କେନ୍ଦୁଝର,୧ା୧୦(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସହର ଡେଲି ମାର୍କେଟ ରାସ ପଡ଼ିଆ ସ୍ଥିତ ଶ୍ରୀଶ୍ରୀ ଦୁର୍ଗାଦେବୀ ପୀଠରେ ଦୁର୍ଗାପୂଜା କମିଟି ପକ୍ଷରୁ ଭାଇଚାରାର ଉତ୍ସବ ଦୁର୍ଗାପୂଜା ପାଇଁ ପ୍ରସ୍ତୁତି ସରିଛି। ୧୯୬୪ ମସିହାରେ ଆରମ୍ଭ ହୋଇଥିବା ଏହି ପୂଜା ୫୮ ବର୍ଷରେ ପଦାର୍ପଣ କରିଛି। ଏହାକୁ ଶାନ୍ତିଶୃଙ୍ଖଳାର ସହ ପାଳନ କରିବା ପାଇଁ ସ୍ଥାନୀୟ ବଣିକ ସଂଘ ତଥା ଅନ୍ୟାନ୍ୟ ପୂଜା କମିଟି ସହଯୋଗରେ ଦୁର୍ଗାପୂଜା କମିଟି ପକ୍ଷରୁ ଉଦ୍ୟମ କରାଯାଉଛି ା ଶନିବାରଠାରୁ ଷଷ୍ଠୀ ପୂଜା ଆରମ୍ଭ ହେଉଥିବା ବେଳେ ଚଳିତ ବର୍ଷ ମା’ଙ୍କ ସମେତ ପାର୍ଶ୍ୱ ଦେବଦେବୀ ରୁପା ମୁକୁଟରେ ଝଲସିବେ ବୋଲି କମିଟି ପକ୍ଷରୁ ସୂଚନା ଦିଆଯାଇଛି।
ପ୍ରକାରେ ଶନିବାର ତପୋ ଷଷ୍ଠୀ ପୂଜା ଆରମ୍ଭ ହୋଇ ମହାସପ୍ତମୀରେ ଦେବଶାସ୍ତ୍ର ପୂଜା, ଚଣ୍ଡୀପାଠ ଓ ହୋମ ଅନୁଷ୍ଠିତ ହେବ। ସେହିପରି ମହାଷ୍ଟମୀ ଦିନରେ ସନ୍ଧିପୂଜା, ବ୍ରତ ପୂଜା ଓ ଦୀପଦାନ ଅନୁଷ୍ଠିତ ହେବାକୁ ଥିବା ବେଳେ ମହାନବମୀରେ ଅନ୍ନପୂୂର୍ଣ୍ଣା ବେଶ ଧାରଣ ଏବଂ ବିଜୟା ଦଶମୀ ଦିନ ଅପରାଜିତା ପୂଜା, ଘଟ ବିସର୍ଜନ ଅନୁଷ୍ଠିତ ହେବ। ଦଶହରା ପରଦିନ ଭସାଣି ଯାତ୍ରା ଅନୁଷ୍ଠିତ ହୋଇଥାଏ। ଏହି ଅବସରରେ ଦୈନିକ ଭୋଗ ବଣ୍ଟନ ସାଙ୍ଗକୁ ଭଜନ ସମାରୋହ, ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ହେବ ବୋଲି କମିଟି ତରଫରୁ କୁହାଯାଇଛି। ଏଠାରେ ଦେବୀ ଲଡୁ ଭୋଗ ଓ ଅନ୍ନପୂର୍ଣ୍ଣା ବିତରଣ ବ୍ୟବସ୍ଥା ନିଆରା ବୋଲି ଯୁଗ୍ମ ସମ୍ପାଦକ ଅରବିନ୍ଦ ରାମ କହିଛନ୍ତି। ଭଦ୍ରକରୁ ମୂର୍ତ୍ତିକାର ଓ କଟକରୁ ମେଢ଼ ସାଜସଜ୍ଜା ପାଇଁ କାରିଗର ଲାଗିିଛନ୍ତି। ମୂର୍ତ୍ତି ଗଢ଼ାକାମ ସରିଥିବା ବେଳେ ମେଢ଼ ସାଜସଜ୍ଜା, ତୋରଣ ଆଦି ନିର୍ମାଣ ଶେଷ ପର୍ଯ୍ୟାୟରେ। ଚଳିତ ବର୍ଷ ଏହାକୁ ଅଧିକ ଆକର୍ଷଣୀୟ କରିବା ପାଇଁ କମିଟିର ସଦସ୍ୟମାନଙ୍କ ତତ୍ୱାବଧାନରେ ସମସ୍ତ କାର୍ଯ୍ୟ ସମ୍ପାଦନ ହେଉଛି ବୋଲି ସଭାପତି କୈଳାସ ପଣ୍ଡା କହିଛନ୍ତି।
