ଜଗତ୍ସିଂହପୁର, ୨୧ା୬(ପ୍ରମୋଦ କୁମାର ନାୟକ): ମହାନଦୀ ସାଉଥ ଡିଭିଜନ ଅନ୍ତର୍ଗତ ଏହି ନଦୀର ବାମପାର୍ଶ୍ୱ କୃଷ୍ଣାନନ୍ଦପୁରଠାରୁ ପୋଶଲ ପର୍ଯ୍ୟନ୍ତ ବନ୍ଧର ଉନ୍ନତୀକରଣ ଓ ପିଚୁ କାମ ପାଇଁ ୮ କୋଟି ଟଙ୍କା ବ୍ୟୟବରାଦ ହୋଇଛି। ନିଲାମ ପାଇ ଓସିସି କାମ କରୁଛି। କିନ୍ତୁ ଏହି କାମ ଅତ୍ୟନ୍ତ ନିମ୍ନମାନର ହେଉଛି। ନଦୀବନ୍ଧ ପାର୍ଶ୍ୱରୁ ମାଟି ତଡ଼ାଯିବା ସହ ଯେଉଁଭଳି ଭାବେ ଗଛ ଭଙ୍ଗାଯାଉଛି ତାହା ବନ୍ଧ ପ୍ରତି ବିପଦ ସୃଷ୍ଟି କରିଛି। ଏ ସମ୍ପର୍କରେ ୫ଟି ଗ୍ରାମପଞ୍ଚାୟତର ଅଧିବାସୀ ଜିଲାପାଳଙ୍କ ନିକଟରେ ଅଭିଯୋଗ କଲାପରେ ପ୍ରସଙ୍ଗର ଗମ୍ଭୀରତା ଦୃଷ୍ଟିରୁ ତଦନ୍ତ ହୋଇଛି। ଜିଲାପାଳଙ୍କ ପରାମର୍ଶକ୍ରମେ ଉପଜିଲାପାଳ ପ୍ରଶାନ୍ତ କୁମାର ତରାଇ ତଦନ୍ତ କରି ଅଭିଯୋଗର ସତ୍ୟାସତ୍ୟ ଅଛି ବୋଲି ଜିଲାପାଳଙ୍କୁ ଅବଗତ କରାଇଛନ୍ତି। ଉପଜିଲାପାଳ ଦର୍ଶାଇଛନ୍ତି ଯେ, ତିର୍ତ୍ତୋଲ ତହସିଲଦାର ଓ ଗ୍ରାମବାସୀଙ୍କ ଉପସ୍ଥିତିରେ ସେ କୃଷ୍ଣାନନ୍ଦପୁର ନିକଟ ମହାନଦୀ ରିଙ୍ଗ୍ ରୋଡ୍ ନିର୍ମାଣସ୍ଥଳ ପରିଦର୍ଶନରେ ଯାଇଥିଲେ। ଅଭିଯୋଗ ଅନୁଯାୟୀ, ରିଙ୍ଗ ରୋଡ୍ର ନିର୍ମାଣ କାମ ଅତି ନିମ୍ନମାନର ଥିବା ଦେଖାଯାଇଥିଲା। ଠିକାଦାର ଜେସିବି ଲଗାଇ ଅସଲ ରାସ୍ତା ବେସ୍ରୁ ମାଟି ଆଣି ରାସ୍ତାପାର୍ଶ୍ୱରେ ବ୍ୟବହାର କରିଛନ୍ତି। ଏବେ ବର୍ଷାଦିନ ହୋଇଥିବାରୁ ଏହି ମାଟି ସମ୍ପୂର୍ଣ୍ଣଭାବେ ଧୋଇଯିବା ସହ ରାସ୍ତା ଦୁର୍ବଳ ହୋଇଯାଇଛି। ତଦନ୍ତ ସମୟରେ ବିଭାଗୀୟ କୌଣସି ଯନ୍ତ୍ରୀ ସେଠାରେ ଉପସ୍ଥିତ ନ ଥିଲେ। ବିଭାଗୀୟ ପର୍ଯ୍ୟବେକ୍ଷଣ ଅଭାବରୁ ଠିକାଦାର ମନମୁଖିଭାବେ ମହାନଦୀ ବାମପାର୍ଶ୍ୱ ରିଙ୍ଗ ରୋଡ କାମ କରି ଚାଲିଛନ୍ତି। ଏହା ସଂଶୋଧନ ହେବା ଆବଶ୍ୟକ। ସୁରକ୍ଷାକୁ ଦୃଷ୍ଟିରେ ରଖି ଠିକାଦାର ରାସ୍ତାର ବେସରେ ମାଟି ପୂରଣ କରିବା ଜରୁରୀ। ମାଟି ପୂରଣ ଓ ଆବଶ୍ୟକ ସଂଶୋଧନ ନ କରିବା ଯାଏ ଠିକାଦାରଙ୍କ ପ୍ରାପ୍ୟ ପ୍ରଦାନ ବନ୍ଦ କରିବାକୁ ଉପଜିଲାପାଳ ଜିଲାପାଳଙ୍କୁ ସୁପାରିସ କରିଛନ୍ତି। ଉପଜିଲାପାଳଙ୍କ ତଦନ୍ତ ପରେ ୫ ପଞ୍ଚାୟତ ଯଥା କୃଷ୍ଣାନନ୍ଦପୁର, ବିଶୁନପୁର, କନିମୂଳ, ଡାଇଁଲୋ ଓ ଗୋପାଳପୁର (ଏସ୍)ର ଲୋକେ ଆଶ୍ୱସ୍ତ ଅନୁଭବ କରିଥିବା ଜଣାପଡ଼ିଛି।
ଏ ସମ୍ପର୍କରେ ସମସେର ଅଲ୍ଲୀ, ରାଧାନାଥ ଦାସ, ଦୁଷ୍ମନ୍ତ କୁମାର ସାହୁ, ସୁମନ୍ତ କୁମାର ସାହୁ, ମନୋଜ କୁମାର ପୃଷ୍ଟି, ନୃସିଂହ ଚରଣ ଦାସ, ରାକେଶ ସାହୁ, ଶାନ୍ତନୁ କୁମାର ଦାସ, ରଞ୍ଜନ କୁମାର ଦାସ ଓ ସୁଲତାନ ଅଲ୍ଲୀ, ଧୋୟା ଜନଜାଗରଣ ମଞ୍ଚ ସଭାପତି ବିଜୟ ଦାସ, ପ୍ରଶାନ୍ତ କୁମାର ପଣ୍ଡା, ନବନିର୍ମାଣ କୃଷକ ସଙ୍ଗଠନ କାର୍ଯ୍ୟକର୍ତ୍ତା ମାୟାଧର ସାହୁ ଓ ସୁଶାନ୍ତ ଦାସଙ୍କ ସମେତ ବହୁ ଲୋକ ପୂର୍ବରୁ ଜିଲାପାଳଙ୍କ ନିକଟରେ ନଦୀବନ୍ଧର ଅବସ୍ଥା ସମ୍ପର୍କରେ ଦୃଷ୍ଟି ଆକର୍ଷଣ କରିଥିଲେ। ସେମାନେ ଦର୍ଶାଇଥିଲେ, ମହାନଦୀ ବାମପାର୍ଶ୍ୱ କୃଷ୍ଣାନନ୍ଦପୁରରୁ ପୋଶଲ ପର୍ଯ୍ୟନ୍ତ ବନ୍ଧର ଉନ୍ନତୀକରଣ ଓ ପିଚୁ କାମ ପାଇଁ କେନ୍ଦ୍ରାପଡ଼ା ଅଞ୍ଚଳର ଜଣେ ବ୍ୟକ୍ତି ନିଲାମ ପାଇଥିଲେ। କିନ୍ତୁ ଶୁଣିବାକୁ ମିଳିଛି ଯେ, ଉକ୍ତ ନିଲାମଧାରୀ କାର୍ଯ୍ୟସ୍ଥଳକୁୁ ନ ଆସି ନିକଟସ୍ଥ ବିଶୁନପୁର ଗ୍ରାମପଞ୍ଚାୟତ କୋଲଟା ଗ୍ରାମର ଜଣେ ଅସାମାଜିକ ବ୍ୟକ୍ତିଙ୍କୁ ଏହାର ଦାୟିତ୍ୱ ଦେଇଛନ୍ତି। ସମ୍ପୃକ୍ତ ବ୍ୟକ୍ତି ଜେସିବି ସାହାଯ୍ୟରେ ନଦୀ ବନ୍ଧ ୨ ପାର୍ଶ୍ୱରୁ ଗଛଗୁଡିକୁ ଭାଙ୍ଗି ପକାଉଛନ୍ତି। କେବଳ ଏତିକି ନୁହେଁ, ନଦୀବନ୍ଧ ୨ ପାର୍ଶ୍ୱ ମୂଳରୁ ମାଟି ତାଡି ଏହାର ଉଭୟ ପାର୍ଶ୍ୱରେ ପକାଉଛନ୍ତି। ଗ୍ରାମବାସୀ ବିରୋଧ କରିବାରୁ ସେ ବିଭିନ୍ନ ପ୍ରକାର ଧମକ ଦେଉଛନ୍ତି। ଏ ପରିସ୍ଥିତିରେ ଲୋକେ ମହାନଦୀ ସାଉଥ୍ ଡିଭିଜନ ଅଧୀକ୍ଷଣ ଯନ୍ତ୍ରୀ ଓ ବିଭାଗୀୟ ମଣିଜଙ୍ଗା ଏସ୍ଡିଓଙ୍କ ଦୃଷ୍ଟି ଆକର୍ଷଣ କରିଥିଲେ। କିନ୍ତୁ ଓସିସି କାମ କରୁଥିବାରୁ ଏହି ବିଭାଗକୁ ଜଣାଯିବ ବୋଲି ଅଧୀକ୍ଷଣ ଯନ୍ତ୍ରୀ କହିଥିଲେ। ଏହାପରେ ମଣିଜଙ୍ଗା ଏସ୍ଡିଓ କାର୍ଯ୍ୟସ୍ଥଳରେ ପହଞ୍ଚତ୍ ଅନୁଧ୍ୟାନ କରି ସତ୍ୟାସତ୍ୟ ଜାଣିଥିଲେ। ଏହା ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଥିଲେ ସୁଦ୍ଧା କୌଣସି ସୁଫଳ ମିଳିନାହିଁ। ସମ୍ପୃକ୍ତ ଅସାମାଜିକ ବ୍ୟକ୍ତି ଜଣକ ପୂର୍ବପରି କାମ ଚାଲୁ ରଖିଛନ୍ତି। ସମ୍ପୃକ୍ତ ଅସାମାଜିକ ବ୍ୟକ୍ତିଙ୍କ ଧମକରେ ଗ୍ରାମବାସୀ ଭୟଭୀତ ହୋଇପଡ଼ିଛନ୍ତି। ଜିଲାପାଳ ନିଜେ ନଦୀବନ୍ଧ ପରିଦର୍ଶନ କଲେ ବାସ୍ତବରେ ଉନ୍ନତୀକରଣ ହେଉଛି କି ସରକାରଙ୍କ ପାଣ୍ଠିରୁ ଟଙ୍କା ବ୍ୟୟ କରାଯାଇ ନଦୀବନ୍ଧକୁ ଦୁର୍ବଳ କରାଯାଉଛିି ତାହା ସ୍ପଷ୍ଟ ହୋଇପାରିବ ବୋଲି ଅଭିଯୋଗକାରୀମାନେ ଦର୍ଶାଇଛନ୍ତି।
ଏ ସମ୍ପର୍କରେ ମହାନଦୀ ସାଉଥ ଡିଭିଜନ୍ ଅଧୀକ୍ଷଣ ଯନ୍ତ୍ରୀ ସିଦ୍ଧାର୍ଥ ଶଙ୍କର ଦାସଙ୍କ ସହ ମୋବାଇଲ୍ରେ ଯୋଗାଯୋଗ ପାଇଁ ଚେଷ୍ଟା କରାଯାଇଥିଲେ ମଧ୍ୟ ସେ ଫୋନ୍ ଉଠାଇ ନ ଥିଲେ।
