାସନ ଦୃଷ୍ଟି ଦେବାକୁ ସେ ଦାବି କରିଛନ୍ତି। ସେହିପରି ଚାଷୀ ରବୀନ୍ଦ୍ର କୁମାର ମାଝି କୁହନ୍ତି, ପାଣି ଠିକ୍ ସମୟରେ ନ ଆସିବାରୁ ଚାଷ ପ୍ରତି ଆଗ୍ରହ କମିଯାଉଛି। ସରକାର ଏଥିପ୍ରତି ଦୃଷ୍ଟି ଦେବା ଜରୁରୀ ହୋଇପଡ଼ିଛି। ଠିକ୍ ସମୟରେ ପାଣି ଯୋଗାଇ ଦେବାକୁ ସେ ଅନୁରୋଧ କରିଛନ୍ତି।
