ଝିଅମାନଙ୍କ ହଷ୍ଟେଲରେ ପଶି ଜଣେ ଯୁବକ ସେମାନଙ୍କୁ ନାନା ହଇରାଣ କରୁଥିଲେ। ଏପରିକି ଏକାକୀ ରହୁଥିବା ଝିଅ ଏବଂ ମହିଳାମାନଙ୍କୁ ଟାର୍ଗେଟ୍ କରି ତାଙ୍କ ଘରେ ପଶୁଥିଲେ। ପରେ ସୋମାନଙ୍କ ଅନ୍ତବସ୍ତ୍ର ଚୋରି କରି ଗୋଟିଏ ଜାଗାରେ ଏକାଠି କରି ବ୍ଲେଡ୍ରେ କାଟି ପକାଉଥିଲେ।
ଏହି ଯୁବକ ଜଣଙ୍କ ଏତେ ଚାଲାକ ଥିଲେ ଯେ, କୌଶଳ କରି ଘରେ ପଶୁଥିଲେ ମଧ୍ୟ କେହି ଜାଣି ପାରୁ ନ ଥିଲେ। ଏମିତି ଘଟଣା ଉକ୍ତ ଅଞ୍ଚଳରେ ସବୁଦିନ ଘଟୁଥିଲେ ମଧ୍ୟ କିଏ ଏଭଳି କାମ କରୁଛି କେହି ଜାଣି ପାରୁ ନ ଥିଲେ। ପରେ ଏ ନେଇ ଥାନାରେ ଅଭିଯୋଗ ହୋଇଥିଲା।
ବିଜୟନଗର ପୋଲିସର ସୂଚନାନୁସାରେ, ପ୍ରାୟ ମାସେ ହେବ ଏଭଳି ଅଭିଯୋଗ କ୍ରମାଗତ ଭାବେ ଆସୁଥିଲା। ଅଭିଯୁକ୍ତ ଶୀତଲନଗର, ସୁମନ ନଗର, ସ୍ବର୍ଣ୍ଣବାଗ କଲୋନୀ ଏବଂ ଅନ୍ୟାନ୍ୟ ସ୍ଥାନରେ ଏପରି କାର୍ଯ୍ୟ କରି ଚାଲୁଥିଲେ।
ପୋଲିସ କହିଛି, ଏହି ଯୁବକ ଜଣଙ୍କ ମାନସିକ ବିକୃତିର ଶିକାର ହୋଇଥାଇପାରନ୍ତି। ଅନ୍ୟପକ୍ଷରେ ସଂପୃକ୍ତ ଅଭିଯୁକ୍ତଙ୍କ ବିରୋଧରେ ୧୯ଟି ମାମଲା ରୁଜୁ ହେବା ପରେ ଆଉ ଦୁଇଜଣ ଝିଅ ଠିକ୍ ସମାନ ଅଭିଯୋଗ କରିଥିଲେ। ଏହା ପରେ ପୋଲିସ ତନାଘନା ଆରମ୍ଭ କରି ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି।
