ନୂଆଦିଲ୍ଲୀ,୧୦।୬:ତୃଣମୂଳ କଂଗ୍ରେସ ଏମ୍ପି ସାଗରିକା ଘୋଷ ସୋମବାର ଏକ ବଡ଼ ଖୁଲାସା କରିଛନ୍ତି। ସେ କହିଛନ୍ତି, ରବିବାର ସାରେ ମୋଦି ଏବଂ କେନ୍ଦ୍ର ମନ୍ତ୍ରୀଙ୍କ ଶପଥ ଗ୍ରହଣ ସମାରୋହରେ ତୃଣମୂଳ କଂଗ୍ରେସ ସୁପ୍ରିମୋ ମମତା ବାନାର୍ଜୀ ତାଙ୍କ ଘରେ ଥିବା ସମସ୍ତ ଆଲୋକ ବନ୍ଦ କରି ଅନ୍ଧାରରେ ବସିଥିଲେ।
ରବିବାର ଅନୁଷ୍ଠିତ ସରକାରଙ୍କ ଶପଥ ଗ୍ରହଣ ସମାରୋହରେ ତୃଣମୂଳ କଂଗ୍ରେସ ଅଂଶଗ୍ରହଣ କରି ନ ଥିଲେ। ସାଗାରିକା ଘୋଷ ସୋସିଆଲ ମିଡିଆ ପ୍ଲାଟଫର୍ମରେ ଲେଖିଛନ୍ତି, ନରେନ୍ଦ୍ର ମୋଦିଙ୍କ ଶପଥ ଗ୍ରହଣ ଉତ୍ସବ ପାଳନ କରୁଥିବା ସମସ୍ତଙ୍କୁ ଭାରତର ଏକମାତ୍ର ମହିଳା ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ବାର୍ତ୍ତା। ସେ ତଥାକଥିତ “ସମାରୋହ” ସମୟରେ ସମସ୍ତ ଲାଇଟ ବନ୍ଦ କରି ଅନ୍ଧାରରେ ବସିଥିଲେ, କାରଣ “ପ୍ରଧାନମନ୍ତ୍ରୀ” ଜନାଦେଶ ହରାଇଛନ୍ତି ଏବଂ ଲୋକମାନେ ତାଙ୍କୁ ପ୍ରତ୍ୟାଖ୍ୟାନ କରିଛନ୍ତି।
ସାଗରିକା ଘୋଷ କହିଛନ୍ତି, ଭାରତୀୟ ଜନତା ପାର୍ଟି ଏକ ନୂଆ ନେତା ବାଛିବା ଉଚିତ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସ୍ଥାନରେ ଅନ୍ୟ କାହାକୁ ପ୍ରଧାନମନ୍ତ୍ରୀ ଭାବେ ମନୋନୀତ କରାଯିବା ଉଚିତ୍। କାରଣ ସେ ସମଗ୍ର ନିର୍ବାଚନ ପ୍ରଚାର ତାଙ୍କ ଉପରେ ଧ୍ୟାନ ଦେଉଥିଲେ ମଧ୍ୟ ତାଙ୍କ ଦଳ ଲୋକ ସଭା ନିର୍ବାଚନରେ ବହୁମତ ପାଇପାରିନାହିଁ। ସେ ବାରାଣାସୀରେ ପ୍ରାୟ ହାରିଥିଲେ, ଅଯୋଧ୍ୟାରେ ହାରିଥିଲେ, ଏକ ଆତ୍ମନିର୍ଭରଶୀଳ ନିର୍ବାଚନ ପ୍ରଚାର ସତ୍ତ୍ୱେ ସଂଖ୍ୟାଗରିଷ୍ଠତା ହାସଲ କରିପାରି ନ ଥିଲେ। ମୋଦିଙ୍କୁ ବଦଳାଇବାକୁ ପଡ଼ିବ।
