ମୁମ୍ବାଇ: ବଲିଉଡ୍ର ଭେଟେରାନ ଅଭିନେତା ଦିଲୀପ କୁମାର ଏବଂ କିମ୍ବଦନ୍ତୀ ଅଭିନେତ୍ରୀ ମଧୁବାଲାଙ୍କ ଫିଲ୍ମ ‘ମୋଗଲ-ଏ-ଆଜମ’ ଭାରତୀୟ ଫିଲ୍ମର ୍ବ୍ଲକବଷ୍ଟର ଫିଲ୍ମ ମଧ୍ୟରୁ ଅନ୍ୟତମ। ଫିଲ୍ମରେ ତାଙ୍କର ପ୍ରେମ କାହାଣୀ ଯେତିକି ଦୁଃଖଦ ଥିଲା ବାସ୍ତବ ଜୀବନର ପ୍ରେମ କାହାଣୀ ମଧ୍ୟ ସେତିକି ଦୁଃଖଦାୟକ ଥିଲା। ସେମାନଙ୍କର ପ୍ରେମ ଆଗକୁ ବଢ଼ିଥିଲା ସତ କିନ୍ତୁ ଲକ୍ଷ୍ୟସ୍ଥଳରେ ପହଞ୍ଚି ପାରି ନ ଥିଲା। ସେମାନଙ୍କ ପ୍ରେମ ପଛରେ ଥିବା କାରଣକୁ ମଧୁବାଲାଙ୍କ ଭଉଣୀ ମଧୁର ଭୂଷଣ ଏକ ସାକ୍ଷାତକାରରେ ପ୍ରକାଶ କରିଥିଲେ।
ମଧୁର କହିଥିଲେ, ଦିଲୀପ ମଧୁବାଲାଙ୍କୁ କେବେବି ଭୁଲି ନ ଥିଲେ। ମଧୁବାଲା ଅସୁସ୍ଥ ଥିବା ସମୟରେ ବ୍ରିଚ୍ କ୍ୟାଣ୍ଡି ହସ୍ପିଟାଲ ପରିଦର୍ଶନ କରି ଦିଲୀପ ମଧୁବାଲାଙ୍କୁ କହିଥିଲେ, ସେମାନେ ପୁଣି ଏକାଠି କାମ କରିବେ। ଦିଲୀପ କୁମାର ସେତେବେଳେ ବିବାହ କରି ନ ଥିଲେ। ତାଙ୍କ ବିବାହ ପରେ ଦିଲୀପ ତାଙ୍କୁ କେବେବି ଭେଟି ନ ଥିଲେ। ସେ ମଧ୍ୟ ମଧୁବାଲାଙ୍କ ଶେଷକୃତ୍ୟକୁ ଅସିଥିଲେ ମାତ୍ର ସେତେବେଳକୁ ମଧୁବାଲାଙ୍କ ସତ୍କାର ସରିଥିଲା। ତାଙ୍କ ପରିବାର ମଧ୍ୟ ଆସିଥିଲେ। ପରବର୍ତ୍ତୀ ତିନି ଦିନ ପାଇଁ ସେମାନେ ଆମକୁ ଖାଦ୍ୟ ପଠାଇଥିଲେ। ଏହା ଆମ ପାଇଁ ସମ୍ମାନ, ଶତ୍ରୁତା ନୁହେଁ।
ମଧୁବାଲାଙ୍କ ପିତା ଏବଂ ଦିଲୀପ କୁମାରଙ୍କ ସମ୍ପର୍କ ବିଷୟରେ ମଧ୍ୟ ମଧୁର କହିଥିଲେ, ‘ଦିଲୀପ ଥରେ ଆମ ଘରକୁ ଆସିଥିଲେ। ସେ ବାପାଙ୍କୁ ‘ଅତ୍ୟାଚାରୀ ଏବଂ ନିଷ୍ଠୁର ବୋଲି କହିଥିଲେ। ମୋ ବାପା ଦିଲୀପ କୁମାରଙ୍କୁ ପସନ୍ଦ କରୁଥିଲେ। ଯଦି ସେ ଦିଲୀପ କୁମାରଙ୍କୁ ପସନ୍ଦ କରି ନ ଥାନ୍ତେ ତେବେ ସେ ତାଙ୍କ ଝିଅର ପ୍ରେମକୁ ସମ୍ମତି ଦେଇ ନ ଥାନ୍ତେ।
ମଧୁବାଲା ଦିଲୀପ କୁମାରଙ୍କୁ ତାଙ୍କ ବାପାଙ୍କୁ କ୍ଷମା ମାଗିବାକୁ କହିଥିଲେ। କିନ୍ତୁ ଦିଲୀପ କ୍ଷମା ମାଗି ନ ଥିଲେ। ଏହା ପରେ ଦୁହିଁଙ୍କ ମଧ୍ୟରେ ଦୂରତା ବଢ଼ିଥିଲା।
ପରବର୍ତ୍ତୀ ସମୟରେ ଦିଲୀପ କୁମାର ଅଭିନେତ୍ରୀ ସାଇରା ବାନୁଙ୍କୁ ବିବାହ କରିଥିଲେ। ମଧୁବାଲା ମଧ୍ୟ ଗାୟକ କିଶୋର କୁମାରଙ୍କୁ ବିବାହ କରିଥିଲେ। କିନ୍ତୁ ମାତ୍ର ୩୬ ବର୍ଷ ବୟସରେ ମଧୁବାଲା ଦୁନିଆରୁ ବିଦାୟ ନେଇଥିଲେ।
