ପୁରୁଷୋତ୍ତମପୁର,୧୭।୩ (ସିମାଞ୍ଚଳ ମିଶ୍ର) : ଗଞ୍ଜାମର ପ୍ରସିଦ୍ଧ ଇଷ୍ଟଦେବୀ ମା’ ତାରାତାରିଣୀଙ୍କ ଚୈତ୍ର ମଙ୍ଗଳବାର ଯାତ୍ରା ଆସନ୍ତାକାଲିଠାରୁ ଆରମ୍ଭ ହେବ । ଏଥିନେଇ ଜିଲାପ୍ରଶାସନ ଓ ମନ୍ଦିର ପ୍ରଶାସନ ପକ୍ଷରୁ ସମସ୍ତ ପ୍ରକାରର ପ୍ରସ୍ତୁତି ସରିଛି। ଚଳିତ ବର୍ଷ ୪ଟି ମଙ୍ଗଳବାର ପାଳି ପଡୁଥିବାରୁ କିପରି ମା’ଙ୍କ ଯାତ୍ରା ସୁଚାରୁ ରୂପେ ହେବ ସେନେଇ ସେବାୟତସଂଘ ସଭାପତି ତପନରଣା ନିର୍ଦେଶ ଦେଇଛନ୍ତି । ଏହାସହ ଯାତ୍ରାରେ ଲକ୍ଷାଧିକ ଭକ୍ତଙ୍କ ସମାଗମ ହେବାକୁ ଥିବାବେଳେ ଜିଲାପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ପ୍ରଚଣ୍ଡ ଖରାଦାଉରୁ କିପରି ଭକ୍ତଙ୍କୁସୁରକ୍ଷା ଦିଆଯିବ ସେଥିନେଇ ନରସଂହପୁର ଛକଠାରୁ ମନ୍ଦିର ପର୍ଯ୍ୟନ୍ତ ଛାଇର ବ୍ୟବସ୍ଥା କରିବା, ଶିଶୁଙ୍କ ମୁଣ୍ଡନଲାଗି ୪ ଗୋଟି ମୁଣ୍ଡନ ଶାଳାର ନିର୍ମାଣ, ଭକ୍ତଙ୍କ ଖାଇବାଲାଗି ମାଗଣାରେ ଅନ୍ନପ୍ରସାଦର ବ୍ୟବସ୍ଥାକରାଯାଇଛି।
ଆଇନ ଶୃଙ୍ଖଳାକୁ ନିୟନ୍ତ୍ରଣ ଲାଗି ଦୁଇଜଣ ଅତିରିକ୍ତ ଏସପି, ୪ ଜଣ ଡିଏସପି,୧୦ ଜଣ ଇନ୍ସପେକ୍ଟର,୧୦୦ରୁ ଉର୍ଦ୍ଧ୍ୱ ଏସଆଇଙ୍କ ସମେତ କନଷ୍ଟେବଲ,ହୋମଗାର୍ଡ ଓ ୧୩ ପ୍ଲାଟୁନ ଫୋର୍ସ ମୁତୟନ ହୋଇଥିବା ବେଳେ ଚୋରି ଡକାୟତି ରୋକିବା ଲାଗି ମନ୍ଦିର ଭିତରେ ଓ ବାହାରେ ସାଧାପୋଷାକଧାରୀ ପୋଲିସ ମୁତୟନ ରହିଛନ୍ତି। ଏହାସହ ରୁଷିକୂଲ୍ୟା ନଦୀ ଘାଟରେ ଓ ଯାତ୍ରାସ୍ଥଳରେ ଅଗ୍ନିଶମ ବାହିନୀ ମୁତୟନ ରହିଛନ୍ତ। ଗଞ୍ଜାମ ଜିଲାପାଳ ଦିବ୍ୟଜ୍ୟୋତି ପରିଡା ଓ ଏସପି ଶୁଭେନ୍ଦୁ ପାତ୍ର ଆସି ତଦାରଖ କରିବାରେ ଲାଗିଛନ୍ତି।
