ବ୍ରିଟେନରେ ରହୁଥିବା ଜଣେ ୮୧ ବର୍ଷୀୟା ମହିଳା ଆଇରିସ ଜୋନ୍ସ ତାଙ୍କ ଛାଡ଼ପତ୍ରକୁ ୪୦ ବର୍ଷ ପୂରିଥିଲେ ସୁଦ୍ଧା ଜଣେ ୩୬ ବର୍ଷୀୟ ଯୁବକ ତଥା ତାଙ୍କ ପୁଙ୍କଠାରୁ ବୟସରେ ସାନ ମହମ୍ମଦ ଅହମ୍ମଦ ଇବ୍ରାହିମଙ୍କ ପ୍ରେମରେ ପଡ଼ିଥିଲେ। ପରେ ତାଙ୍କୁ ବିବାହ କରିଛନ୍ତି। ଏହି ଘଟଣାଙ୍କୁ ଆଇରିସଙ୍କ ପୁଅ ପସନ୍ଦ କରୁ ନଥିଲେ ହେଁ ପରେ ସେମାନେ ମଧ୍ୟ ବୁଝିଛନ୍ତି।
କିଛି ଦିନ ପୂର୍ବେ ଉଭୟ ଫେସ୍ବୁକ୍ରେ କଥା ହେବା ଆରମ୍ଭ କରିଥିଲେ। ଉଭୟଙ୍କ ମଧ୍ୟରେ ୪୫ ବର୍ଷର ବ୍ୟବଧାନ ଥାଇ ମଧ୍ୟ ସେମାନେ ବିବାହ କରିଛନ୍ତି। ବର୍ତ୍ତମାନ ଇଜିପ୍ଟରେ ରହୁଥିବା ମହମ୍ମଦ ଭିଜା ସମସ୍ୟା କାରଣରୁ ଜୋନ୍ସଙ୍କଠାରୁ ଦୂରରେ ଅଛନ୍ତି।
ମହମ୍ମଦଙ୍କୁ ଏଯାଏ ଭିଜା ମିଳିପାରି ନାହିଁ। ଏହି କାରଣରୁ ଉଭୟ ସ୍ତ୍ରୀ-ସ୍ବାମୀ ଅଲଗା ରହୁଥିଲେ ହେଁ ସୋସିଆଲ ମିଡିଆ ସାହାଯ୍ୟରେ ସ୍ତ୍ରୀଙ୍କ ପ୍ରତି ନିଜର ପ୍ରେମ ବ୍ୟକ୍ତ କରିଛନ୍ତି ମହମ୍ମଦ। ନିକଟରେ ସେ ଫେସ୍ବୁକରେ ଆଇରିସ ପାଇଁ ଏକ ପୋଷ୍ଟ ଲେଖିଥିଲେ- ‘ ଜୀବନର ଶେଷ ପର୍ଯ୍ୟନ୍ତ ମୋର ପ୍ରେମ ତୁମ ପାଇଁ ରହିବ। ମୋର ରାଣୀ ଆଇରିସ।
ଆଇରିସ କହିଛନ୍ତି ଯେ, ମୁଁ ଅହମ୍ମଦଙ୍କୁ ବହୁତ ମନେ ପକାଉଛି। ମୁଁ ତିନିଥର ଇଜିପ୍ଟ ଗଲି ମାତ୍ର ମୋତେ ମହମ୍ମଦଙ୍କ ବିନା ଫେରିବାକୁ ପଡିଲା। ମୁଁ ବାରମ୍ବାର ମିଶରକୁ ଯାଇପାରିବି ନାହିଁ । ସେହି ଦେଶ ମୋ ପାଇଁ ଅନୁକୂଳ ନୁହେଁ। ସେଠାରେ ବହୁତ ଉତ୍ତାପ, ଧୂଳି ଏବଂ ଟ୍ରାଫିକ ସମସ୍ୟା ରହିଛି। ମୁଁ ସେଠାକାର ଖାଦ୍ୟକୁ ମଧ୍ୟ ପସନ୍ଦ କରେ ନାହିଁ। ତେବେ ଆଇରିସଙ୍କ ଏହି ସମ୍ପର୍କକୁ ଦୁଇ ପୁଅ ପସନ୍ଦ କରୁ ନଥିଲେ। ଯଦିଓ ପରେ ଏହା ସ୍ବଭାବିକ ହୋଇଛି। ତାଙ୍କ ଦୁଇ ପୁଅଙ୍କ ବୟସ ୫୦ ବର୍ଷରୁ ଅଧିକ। ଆଇରିସ କହିଛନ୍ତି, ମୋ ପୁଅ ବର୍ତ୍ତମାନ ବୁଝି ସାରିଛନ୍ତି ଯେ, ଏହି ସମ୍ପର୍କରେ ସଚ୍ଚୋଟତା ଅଛି ଏବଂ ଆମେ ପରସ୍ପରକୁ ପସନ୍ଦ କରୁ। ଉଭୟ ମିଶରରେ ପାରମ୍ପରିକ ପରିବର୍ତ୍ତେ କେବଳ କାଗଜପତ୍ରରେ ବିବାହ କରିଥିଲେ। ପରେ ଉତ୍ସବ ପାଳନ କରିବାକୁ ହୋଟେଲ୍ ଯାଇଥିଲେ।
ଆଇରିସ କହିଛନ୍ତି, ‘ମୁଁ ଭାବି ନଥିଲି ଯେ ମୋ ବୟସରେ ଏହା ଘଟିବ ଯେ ମୁଁ ଜଣେ ଯୁବକଙ୍କ ପ୍ରେମରେ ପଡ଼ିବି। ମୁଁ ୪୦ ବର୍ଷ ପୂର୍ବେ ଛାଡପତ୍ର ହୋଇଥିଲି ଏବଂ ମୁଁ ବହୁତ ଖୁସି ଯେ ଏହି ବୟସରେ ମଧ୍ୟ ମୁଁ ଜଣେ ରୋମାଣ୍ଟିକ ପାର୍ଟନର ପାଇଛି।
ସୂଚନାଯୋଗ୍ୟ, ଆଇରିସ ସରକାରଙ୍କଠାରୁ ପେନ୍ସନ ପାଆନ୍ତି। ଅନେକ ଲୋକ ଏହି ଦମ୍ପତିଙ୍କୁ ଟ୍ରୋଲ କରୁଛନ୍ତି। ଏବଂ କହୁଛନ୍ତି ମହମ୍ମଦ ଜଣେ ୮୧ ବର୍ଷ ବୟସ୍କା ମହିଳାଙ୍କୁ କେବଳ ବ୍ରିଟେନର ଭିସା ପାଇବା ପାଇଁ ଡେଟ କରୁଛନ୍ତି।
