ବଲାଙ୍ଗୀର, ୯ା୧୨(ବୀରେନ୍ଦ୍ର କୁମାର ଝାଙ୍କର): ବଲାଙ୍ଗୀର ସୁଦପଡା ଦେଶୀ ମଦଭାଟି ଓ କ୍ଲବ୍ପଡା ଅଫିସରୁ ଜବତ ହୋଇଥିବା ଟଙ୍କା ସ୍ଥାନୀୟ ଏସ୍ବିଆଇ ମୁଖ୍ୟ ଶାଖାକୁ ଟ୍ରକ୍ରେ ଅଣାଯାଇ ଗଣାଯାଉଛି। ଶୁକ୍ରବାର ତୃତୀୟ ଦିନରେ ଆୟକର ବିଭାଗ ଅଧିକାରୀ ବ୍ୟାଙ୍କ କର୍ମଚାରୀଙ୍କ ସହ ୧୦ଟି ଟଙ୍କା ଗଣା ମେଶିନ୍ରେ ୩୮ କୋଟିରୁ ଉର୍ଦ୍ଧ୍ୱ ଗଣିଥିବା କୁହାଯାଉଛି। ଗୁରୁବାର ରାତି ୯ଟା ସୁଦ୍ଧା ୨୦ କୋଟିର ନୋଟ୍ ଗଣାଯାଇଥିବାବେଳେ ଶୁକ୍ରବାର ଆହୁରି ୧୮ କୋଟି ଟଙ୍କା ଗଣତି କରାଯାଇଥିବା ଜଣାପଡିଛି। ତେବେ ଟଙ୍କାର ପରିମାଣ ଏତେ ଯେ ଗଣତି ବେଳେ ମେଶିନ୍ ଅକାମୀ ହୋଇଯାଉଛି। ମଦଭାଟି ମ୍ୟାନେଜର ରାଜେଶ ସାହୁ ଓ ବଣ୍ଟି ସାହୁଙ୍କ ସହ ଟିଟିଲାଗଡ଼ରୁ ଆସିଥିବା ଅନ୍ୟ ଜଣେ ଯୁବକଙ୍କୁ ବିଭାଗୀୟ ଅଧିକାରୀମାନେ ବ୍ୟାଙ୍କ ଭିତରକୁ ନେଇଛନ୍ତି। ସମୁଦାୟ ୧୫୬ଟି ବ୍ୟାଗ ଓ ବସ୍ତାରେ ଜବତ ଟଙ୍କା ରହିଥିବାରୁ ଗଣତି ପାଇଁ ୪/୫ ଦିନ ସମୟ ଲାଗିଯିବ ବୋଲି ବିଶ୍ୱସ୍ତ ସୂତ୍ରରୁ ପ୍ରକାଶ।
ଆୟକର ବିଭାଗ ପକ୍ଷରୁ ଅତର୍କିତ ଚଢ଼ାଉ ପରେ ମଦ ବ୍ୟବସାୟୀଙ୍କ ଭାଟି, କାର୍ଯ୍ୟାଳୟ ଏବଂ ବାସଭବନରୁ ଶତାଧିକ କୋଟି ଟଙ୍କା ଜବତ ହେବା ଘଟଣା ରାଜ୍ୟ ତଥା ଦେଶବ୍ୟାପୀ ଚର୍ଚ୍ଚାର ବିଷୟ ହୋଇଛି। ବିଶେଷକରି ପଶ୍ଚିମ ଓଡ଼ିଶାର ଅନଗ୍ରସର ଜିଲାରୁ ୨୫୦ କୋଟିରୁ ଊର୍ଦ୍ଧ୍ୱ ଟଙ୍କା ଜବତ ହୋଇଥିବାରୁ ଏହା ବାସ୍ତବରେ ମଦ ବିକ୍ରି ଟଙ୍କା ନା ଏହା ପଛରେ ଆଉ କ’ଣ ରହସ୍ୟ ରହିଛି, ତାକୁ ନେଇ ପ୍ରଶ୍ନ ହେଉଛି। ଆୟକର ବିଭାଗ ପକ୍ଷରୁ ଏ ସଂକ୍ରାନ୍ତରେ କୌଣସି ପ୍ରତିକ୍ରିୟା ରଖାଯାଇ ନ ଥିବାରୁ ଏତେ ପରିମାଣର ଟଙ୍କା କେଉଁ ଉଦ୍ଦେଶ୍ୟରେ ରଖାଯାଇଥିଲା ବୋଲି ଲୋକେ କହୁଛନ୍ତି। ଏହି ଜିଲା ଶିକ୍ଷା, ସ୍ବାସ୍ଥ୍ୟ, ଗମନାଗମନ, ମାନବ ବିକାଶ ସୂଚକାଙ୍କରେ ପଛରେ ପଡ଼ିଥିବାବେଳେ ଦାଦନ ଶ୍ରମିକ ସମସ୍ୟା ବଡ଼ ସଙ୍କଟ ହୋଇ ଉଭାହୋଇଛି। କିଛିବର୍ଷ ହେଲା ଏହି ଅଞ୍ଚଳରେ ଦେଶୀ-ବିଦେଶୀ ମଦ ଓ ନିଶା କାରବାର ବଢ଼ିଛି। ଅପରାଧ ପ୍ରବଣତା ମଧ୍ୟ ବୃଦ୍ଧିପାଇଛି। ଦାରିଦ୍ର୍ୟ କାରଣରୁ ପିଲା ଅଧାରୁ ପାଠ ଛାଡ଼ିବାକୁ ବାଧ୍ୟ ହେଉଥିବାବେଳେ ସଦ୍ୟ ଘଟଣା ଦେଶରେ ଚର୍ଚ୍ଚିତ ହୋଇଛି। ବଲାଙ୍ଗୀର, ବୌଦ୍ଧ, ରାୟଗଡ଼ା, ସୁନ୍ଦରଗଡ଼, ରାଉରକେଲା, ସମ୍ବଲପୁର ଓ ଟିଟିଲାଗଡ଼ଠାରେ ଆୟକର ବିଭାଗ ତିନିଦିନ ହେଲା ଡେରା ପକାଇଛି। ମଦ ବ୍ୟବସାୟୀଙ୍କ ମଦଭାଟି, ବାସବଭନ ଓ ଅଫିସ୍ରେ ଚଢ଼ାଉ ଜାରି ରଖିବା ସହ ସବୁ ସ୍ଥାନକୁ ନିଜ ଅଧୀନରେ ରଖିଛି। ଏପରି କି ସେହି ସ୍ଥାନଗୁଡ଼ିକରୁ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ମଧ୍ୟ ବାହାରିଛି। ଝାଡ଼ଖଣ୍ଡ ଓ ଟିଟିଲାଗଡ଼ରେ ଘର କରି ବଲାଙ୍ଗୀର ସମେତ ପଡ଼ୋଶୀ ଜିଲାଗୁଡ଼ିକରେ ମଦ ବ୍ୟବସାୟ କରୁଥିବା ବ୍ୟବସାୟୀ ଦୀପକ ସାହୁ ଓ ସଞ୍ଜୟ ସାହୁଙ୍କ ଘରୁ ଏବଂ ମଦଭାଟିରୁ ବାହାରିଥିବା ଟଙ୍କାର ପରିମାଣ ଜଣାପଡ଼ିନାହିଁ।
ବଲାଙ୍ଗୀର ଜିଲାରେ ଗୋଟିଏ ବି ଶିଳ୍ପ କାରଖାନା ନାହିଁ। ଏକମାତ୍ର ଦେଓଗଁା ଚିନିକଳ ଦୀର୍ଘବର୍ଷ ହେଲା ବନ୍ଦ ପଡ଼ିଛି। ବାରମ୍ବାର ଦାବି ସତ୍ତ୍ୱେ ଚିନିକଳ ଖୋଲୁନାହିଁ। ଅନ୍ୟ ଶିଳ୍ପ ବି ପ୍ରତିଷ୍ଠା ହେଉନାହିଁ। ଏଠାରେ ଭଲ ହସ୍ପିଟାଲ ନ ଥିବାରୁ ପ୍ରତିଦିନ ଏଠାକାର ଲୋକେ ସାଧାରଣ ରୋଗ ପାଇଁ ଭୁବନେଶ୍ୱର, କଟକ, ବିଶାଖାପାଟଣା, ଦିଲ୍ଲୀ, ବେଙ୍ଗାଲୁରୁ ଓ ବମ୍ବେ ଯାଇ ଖର୍ଚ୍ଚାନ୍ତ ହେଉଛନ୍ତି। ବିଶ୍ୱବିଦ୍ୟାଳୟ, କଲେଜ, ସ୍କୁଲରେ ବହୁ ପଦବୀ ଖାଲିପଡ଼ିଛି। ଏହି ସ୍ଥଳେ ଝାଡ଼ଖଣ୍ଡର କଂଗ୍ରେସ ଏମ୍ପି ଧୀରଜ ସାହୁଙ୍କ ସମ୍ପର୍କୀୟଙ୍କ ନିକଟରୁ ଟଙ୍କା ଜବତ ହୋଇଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏନେଇ ମାଇକ୍ରୋବ୍ଲଗିଂ ସାଇଟ୍ ଏକ୍ସ’ରେ ବିରୋଧୀ ଦଳକୁ ଟାର୍ଗେଟ କରିଛନ୍ତି।
