ନୂଆଦିଲ୍ଲୀ, ୨୬।୦୬: କର୍ଣ୍ଣାଟକ ଏବଂ ଗୋଆ ସରକାର ପେଟ୍ରୋଲ ଓ ଡିଜେଲ୍ର ଦାମ୍ରେ ନିକଟରେ ବୃଦ୍ଧି କରିଥିବା ବେଳେ ମହାରାଷ୍ଟ୍ର ଏହାକୁ ନେଇ ବଡ଼ ଘୋଷଣା କରିଛି । ପେଟ୍ରୋଲ ଓ ଡିଜେଲ୍ ଦାମ୍ରେ ୨ଟଙ୍କା ହ୍ରାସ କରିବେ ରାଜ୍ୟ ସରକାର । ଏଥିରେ ଲାଗୁଥିବା ଟ୍ୟାକ୍ସ ହ୍ରାସ କରିବା ଫଳରେ ଦାମ୍ରେ ମଧ୍ୟ ହ୍ରାସ ଘଟିବ । ମହାରାଷ୍ଟ୍ର ସରକାର ବିଧାନସଭାରେ ଉପସ୍ଥାପନ କରିଥିବା ବଜେଟ୍ରେ ଏହା ଘୋଷଣା ହୋଇଛି।
ମହାରାଷ୍ଟ୍ର ସରକାରଙ୍କ ଉପ-ମୁଖ୍ୟମନ୍ତ୍ରୀ ଅଜିତ୍ ପାୱାର ବଜେଟ୍ର ଘୋଷଣା କରି କହିଛନ୍ତି ଯେ, ମୁମ଼୍ବାଇ ଅଞ୍ଚଳରେ ପେଟ୍ରୋଲ ଏବଂ ଡିଜେଲ୍ରେ ଟ୍ୟାକ୍ସ କମ୍ କରାଯିବ । ମୁମ଼୍ବାଇ ପାଇଁ ଡିଜେଲ୍ ଉପରେ ଲାଗୁଥିବା ୨୪ ପ୍ରତିଶତ ଟ୍ୟାକ୍ସ ହ୍ରାସ କରି ୨୧ ପ୍ରତିଶତ କରାଯିବ । ଫଳରେ ଡିଜେଲ୍ ଲିଟର ପ୍ରତି ୨ ଟଙ୍କା କମ୍ ପଡ଼ିବ । ଅନ୍ୟପଟେ ମୁମ଼୍ବାଇରେ ପେଟ୍ରୋଲ ଉପରେ ଲାଗୁଥିବା ୨୬ ପ୍ରତିଶତ ଟ୍ୟାକ୍ସକୁ ହ୍ରାସ କରି ୨୫ ପ୍ରତିଶତ କରାଯିବ । ଫଳରେ ପୋଟ୍ରୋଲ ଦାମ୍ରେ ୬୫ ପଇସା ହ୍ରାସ ପାଇବ ।
ସୂଚନା ଥାଉକି, ପେଟ୍ରୋଲ ଏବଂ ଡିଜେଲ ଉପରେ ଟ୍ୟାକ୍ସ କମ୍ ହେବା ଫଳରେ ସାଧାରଣ ଲୋକଙ୍କୁ ଟିକେ ଆଶ଼୍ବସ୍ତି ମିଳିବ । ବର୍ତ୍ତମାନ ମୁମ଼୍ବାଇରେ ପେଟ୍ରୋଲ ଦାମ୍ ୧୦୪.୨୧ ଟଙ୍କା ରହିଥିବା ବେଳେ ଏହା ୬୫ ପଇସା ହ୍ରାସ ପାଇ ୧୦୩.୫୬ ଟଙ୍କା ହେବ । ଅନ୍ୟପଟେ ଡିଜେଲ୍ ଦାମ୍ ବର୍ତ୍ତମାନ ୯୨.୧୫ ଟଙ୍କା ପ୍ରତି ଲିଟର ରହିଥିବା ବେଳେ ଏଥିରେ ୨ଟଙ୍କା ହ୍ରାସ ପାଇ ଏହା ୯୦.୧୫ ଟଙ୍କା ପ୍ରତି ଲିଟର ହେବ ।
