ନୂଆଦିଲ୍ଲୀ: ମହିନ୍ଦ୍ରା ଆଣ୍ଡ ମହିନ୍ଦ୍ରା ଲିମିଟେଡ୍ ପକ୍ଷରୁ ନୂଆ ‘ଥାର୍’ ମଡେଲ ଶୁକ୍ରବାର ବଜାରରେ ପ୍ରବେଶ କରିଛି। ମହିନ୍ଦ୍ରା ଗ୍ରୁପ୍ର ୭୫ ବର୍ଷ ପୂର୍ତ୍ତି ପାଳନ ଅବସରରେ ଏହି ନୂଆ ଏସ୍ୟୁଭିକୁ ଉନ୍ମୋଚନ କରାଯାଇଛି। ମହିନ୍ଦ୍ରାର ପରମ୍ପରାକୁ ବଜାୟ ରଖି ନୂଆ ଥାର୍ ଆହୁରି ଶକ୍ତିଶାଳୀ ପରଫରମାନ୍ସ ସହ ଗ୍ରାହକଙ୍କ ମନ ଜିଣିବାରେ ସହାୟକ ହେବ ବୋଲି ମହିନ୍ଦ୍ରା ଆଣ୍ଡ ମହିନ୍ଦ୍ରା ଲିମିଟେଡ୍ର ଏମ୍ଡି ତଥା ସିଇଓ ଡ.ପଓ୍ବନ ଗୋଏଙ୍କା ସୂଚନା ଦେଇଛନ୍ତି। ନୂଆ ଅବତାରରେ ଆସିଥିବା ‘ଥାର୍’ ୨ଟି ଟ୍ରିମ ( ଏଏକ୍ସ ଏବଂ ଏଲ୍ଏକ୍ସ)ରେ ଉପଲବ୍ଧ ହେଉଥିବା ଜଣାପଡିଛି। ଏଏକ୍ସ ସିରିଜର ଆରମ୍ଭ ମୂଲ୍ୟ ୯.୮୦ ଲକ୍ଷ ଟଙ୍କା ରହିଥିବା ବେଳେ ଏଲ୍ଏକ୍ସ ସିରିଜ ୧୨.୪୯ ଲକ୍ଷ ଟଙ୍କା ରହିଛି। ନୂଆ ମଡେଲରେ ଗ୍ରାହକ ସଦ୍ୟତମ ଷ୍ଟାଇଲ, ପରଫରମାନ୍ସ, ଆରାମ, ଟେକ୍ନୋଲୋଜି, ସୁବିଧା ଏବଂ ସୁରକ୍ଷା ଭଳି ଗୁରୁତ୍ୱପୂର୍ଣ୍ଣ ଫିଚର ଲାଭ କରିପାରିବେ। ଯାନଟିରେ ବିଏସ୍ ୬ ଇଞ୍ଜିନ ବିକଳ୍ପ, ୨.୦ ଲିଟରର ଏମ୍ଷ୍ଟାଲିୟନ ଟିଜିଡିଆଇ ପେଟ୍ରୋଲ ଇଞ୍ଜିନ, ୨.୨ ଲିଟରର ଏମ୍ହକ୍ ଡିଜେଲ ଇଞ୍ଜିନ, ୬ ସ୍ପିଡ୍ ଅଟୋମେଟିକ ଟ୍ରାନ୍ସମିଶନ କିମ୍ବା ୬ ସ୍ପିଡ୍ ମାନୁଆଲ ଟ୍ରାନ୍ସମିଶନର ବିକଳ୍ପ ରହିଛି। ସେହିଭଳି ପ୍ରଥମ ଥର ଲାଗି ଏଥିରେ ଟପ୍ ବିକଳ୍ପ ପ୍ରଦାନ କରାଯାଇଛି। ଲୋକମାନେ କନଭର୍ଟିବଲ ଟପ୍ କିମ୍ବା ହାର୍ଡ ଟପ୍ ବା ସଫ୍ଟ ଟପ୍ ବାଛିପାରିବେ। ୪ ଫ୍ରଣ୍ଟ ଫେସିଂ ସିଟ୍ ବ୍ୟବସ୍ଥା ଏଥିରେ କରାଯାଇଛି। ସେହିଭଳି ୧୭.୭ ସେମିର ଟଚ୍ ସ୍କ୍ରିନ ଇନ୍ଫୋଟେନମେଣ୍ଟ ସିଷ୍ଟମ, କ୍ରୁଜ କଣ୍ଟ୍ରୋଲ, ଆଡଭେନଞ୍ଚର ଷ୍ଟାଟିଷ୍ଟିକ୍ସ ଡିସ୍ପଲେ, ସ୍ପୋର୍ଟି ଫ୍ରଣ୍ଟ ସିଟ୍, ରୁଫ୍ ମାଉଣ୍ଟେଡ ସ୍ପିକର ମଡେଲଟିରେ ସ୍ଥାନିତ ହୋଇଛି। ଏହାବାଦ ନିରାପତ୍ତା ଫିଚର ମଧ୍ୟରେ ଏବିଏସ୍, ଇବିଡି, ଡୁଆଲ ଏୟାର ବ୍ୟାଗ୍ ପ୍ରମୁଖ ରହିଛି।
