ନୂଆଦିଲ୍ଲୀ,୨୯ା୩(ପି.ଟି.):ବିଭିନ୍ନ ରାଜ୍ୟରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍) ମଜୁରିକୁ ୪ରୁ ୧୦ ପ୍ରତିଶତ ବୃଦ୍ଧି କରାଯାଇଛି। ଏହି ଯୋଜନାରେ ଓଡ଼ିଶାରେ ଅଣକୁଶଳୀ ଶ୍ରମିକମାନଙ୍କ ମଜୁରି ୨୩୭ ଟଙ୍କାରୁ ୨୫୪ ଟଙ୍କାକୁ ବଢ଼ିଛି, ଅର୍ଥାତ୍ ୭.୨ ପ୍ରତିଶତ ବୃଦ୍ଧି ହୋଇଛି। ହରିୟାଣାରେ ଅଣକୁଶଳୀ ଶ୍ରମିକଙ୍କ ଦୈନିକ ମଜୁରି ସର୍ବାଧିକ ୩୭୪ ଟଙ୍କା ହୋଇଥିବାବେଳେ ନାଗାଲାଣ୍ଡରେ ସର୍ବନିମ୍ନ ୨୩୪ ଟଙ୍କା ରହିଥିବା କେନ୍ଦ୍ର ଗ୍ରାମାଞ୍ଚଳ ବିକାଶ ମନ୍ତ୍ରଣାଳୟ ପକ୍ଷରୁ ପ୍ରକାଶିତ ବିଜ୍ଞପ୍ତିରୁ ଜଣାପଡ଼ିଛି। ଲୋକ ସଭା ନିର୍ବାଚନ ଲାଗି ଦେଶରେ ଆଦର୍ଶ ଆଚରଣ ବିଧି ଲାଗୁ ହୋଇଥିବାରୁ ନିର୍ବାଚନ କମିଶନଙ୍କ ଅନୁମତି ପରେ ବୁଧବାର ମନ୍ତ୍ରଣାଳୟ ବିଜ୍ଞପ୍ତି ଜାରି କରିଥିଲା। ଗ୍ରାମାଞ୍ଚଳର ପରିବାରଗୁଡ଼ିକର ଜୀବିକା ସୁରକ୍ଷା ବଢ଼ାଇବା ଲକ୍ଷ୍ୟରେ ଅଣକୁଶଳୀ କାର୍ଯ୍ୟ କରିବାକୁ ଆଗ୍ରହୀ ପ୍ରତି ପରିବାରର ସାବାଳକ ସଦସ୍ୟଙ୍କୁ ବର୍ଷକୁ ୧୦୦ ଦିନ କାମ ଯୋଗାଇବା ଏମ୍ଜିଏନ୍ଆର୍ଇଜିଏସ୍ର ଲକ୍ଷ୍ୟ। ଗତବର୍ଷର ମଜୁରି ହାର ଉପରେ ଏହି ବୃଦ୍ଧି କରାଯାଇଛି। ବିଜ୍ଞପ୍ତି ଅନୁଯାୟୀ ଗୋଆରେ ମଜୁରି ସର୍ବାଧିକ ୩୪ ଟଙ୍କା (୧୦.୬%) ବଢ଼ି ୩୫୬ ଟଙ୍କା ହୋଇଥିବାବେଳେ ଆନ୍ଧ୍ରପ୍ରଦେଶରେ ୨୮ ଟଙ୍କା ବୃଦ୍ଧି ପାଇ ଦୈନିକ ମଜୁରି ୩୦୦ ଟଙ୍କା ହୋଇଛି। ଉତ୍ତରପ୍ରଦେଶ ଏବଂ ଉତ୍ତରାଖଣ୍ଡରେ ମଜୁରି ସର୍ବନିମ୍ନ ୭ ଟଙ୍କା ବଢ଼ି ୨୩୭ ଟଙ୍କା ହୋଇଛି। ପଶ୍ଚିମବଙ୍ଗରେ ମଜୁରି ୧୩ ଟଙ୍କା ବଢ଼ି ୨୫୦ ଟଙ୍କା ହୋଇଥିବାବେଳେ ତାମିଲନାଡୁରେ ୨୫ ଟଙ୍କା ବଢ଼ି ୩୧୯ ଟଙ୍କା ଏବଂ ତେଲଙ୍ଗାନାରେ ୨୮ ଟଙ୍କା ବଢ଼ି ୩୦୦ ଟଙ୍କା ହୋଇଛି।
