ସମ୍ବଲପୁର,୨୩ା୭(ପ୍ରମୋଦ ବହିଦାର):ସମ୍ବଲପୁର ଜିଲା ମହୁଲପାଲି ଥାନା ଅଞ୍ଚଳରେ ୨୦୧୮ ମସିହାରେ ସଂଘଟିତ ଶିଶୁକନ୍ୟା ବଳାତ୍କାର ମାମଲାର ରାୟ ମଙ୍ଗଳବାର ପ୍ରକାଶ ପାଇଛି। ସମ୍ବଲପୁର ଅତିରିକ୍ତ ଜିଲା ଜଜ୍ ତଥା ପୋକ୍ସୋ ଅଦାଲତ ସ୍ବତନ୍ତ୍ର ବିଚାରପତି ଅଭିଳାଷ ସେନାପତି ଏହି ମାମଲାରେ ରାୟ ଦେଇ ଅଭିଯୁକ୍ତ ମହୁଲପାଲି ଥାନା ବିଲେଇଗଡ଼ ଗ୍ରାମର ଟେକଚାନ୍ଦ ରୋହିଦାସ(୩୩)ଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ମୋଟ ୧୭ ଜଣ ସାକ୍ଷୀ ଓ ଅନ୍ୟାନ୍ୟ ତଥ୍ୟ ପ୍ରମାଣ ଆଧାରରେ ବିଚାରପତି ସେନାପତି ଅଭିଯୁକ୍ତ ଟେକଚାନ୍ଦଙ୍କୁ ୧୫ ବର୍ଷ ସଶ୍ରମ କାରାଦଣ୍ଡ ଓ ୫୦ ହଜାର ଟଙ୍କା ଜରିମାନାଦେଶ କରିଛନ୍ତି। ଜରିମାନା ଅର୍ଥ ଅନାଦାୟ ଅଭିଯୁକ୍ତ ଅଧିକ ୧ ବର୍ଷ ସଶ୍ରମ କାରାଦଣ୍ଡ ଭୋଗିବାକୁ ପଡିବ ବୋଲି ନିର୍ଦ୍ଦେଶ ଦେଇଛନ୍ତି। ଏହାସହ ବିଚାରପତି ପୀଡ଼ିତଙ୍କୁ କ୍ଷତିପୂରଣ ସହାୟତା ବାବଦକୁ ୭ଲକ୍ଷ ଟଙ୍କା ପ୍ରଦାନ କରିବାକୁ ଜିଲା ଆାଇନ୍ ସେବା ପ୍ରାଧିକରଣ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି।
ସୂଚନା ଅନୁସାରେ ୨୦୧୮ ସେପ୍ଟେମ୍ବର ୧୩ ସନ୍ଧ୍ୟାରେ ବିଲେଇଗଡ଼ ଗ୍ରାମର ଟେକଚାନ୍ଦ ତାଙ୍କ ପଡ଼ୋଶୀଙ୍କ ୭ ବର୍ଷୀୟା ଶିଶୁକନ୍ୟାଙ୍କୁ ଗଣେଶ ପୂଜା ଦେଖାଇବା ବାହାନାରେ ଘରୁ ଡାକି ନେଇଥିଲେ। ଝିଅକୁ ସାଇକେଲ୍ରେ ବସାଇ କିଛିବାଟ ଗଲା ପରେ ନଦୀକୂଳକୁ ନେଇ ବଳାତ୍କାର କରିଥିଲେ। ପାଟି ଶୁଣି ନଦୀକୁ ଶୌଚ ପାଇଁ ଯାଇଥିବା ପୀଡ଼ିତାଙ୍କ କାକି ଘଟଣାସ୍ଥଳରେ ପହଞ୍ଚତ୍ ଯିବାରେ ଟେକଚାନ୍ଦ ସେଠାରୁ ପଳାଇ ଯାଇଥିଲେ। ପୀଡ଼ିତାଙ୍କ ମାତାପିତା ୧୪ତାରିଖ ମହୁଲପାଲି ଥାନାରେ ଏ ନେଇ ଏତଲା ଦେଇଥିଲେ। ଏତଲା ଆଧାରରେ ଥାନରେ ଏକ ବଳାତ୍କାର ମାମଲା(ନଂ.୧୩୦/୧୮)ରୁଜୁ କରି ପୋଲିସ ଟେକଚାନ୍ଦଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଚାର୍ଜଶିଟ୍ ଦାଖଲ ପରେ ପୋକ୍ସୋ ଅଦାଲତରେ ମାମଲାର ଶୁଣାଣି ଆରମ୍ଭ ହୋଇ ମଙ୍ଗଳବାର ଏହାର ଚୂଡ଼ାନ୍ତ ରାୟ ପ୍ରକାଶ ପାଇଥିଲା। ଅଦାଲତରେ ସରକାରଙ୍କ ପକ୍ଷରୁ ଏହି ମାମଲାକୁ ସ୍ବତନ୍ତ୍ର ସରକାରୀ ଓକିଲ ସନ୍ତୋଷ କୁମାର ପଣ୍ଡା ପରିଚାଳନା କରିଥିଲେ।
