ନୂଆଦିଲ୍ଲୀ,୨୧ ।୧୦: କଂଗ୍ରେସର ନବ ନିର୍ବାଚିତ ଅଧ୍ୟକ୍ଷ ମଲ୍ଲିକାର୍ଜୁନ ଖର୍ଗେଙ୍କୁ ୨୦୨୪ ଲୋକ ସଭା ନିର୍ବାଚନ ପୂର୍ବରୁ ଦେଶର ସବୁଠାରୁ ପୁରୁଣା ଦଳକୁ ମଜଭୁତ କରିବାକୁ ପଡିବ । ଏଥିପାଇଁ ଖର୍ଗେଙ୍କ ସାମ୍ନାରେ ରହିଛି ଅନେକ ଚ୍ୟାଲେଞ୍ଜ । ଦୀର୍ଘ ୨୪ ବର୍ଷ ପରେ ଗାନ୍ଧୀ ପରିବାର ବାହାରୁ ଅଧ୍ୟକ୍ଷ ହୋଇଥିବା ଖର୍ଗେଙ୍କ ପାଇଁ ପ୍ରଥମ ଚ୍ୟାଲେଞ୍ଜ ରହିବ ଗୁଜରାଟ ଓ ହିମାଚଳ ପ୍ରଦେଶ ବିଧାନସଭା ନିର୍ବାଚନ । ଏହାସହ ରାଜସ୍ଥାନ ଓ କର୍ନାଟକରେ ବୃଦ୍ଧି ପାଇଥିବା ଆଭ୍ୟନ୍ତରିଣ କଳହ ବି ଖର୍ଗେଙ୍କ ପାଇଁ ଆଉ ଏକ ବଡ ଚ୍ୟାଲେଞ୍ଜ । ତେଣୁ ସାଧାରଣ ନିର୍ବାଚନ ପୂର୍ବରୁ ଦଳକୁ ଏକଜୁଟ କରିବା ଖର୍ଗେଙ୍କ ପାଇଁ ସବୁଠାରୁ ବଡ ଚ୍ୟାଲେଞ୍ଜ ହେବ । ଅକ୍ଟୋବର ୨୬ରେ ଖର୍ଗେ ଅଫିସିଆଲି ଅଧ୍ୟକ୍ଷ ପଦର କାର୍ଯ୍ୟଭାର ସମ୍ଭାଳିବେ ।
ହିମାଚଳ ପ୍ରଦେଶ ଓ ଗୁଜରାଟରେ ଭାରତୀୟ ଜନତା ପାର୍ଟି(ଭାଜପା)ର ସ୍ଥିତି ଖୁବ୍ ମଜଭୁତ ରହିଛି । ସେଥିପାଇଁ ଏଠାକାର ବିଧାନସଭା ନିର୍ବାଚନ ଖର୍ଗେଙ୍କ ପାଇଁ ପ୍ରଥମ ଚ୍ୟାଲେଞ୍ଜ ହେବ । ବର୍ତ୍ତମାନ କେବଳ ଦୁଇଟି ରାଜ୍ୟ ରାଜସ୍ଥାନ ଓ ଛତିଶଗଡ଼ରେ କଂଗ୍ରେସର ସରକାର ରହିଛି । ହିମାଚଳ ପ୍ରଦେଶ ଓ ଗୁଜରାଟ ପରୀକ୍ଷା ପରେ ୨୦୨୩ରେ ୯ ରାଜ୍ୟର ବିଧାନସଭା ନିର୍ବାଚନ ହେବ । ଯେଉଁଥିରେ ତାଙ୍କର ଗୃହ ରାଜ୍ୟ କର୍ନାଟକ ବି ରହିଛି । ଦଳ ମଧ୍ୟରେ ଅଭିଜ୍ଞତା ଥିବା ନେତା ଓ ଯୁବକଙ୍କ ମଧ୍ୟରେ ବି ସନ୍ତୁଳନ ରଖିବା ଖର୍ଗେଙ୍କ ପାଇଁ ଆଉ ଏକ ଚ୍ୟାଲେଞ୍ଜ ।
