ମୁମ୍ବାଇ,୪।୧୨: ମହାରାଷ୍ଟ୍ରରେ ଦୀର୍ଘ ସମୟ ଧରି ଲାଗି ରହିଥିବା ରାଜନୈତିକ ଅସ୍ଥିରତା ପରେ ମହାୟୁତି ସରକାର ଗଠନ ପାଇଁ ଦାବି କରିଛନ୍ତି। ରାଜ୍ୟପାଳଙ୍କ ସହ ସରକାର ଗଠନ କରିବାକୁ ଶିବସେନା ମୁଖ୍ୟ ଏକନାଥ ଶିନ୍ଦେ, ଭାଜପା ନେତା ଦେବେନ୍ଦ୍ର ଫଡନାଭିସ ଏବଂ ଏନସିପି ନେତା ଅଜିତ ପାୱାର ମିଳିତ ଭାବେ ସହମତି ପ୍ରକାଶ କରିଛନ୍ତି। ଏହି ଅବସରରେ କେନ୍ଦ୍ରୀୟ ପର୍ଯ୍ୟବେକ୍ଷକ ନିର୍ମଳା ସୀତାରମଣ ଏବଂ ବିଜୟ ରୂପାନୀ ମଧ୍ୟ ଉପସ୍ଥିତ ଥିଲେ। ଡିସେମ୍ବର ୫ ଗୁରୁବାର ସାରେ ଦେବେନ୍ଦ୍ର ଫଡନାଭିସ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ।
ଭାରତୀୟ ଜନତା ପାର୍ଟି (ଭାଜପା) ନେତା ଦେବେନ୍ଦ୍ର ଫଡନାଭିସ ସର୍ବସମ୍ମତି କ୍ରମେ ଦଳର ବିଧାୟକ ଦଳର ନେତା ଭାବରେ ନିର୍ବାଚିତ ହୋଇଛନ୍ତି। ଏହା ସହ ମୁଖ୍ୟମନ୍ତ୍ରୀ ହେବା ପାଇଁ ତାଙ୍କର ରାସ୍ତା ସଫା କରାଯାଇଥିଲା। ଆସନ୍ତାକାଲି ଡିସେମ୍ବର ୫ ଅପରାହ୍ନ ୫ଟା ୩୦ ସମୟରେ ଆଜାଦ ମଇଦାନରେ ଆୟୋଜିତ ଏକ ବିଶାଳ ସମାରୋହରେ ସେ ତୃତୀୟ ଥର ପାଇଁ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ।
ଏଥିପାଇଁ କଠୋର ସୁରକ୍ଷା ବ୍ୟବସ୍ଥା, ୪,୦୦୦ ରୁ ଅଧିକ ପୋଲିସ ନିୟୋଜିତହୋଇଛନ୍ତି।
ଶପଥ ଗ୍ରହଣ ସମାରୋହ ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ୩୫୦୦ରୁ ଅଧିକ ପୋଲିସ କର୍ମଚାରୀ, ୫୨୦ ଅଧିକାରୀ, ଷ୍ଟେଟ ରିଜର୍ଭ ପୋଲିସ ଫୋର୍ସ (SRPF), କୁଇକ ରିଆକ୍ସନ ଟିମ (QRT) ଏବଂ ବୋମା ନିଷ୍କ୍ରିୟକାରୀ ସ୍କ୍ବାଡ ନିୟୋଜିତ କରାଯାଇଛି। ବରିଷ୍ଠ ପୋଲିସ ଅଧିକାରୀମାନେ ଘଟଣାସ୍ଥଳରେ ସୁରକ୍ଷା ଉପରେ ନଜର ରଖିବେ। ଏହା ସହିତ ମୁମ୍ବାଇର ଟ୍ରାଫିକ ପରିଚାଳନା ପାଇଁ ୨୮୦ରୁ ଅଧିକ କର୍ମଚାରୀ ନିୟୋଜିତ ହୋଇଛନ୍ତି।
ଏହି ସମାରୋହକୁ ନେଇ ମହାୟୁତିର ସମର୍ଥକ ଏବଂ ସାଧାରଣ ଜନତାଙ୍କ ମଧ୍ୟରେ ପ୍ରବଳ ଉତ୍ସାହ ରହିଛି । ଭାଜପା ଏହାର ୪୦,୦୦୦ କର୍ମୀଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା କରିଥିବାବେଳେ ୨,୦୦୦ ସ୍ବତନ୍ତ୍ର ଅତିଥିଙ୍କ ପାଇଁ ଅଲଗା ଆସନ ବ୍ୟବସ୍ଥା କରାଯାଇଛି। ଶିବସେନା, ଭାଜପା ଏବଂ ଏନସିପି ସମର୍ଥକମାନେ ବହୁ ସଂଖ୍ୟାରେ ପହଞ୍ଚିବାର ସମ୍ଭାବନା ରହିଛି।
ଶପଥ ଗ୍ରହଣ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନାଡା ଏବଂ ବହୁ କେନ୍ଦ୍ର ମନ୍ତ୍ରୀ ଉପସ୍ଥିତ ରହିବେ। ଏହା ସହିତ ମହାଯାତୁର ଅନ୍ୟ ପ୍ରମୁଖ ନେତା ଏବଂ ବିଭିନ୍ନ ଧର୍ମର ପ୍ରତିନିଧିମାନେ ମଧ୍ୟ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିବେ।
