ରାୟଗଡା ଅଫିସ,୨୬।୪: ମ୍ୟାଲେରିଆ ନିୟନ୍ତ୍ରଣ ପାଇଁ ସରକାର ପ୍ରତିବର୍ଷ ଜିଲା ଓ ପଞ୍ଚାୟତସ୍ତରରେ ସରକାର ଅନେକ ଟଙ୍କା ଖର୍ଚ୍ଚ କରୁଛନ୍ତି। ହେଲେ ବାସ୍ତବରେ ତାହା ଫଳପ୍ରଦ ହେଉନାହିଁ। ପ୍ରତିବର୍ଷ କେବଳ ବୈଠକ କରି ସରକାରୀ ଅଧିକାରୀମାନେ କାମ ସାରି ଦେଉଥିବା ଅଭିଯୋଗ ହେଉଛି। ରାୟଗଡ଼ା ଜିଲାର ଚନ୍ଦ୍ରପୁର, ଗୁଡାରି, ମୁନିଗୁଡା ଭଳି ଦୁର୍ଗମ ଅଞ୍ଚଳରେ ଅଧିକାଂଶ ମ୍ୟାଲେରିଆ ପ୍ରକୋପ ରହୁଥିବା ବେଳେ ଅନ୍ୟ ଅଞ୍ଚଳ ଗୁଡିକ ମଧ୍ୟ ଏଥିରୁ ବାଦ ପଡୁନି। ଏପରକି ରାୟଗଡା ସହରରେ ପ୍ରତ୍ୟେକ ସ୍ଥାନରେ ମଧ୍ୟ ମଶା ପ୍ରାଦୁର୍ଭାବ ରହିଛି। ମ୍ୟାଲେରିଆ ନିରାକରଣ ବୈଠକ ଏକ ପ୍ରହସନ ବୋଲି ଜନସାଧାରଣ ଅଭିଯୋଗ କରୁଛନ୍ତି। ଯଦି ମ୍ୟାଲେରିଆ ଦୂର କରିବାର ଅଛି ତେବେ ମଶା ପ୍ରାଦୁର୍ଭାବ କମାଇବା ସହ ସରକାରଙ୍କ ତରଫରୁ ଦିଆଯାଉ ଥିବା ମଶାରୀ ଲୋକେ ବ୍ୟବହାର କରୁଛନ୍ତି ନା ନିଜ ଜମିରେ ବାଡ଼ କରୁଛନ୍ତି ତାହା ଜାଣିବା ଉଚିତ ବୋଲି ବୁଦ୍ଧିଜୀବୀ କହିଛନ୍ତି। ମଙ୍ଗଳବାର ବିଶ୍ୱ ମ୍ୟାଲେରିଆ ଦିବସ ଅବସରରେ ଟାସ୍କ ଫୋର୍ସ କମିଟି ବୈଠକ ବାରିଝୋଲାଠାରେ ଥିବା ଜିଲା ମୁଖ୍ୟ ଚିକିତ୍ସା ଓ ଜନ ସ୍ବାସ୍ଥ୍ୟ ଅଧିକାରୀଙ୍କ କାର୍ଯ୍ୟାଳୟ ଠାରେ ପାଳିତ ହୋଇଯାଇଛି। ଅଧିକ ମ୍ୟାଲେରିଆ ପ୍ରବଣ ଅଞ୍ଚଳକୁ ଅନୁଧ୍ୟାନ କରି ନୂତନ ଭାବେ ୬୮ଟି ସବ ସେଣ୍ଟର ଖୋଲିବାକୁ ନିଷ୍ପତ୍ତି ନିଆଯାଇଛି l ୨୦୨୦ ରେ ମଶାରୀ ବଣ୍ଟନ ହୋଇଥିଲା। ପୁଣି ୨୦୨୩ରେ ସରକାର ମଶାରୀ ବାଣ୍ଟିବା କଥା ଚିନ୍ତା କରୁଛନ୍ତି । ଗ୍ରାମାଞ୍ଚଳ ହେଉ କି ସହର ମଶାରୀର ସଦୁପଯୋଗ କରିବା ଆବଶ୍ୟକ। ଜିଲାରେ ମ୍ୟାଲେରିଆକୁ କିପରି ଦୂରେଇବା ସେ ନେଇ ି ବୈଠକରେ ଆଲୋଚନା କରାଯାଇଛି । ଅନ୍ୟପଟେ ରାୟଗଡା ଜିଲା ମ୍ୟାଲେରିଆରେ ୨ୟ ସ୍ଥାନରେ ରହିଥିବା ଜଣାପଡିଛି । ତେଣୁ ମ୍ୟାଲେରିଆ ନିରାକରଣରେ ଲୋକେ ସଚେତନ ହେବା ସହ ଅଧିକାରୀମାନେ ଆହୁରି ଅଧିକ ସଚେତନତା କରାଇବାର ଆବଶ୍ୟକ ବୋଲି ବୁଦ୍ଧିଜୀବୀ କହିଛନ୍ତି l ଏଡିପିଏଚଓବି ଏଲ ଏନ ପୃଷ୍ଟିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଜିଲା ମୁଖ୍ୟ ଚିକିତ୍ସାଳୟର ସୁପରଣ୍ଟେଣ୍ଡେଣ୍ଟ ବରଦା କାନ୍ତ ମିଶ୍ର, ଏପିଏଚଓ ଡ. ମମତା ଚୌଧୁରୀ,ଏଡିଏମଓ ମମତା ସାହୁ, ଜିଲା ମଙ୍ଗଳ ଅଧିକାରୀ ଅଶୋକ ଶତପଥିଙ୍କ ସମେତ ସ୍ବାସ୍ଥ୍ୟ ଅଧିକାରୀମାନେ ପ୍ରମୁଖ ଉପସ୍ଥିତ ଥିଲେ l
