କୋଲକାତା,୨୭ା୨: ଆସନ୍ତା ବର୍ଷ ପଶ୍ଚିମବଙ୍ଗରେ ବିଧାନସଭା ନିର୍ବାଚନ ହେବାକୁ ଯାଉଛି। ଏହା ପୂର୍ବରୁ ତୃଣମୂଳ କଂଗ୍ରେସ ମୁଖ୍ୟ ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ ସକ୍ରିୟ ହୋଇ ଉଠିଛନ୍ତି। ସେ ଗୁରୁବାର କୋଲକାତାର ନେତାଜୀ ଷ୍ଟାଡିୟମରେ ସମସ୍ତ ଏମ୍ପି ଏବଂ ବିଧାୟକଙ୍କ ସହିତ ବ୍ଲକସ୍ତରୀୟ ନେତାମାନଙ୍କର ଏକ ବୈଠକ ଡକାଇଛନ୍ତି। ଏହି ବୈଠକରେ ସେ ଦିଲ୍ଲୀ ଏବଂ ମହାରାଷ୍ଟ୍ରରେ ଭାଜପାର ବିଜୟ ପାଇଁ ନିର୍ବାଚନ କମିଶନଙ୍କ କାର୍ଯ୍ୟଶୈଳୀକୁ ଦାୟୀ କରିଥିଲେ।
ମମତା କହିଛନ୍ତି, ‘ଦିଲ୍ଲୀ ଏବଂ ମହାରାଷ୍ଟ୍ରରେ, ଭାଜପା ହରିୟାଣା ଏବଂ ଗୁଜରାଟର ଲୋକଙ୍କ ନକଲି ଭୋଟ ତିଆରି କରି ନିର୍ବାଚନ ଜିତିଛି।’ ସେ କର୍ମୀମାନଙ୍କ ସମ୍ମୁଖରେ ଘୋଷଣା କଲେ ଯେ, ଯଦି ଆବଶ୍ୟକ ହୁଏ, ତେବେ ଆମେ ଭୋଟର ତାଲିକାରୁ ନକଲି ଭୋଟରଙ୍କ ନାମ ବାଦ୍ ଦେବା ଦାବିରେ ନିର୍ବାଚନ କମିଶନ କାର୍ଯ୍ୟାଳୟ ସମ୍ମୁଖରେ ଧାରଣା ମଧ୍ୟ ଦେବୁ।
ବୈଠକରେ ମମତା ଜ୍ଞାନେଶ କୁମାରଙ୍କୁ ମୁଖ୍ୟ ନିର୍ବାଚନ କମିଶନର ଭାବରେ ନିଯୁକ୍ତ କରି ଭାଜପା ନିର୍ବାଚନ କମିଶନକୁ ପ୍ରଭାବିତ କରିବାକୁ ଚେଷ୍ଟା କରୁଥିବା ଅଭିଯୋଗ କରିଥିଲେ। ସେ କହିଛନ୍ତି ଯେ, ନିର୍ବାଚନ କମିଶନ ନିରପେକ୍ଷ ନ ହେଲେ ମୁକ୍ତ ଏବଂ ନିରପେକ୍ଷ ନର୍ବାଚନ ହୋଇପାରିବ ନାହିଁ।
ଏହି ବୈଠକରେ କର୍ମୀମାନଙ୍କୁ ସମ୍ବୋଧିତ କରି ଟିଏମ୍ସି ମହାସଚିବ ଅଭିଷେକ ବାନାର୍ଜୀ କହିଛନ୍ତି ଯେ, ମୁଖ୍ୟମନ୍ତ୍ରୀ ମମତାଙ୍କ ସହ ତାଙ୍କର କୌଣସି ମତଭେଦ ନାହିଁ। ସେ କହିଥିଲେ ଯେ, ମୁଁ ତୃଣମୂଳ କଂଗ୍ରେସର ଜଣେ ବିଶ୍ୱସ୍ତ ସୈନିକ ଏବଂ ମୋର ନେତ୍ରୀ ହେଉଛନ୍ତି ମମତା ବାନାର୍ଜୀ। ଭାରତୀୟ ଜନତା ପାର୍ଟିରେ ଯୋଗଦେବା ନେଇ ହେଉଥିବା କଳ୍ପନାଜଳ୍ପନାକୁ ପ୍ରତ୍ୟାଖ୍ୟାନ କରି ଅଭିଷେକ କହିଛନ୍ତି, ‘ଯେଉଁମାନେ କହୁଛନ୍ତି ଯେ, ମୁଁ ଭାଜପାରେ ଯୋଗଦେଉଛି, ସେମାନେ ମିଥ୍ୟା ଗୁଜବ ପ୍ରଚାର କରୁଛନ୍ତି।’
ସେ କହିଲେ, ‘ମୁଁ ସେହି ଲୋକମାନଙ୍କୁ ଜାଣେ ଯେଉଁମାନେ ଏପରି ମିଥ୍ୟା ଖବର ପ୍ରସାରଣ କରୁଛନ୍ତି।’ ଆସନ୍ତା ବର୍ଷ ବିଧାନସଭା ନିର୍ବାଚନ ପୂର୍ବରୁ ସେମାନଙ୍କର କିଛି ସ୍ବାର୍ଥ ଅଛି। ଡାଇମଣ୍ଡ ହର୍ବରରୁ ଏମ୍ପି ବାନାର୍ଜୀ ମଧ୍ୟ କହିଛନ୍ତି ଯେ, ସେ ଗତ ବିଧାନସଭା ନିର୍ବାଚନ ସମୟରେ ଯେପରି ଦଳ ଭିତରେ ବିଶ୍ୱାସଘାତକମାନଙ୍କୁ ପର୍ଦ୍ଦାଫାଶ କରିଥିଲେ, ସେପରି ସେ ଜାରି ରଖିବେ।
