ଦିଗପହଣ୍ଡି,୫।୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଳକ ଓଡ଼ାସିଙ୍ଗି ଗ୍ରାମର ଅଧିଷ୍ଠାତ୍ରୀ ଦେବୀ ମା ’ ରମାଦେବୀ ବୁଢ଼ୀଠାକୁରାଣୀଙ୍କ ଯାତ୍ରା ମହୋତ୍ସବ ଶୁଭାରମ୍ଭ ହୋଇଛି। ଏହାକୁ ନେଇ ନାଚ ଗୀତରେ ଗାଁ ଦୁଲୁକୁଛି। ଯାତ୍ରା ପରିଚାଳନା କମିଟି ସଭାପତି ବାଲ ଗୋପାଳ ସାହୁ , ଉପସଭାପତି ପି . ରାମେଶ୍ୱର ପାତ୍ର , ସମ୍ପାଦକ ଜି . କ୍ଷେତ୍ର ମୋହନ ରେଡ୍ଡୀ , ସହ ସମ୍ପାଦକ ଅଜୟ ରେଡ୍ଡୀ , କୋଷାଧ୍ୟକ୍ଷ ଶଙ୍କର ସେଠୀ, ସ୍ଥାନୀୟ ସରପଞ୍ଚ ପ୍ରତିନିଧି ଦେବହରି ଗୈାଡ , ସେବାୟତ କାଳିଆ ପାତ୍ର, ଭଗବାନ ପାତ୍ର , ବସନ୍ତ ପାତ୍ର, ସୁଦାମ ଚରଣ ପାତ୍ର, ଯାତ୍ରା ପରିଚାଳନା କମିଟି ସଦସ୍ୟ ବୃନ୍ଦ ଏବଂ ବହୁ ସଂଖ୍ୟକ ଗ୍ରାମବାସୀଙ୍କ ଉପସ୍ଥିତିରେ ରବିବାର ବିଳମ୍ବିତ ସନ୍ଧ୍ୟାରେ ଗ୍ରାମର ବୁଢ଼ୀ ଠାକୁରାଣୀ ମନ୍ଦିରରେ ପୂର୍ବ ପ୍ରଚଳିତ ନୀତିକାନ୍ତି ଅନୁଯାୟୀ ପୂଜାର୍ଚ୍ଚନା କରାଯିବା ପରେ ଯାତ୍ରା ପାଇଁ ମା’ଙ୍କୁ ଆବାହନ କରାଯାଇଥିଲା। ମା’ଙ୍କ ମସ୍ତକରୁ ଫୁଲମଣ୍ଡା ଖସିବା ପରେ ତାହାକୁ ତାଟରେ ରଖାଯାଇ ବିଭିନ୍ନ ନୃତ୍ୟ ବାଦ୍ୟ ବାଜଣା ଆତସବାଜି ଶୋଭାଯାତ୍ରା ସହ ଗ୍ରାମ ପରିକ୍ରମା କରାଯାଇଥିଲା।
ଆନ୍ଧ୍ରପ୍ରଦେଶର କାବିଟି କାଳୀ ନୃତ୍ୟ, ରାଜମହେନ୍ଦ୍ରିର ନବଦୁର୍ଗା ନୃତ୍ୟ ପଟୁଆର, ପଦ୍ମନାଭପୁରର ବାଘନାଚ ଓ ଘୋଡାନାଚ ଶୋଭାଯାତ୍ରାରେ ସାମିଲ ଥିଲା। ଗ୍ରାମର ଉପସ୍ଥିତ ବହୁ ସଂଖ୍ୟକ ମହିଳା ଶ୍ରଦ୍ଧାଳୁଙ୍କ ହୁଳହୁଳି ବାଦ୍ୟ ବାଜଣାର ତାଳେ ତାଳେ ମା’ ବୁଢ଼ୀ ଠାକୁରାଣୀ ଅସ୍ଥାୟୀ ଯାତ୍ରା ପୀଠରେ ପ୍ରବେଶ କରିଥିଲେ। ସୋମବାର ସକାଳୁ ଅସ୍ଥାୟୀ ଯାତ୍ରା ପୀଠରେ ମା’ଙ୍କ ପୂଜାର୍ଚ୍ଚନା ଆରମ୍ଭ ହୋଇଥିବା ବେଳେ ଆଖପାଖ ଅଞ୍ଚଳରୁ ଆସିଥିବା ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ପରିଲକ୍ଷିତ ହୋଇଥିଲା।
ଦୀର୍ଘ ୧୨ ବର୍ଷ ପରେ ଗ୍ରାମରେ ଠାକୁରାଣୀ ଯାତ୍ରା ଅନୁଷ୍ଠିତ ହୋଇଥିବାରୁ ଗ୍ରାମବାସୀ ବେଶ ଉତ୍ସାହିତ ରହିଛନ୍ତି। ପ୍ରତ୍ୟେକ ଦିନ ଯାତ୍ରା ପୀଠରେ ସାଂସ୍କୃତିକ କାର୍ଯ୍ୟକ୍ରମ ସାଙ୍ଗକୁ ମିନା ବଜାର ଦୂରଦୂରାନ୍ତରୁ ଆସୁଥିବା ଶ୍ରଦ୍ଧାଳୁଙ୍କୁ ବେଶ ଆକର୍ଷଣ କରିବ ବୋଲି ଯାତ୍ରା କମିଟି କହିଛନ୍ତି। ଅପରପକ୍ଷରେ ଯାତ୍ରାର ଦ୍ବିତୀୟ ଦିବସ ସନ୍ଧ୍ୟାରେ ଓଡ଼ିଆ ଚଳଚ୍ଚିତ୍ର ଜଗତର ଅଭିନେତା ସବ୍ୟସାଚ୍ଚୀ ମହାନ୍ତି , କଣ୍ଠଶିଳ୍ପୀ କିଶୋର ବେହେରା ଏବଂ ଅସିନାଙ୍କ ସଙ୍ଗୀତରେ ଦର୍ଶକ ତାଳେ ତାଳେ ଝୁମିଥିଲେ । ଆସନ୍ତା ୧୧ ତାରିଖ ଦିନ ମାଁ ସ୍ବମନ୍ଦିରକୁ ପ୍ରତ୍ୟାଗମନ କରିବେ ବୋଲି ଯାତ୍ରା କମିଟି ପକ୍ଷରୁ ସୂଚନା ଦିଆଯାଇଛି । ଯାତ୍ରା କମିଟି ସଭାପତି ବାଲ ଗୋପାଳ ସାହୁ , ଉପସଭାପତି ପି . ରାମେଶର ପାତ୍ର , ସଂପାଦକ ଜି . କ୍ଷେତ୍ର ମୋହନ ରେଡ୍ଡୀ , ସହ ସଂପାଦକ ଅଜୟ ରେଡ୍ଡୀ , କୋଷାଧ୍ୟକ୍ଷ ଶଙ୍କର ସେଠୀ , ସ୍ଥାନୀୟ ସରପଞ୍ଚ ପ୍ରତିନିଧି ଦେବହରି ଗୈାଡ , ସେବକ କାଳିଆ ପାତ୍ର , ଭଗବାନ ପାତ୍ର , ବସନ୍ତ ପାତ୍ର , ସୁଦାମ ଚରଣ ପାତ୍ର , ସିତାମା ସମେତ ଯାତ୍ରା କମିଟି ସଦସ୍ୟ ଓ ଗ୍ରାମବାସୀ ଉପସ୍ଥିତ ରହି ପରିଚାଳନାରେ ସହଯୋଗ ପ୍ରଦାନ କରିଥିଲେ ।
