ଲାଞ୍ଜିଗଡ଼,୨୧ା୬(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ୍ ଲାଞ୍ଜି ପଞ୍ଚାୟତ କାଣ୍ଡମାଠାରେ ମାଲିଗୁଡ଼ା କ୍ଷୁଦ୍ର ଜଳସେଚନ ପ୍ରକଳ୍ପ ଚାଷୀଙ୍କ କାମରେ ଆସୁନାହିଁ। ସୂଚନାନୁସାରେ ୨୦୦୩ ମସିହାରେ ପ୍ରକଳ୍ପ କାମ ଆରମ୍ଭ ହୋଇଥିବାବେଳେ ୨୦୦୪ ସୁଦ୍ଧା ପ୍ରାୟ ୭୦ ପ୍ରତିଶତ ଶେଷ ହୋଇଥିଲା। ଏହା ପରଠାରୁ ପ୍ରକଳ୍ପ ଅଧାପନ୍ତରିଆ ଭାବେ ପଡ଼ିରହିଥିଲା। ବାରମ୍ବାର ଚାଷୀମାନେ ଅଭିଯୋଗ କରିବାରୁ ୨୦୨୦ରେ ପୁନଃ ନିର୍ମାଣ କାର୍ଯ୍ୟ ଆରମ୍ଭ ହେଲା। ୨୦୨୧ ଅଗଷ୍ଟ ୧ରେ ଉକ୍ତ ପ୍ରକଳ୍ପରୁ କେବଳ କାଣ୍ଡମା ଗ୍ରାମର ପ୍ରାୟ ୫୦ଏକର ଜମିକୁ ଜଳସେଚିତ ହୋଇପାରିଛି। ହେଲେ ପ୍ରକଳ୍ପ ଦ୍ୱାରା ଉପକୃତ ହେବାକୁ ଥିବା ବୁଣ୍ଡେଲ, ମୂଷାନାଳ ଗ୍ରାମର ୨୦୦ରୁ ଅଧିକ ହେକ୍ଟର ଚାଷଜମିରେ ଜଳସେଚନ ହୋଇପାରିନାହିଁ। କ୍ଷୁଦ୍ର ଜଳସେଚନ ବିଭାଗ ଆଉ ଏହି ପ୍ରକଳ୍ପକୁ ଆନ୍ତରିକତା ଦେଖାଇଲା ନାହିଁ। ଅନ୍ୟପକ୍ଷେ କଳାହାଣ୍ଡି ଜିଲା କ୍ଷୁଦ୍ର ଜଳସେଚନ କେନାଲଗୁଡ଼ିକର ଅବସ୍ଥା ଶୋଚନୀୟ। ଚଳିତ ଖରିଫରେ କେନାଲର ପଙ୍କୋଦ୍ଧାର କାମ ନ ହେବାରୁ ଗ୍ରାମବାସୀ ନିଜ ପଇସା ଓ ଶ୍ରମଦାନ କରି କେନାଲ ସଫା କରିଛନ୍ତି। ଏ ବିଷୟରେ ବିଭାଗର ଦୃଷ୍ଟି ଆକର୍ଷଣକଲେ ମଧ୍ୟ ଅଣଦେଖା କରାଯାଉଛି ବୋଲି ଚାଷୀ କୁମୁଦ ସାହୁ, ଗଗନ ସାହୁ, ପ୍ରମୋଦ ସାହୁ, ଲକ୍ଷ୍ମୀପ୍ରିୟା ସାହୁ, ମୀନକେତନ ପରିଚ୍ଛା, ପୀତାମ୍ବର ଦୋରା ପ୍ରମୁଖ ଗ୍ରାମବାସୀ ଅଭିଯୋଗ କରିଛନ୍ତି ।
ଅପରପକ୍ଷେ ୨୦୨୩ ମେ ମାସରେ ମାଲିଗୁଡା କ୍ଷୁଦ୍ର ଜଳସେଚନ ପ୍ରକଳ୍ପର ରକ୍ଷଣାବେକ୍ଷଣ ଓ ଜଳସେଚନ ବ୍ୟବସ୍ଥାର ଉପଯୁକ୍ତ ପରିଚାଳନା ପାଇଁ କାଣ୍ଡମା, ବୁଣ୍ଡେଲ, ମୂଷାନାଳର ଚାଷୀଙ୍କୁ ନେଇ ପାଣିପଞ୍ଚାୟତ ଗଠନ କରାଯାଇଥିଲା। ପାଣି ପଞ୍ଚାୟତ ସଭାପତି ଓ ସମ୍ପାଦକ ଗଗନ ବିହାରୀ ସାହୁ ଗତ ଏପ୍ରିଲରେ ବିଭାଗୀୟ ଅଧିକାରୀଙ୍କୁ ମାଲିଗୁଡ଼ା ପ୍ରକଳ୍ପ କେନାଲ ପୁନରୁଦ୍ଧାର ନେଇ ଦୃଷ୍ଟି ଆକର୍ଷଣ କରିଥିଲେ। ଗତ ୪ବର୍ଷ ହେବ କେନାଲର ପଙ୍କୋଦ୍ଧାର ପାଇଁ ଟଙ୍କା ଦିଆଯାଇ ନାହିଁ ବୋଲି ପାଣିପଞ୍ଚାୟତର ସମ୍ପାଦକ ଅଭିଯୋଗ କରିଛନ୍ତି। କଳାହାଣ୍ଡି ଜିଲାପାଳ ଏ ଦିଗରେ ଦୃଷ୍ଟିଦେବାକୁ ଅଞ୍ଚଳର ଚାଷୀ ଦାବି କରିଛନ୍ତି। ଏ ନେଇ କ୍ଷୁଦ୍ର ଜଳସେଚନ ବିଭାଗ ଯନ୍ତ୍ରୀ ପ୍ରଫୁଲ୍ଲ କୁମାର ମହାନ୍ତଙ୍କୁ ପଚାରିବାରୁ କଳାହାଣ୍ଡି ଜିଲାରେ ୧୩୦ ପାଣି ପଞ୍ଚାୟତ ପାଇଁ ୭୦ରୁ ୮୦ ଲକ୍ଷ ଟଙ୍କା ରକ୍ଷଣାବେକ୍ଷଣ ଲାଗି ଅନୁଦାନ ଆସୁଥିଲେ ବି ସବୁ ଜାଗାରେ କରି ହେଉନାହିଁ। ଏହି ବର୍ଷ ଅନୁଦାନ ଆସିଲେ ରକ୍ଷଣାବେକ୍ଷଣ କାର୍ଯ୍ୟ କରାଯିବ ବୋଲି ସେ ପ୍ରକାଶ କରିଥିଲେ।
