ଭୁବନେଶ୍ୱର,୭।୬(ବ୍ୟୁରୋ): ଭୁଲିଗଲେ ସମ୍ପର୍କ। ସ୍ତ୍ରୀଙ୍କ ଅଶ୍ଳୀଳ ଭିଡିିଓ ଭାଇରାଲ କରିବା ଅଭିଯୋଗରେ ବନ୍ଧା ହେଲେ ସ୍ବାମୀ। ଏଭଳି ଏକ ଘଟଣାରେ କମିଶନରେଟ ପୋଲିସର ଭୁବନେଶ୍ୱରସ୍ଥିତ ସାଇବର କ୍ରାଇମ ଓ ଅର୍ଥନୈତିକ ଅପରାଧ ଥାନା ଅଭିଯୁକ୍ତ ସ୍ବାମୀଙ୍କୁ ଗିରଫ କରିଛି। ସେ ହେଲେ ଭଦ୍ରକ ଜିଲା ଚାନ୍ଦବାଲି ଥାନା ଅଧୀନ ବାଉଁଶଡ଼ା ଗ୍ରାମର ସରୋଜ କୁମାର ଦାସ। ପୋଲିସ ତାଙ୍କୁ ମଙ୍ଗଳବାର କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ସୂଚନାନୁଯାୟୀ, ୨୦୧୮ରେ ସରୋଜ ବିବାହ କରିଥିଲେ। ଏହାପରେ ସ୍ତ୍ରୀଙ୍କୁ ନେଇ ତାମିଲନାଡ଼ୁରେ ରହୁଥିଲେ। ସରୋଜ ସେଠାରେ ପାଣି ପାଇପ ମିସ୍ତ୍ରି ଭାବେ କାମ କରୁଥିଲେ। ହେଲେ ରୋଜଗାର ଟଙ୍କାରେ ମଦ୍ୟପାନ କରିବା ସହ ସ୍ତ୍ରୀଙ୍କୁ ମାଡ଼ ମାରୁଥିଲେ। ଏଥିସହ ବିବାହ ପୂର୍ବରୁ ସ୍ତ୍ରୀ ରଖିଥିବା ସମସ୍ତ ସଞ୍ଚୟ ଟଙ୍କାକୁ ଖର୍ଚ୍ଚ କରି ଦେଇଥିଲେ। ଏପରିକି ତାଙ୍କ ଆକାଉଣ୍ଟରେ ଏକ ୨ଲକ୍ଷ ଟଙ୍କାର ଲୋନ୍ ମଧ୍ୟ କରିଦେଇଥିଲେ। ୨୦୨୦ରେ ଲକ୍ଡାଉନ ହେବା ପରେ ସ୍ତ୍ରୀ ଭୁବନେଶ୍ୱର ଚାଲିଆସିଥିଲେ। ଏଠାରେ ସେବେଠାରୁ କ୍ୟାପିଟାଲ ଥାନା ଅଞ୍ଚଳରେ ଘରୋଇ ସହାୟକ ଭାବେ କାମ କରୁଛନ୍ତି। ସ୍ବାମୀ ସରୋଜ ଟଙ୍କା ମାଗିଲେ ସେ ମନା କରନ୍ତି। ଗତ ଫେବୃୟାରୀରେ ସରୋଜ ଟଙ୍କା ଦେବାକୁ ବାଧ୍ୟ କରିଥିଲେ। ହେଲେ ସ୍ତ୍ରୀ ଟଙ୍କା ନ ଦେବାରୁ ପୂର୍ବରୁ ରଖିଥିବା ଅନ୍ତରଙ୍ଗ ମୁହୁର୍ତ୍ତର ଭିଡିଓକୁ ଭାଇରାଲ କରିଦେବାକୁ ଧମକ ଦେଇଥିଲେ। ବହୁ ବାଧ୍ୟ କରିବା ପରେ ଟଙ୍କା ନ ପାଇବାରୁ ସରୋଜ ସ୍ତ୍ରୀଙ୍କ ୧୦ରୁ ଅଧିକ ସମ୍ପର୍କୀୟଙ୍କ ଫେସବୁକ୍ ମେସେଞ୍ଜରରେ ଅଶ୍ଳୀଳ ଭିଡିଓ ପଠାଇ ଦେଇଥିଲେ। ସମ୍ପର୍କୀୟମାନେ ଏନେଇ ତାଙ୍କ ସ୍ତ୍ରୀଙ୍କୁ ଜଣାଇବାରୁ ସେ ସାଇବର କ୍ରାଇମ ଓ ଅର୍ଥନୈତିକ ଅପରାଧ ଥାନାରେ ସରୋଜଙ୍କ ନାଁରେ ଅଭିଯୋଗ କରିଥିଲେ। ଏନେଇ ପୋଲିସ ଫେବୃୟାରୀ ୭ରେ ଏକ ମାମଲା (ନଂ. ୩/୨୦୨୨) ରୁଜୁ କରି ତଦନ୍ତ ଆରମ୍ଭ କରିଥିଲା। ସ୍ବାମୀ ସରୋଜ ତାମିଲନାଡ଼ୁରୁ ଫେରିଥିବା ଖବର ମିଳିବା ପରେ ପୋଲିସ ତାଙ୍କ ଗାଁରେ ସୋମବାର ଚଢ଼ାଉ କରି ତାଙ୍କୁ ଗିରଫ କରିଥିଲା।
