ନୂଆଦିଲ୍ଲୀ,୨୪।୩: ସୁରଟ କୋର୍ଟ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଅପରାଧିକ ମାନହାନୀ ମାମଲାରେ ଦୋଷୀ ସାବ୍ୟସ୍ତ କରି ଦୁଇ ବର୍ଷ କାରାଦଣ୍ଡରେ ଦଣ୍ଡିତ କରିବା ସହିତ ୧୫,୦୦୦ ଟଙ୍କା ଜୋରିମନା ମଧ୍ୟ କରିଛନ୍ତି। ରାହୁଲ ଦୋଷୀ ସାବ୍ୟସ୍ତ ହେବା ପରେ କେନ୍ଦ୍ର ମନ୍ତ୍ରୀ ଭୂପେନ୍ଦ୍ର ଯାଦବ କଂଗ୍ରେସକୁ ଟାର୍ଗେଟ୍ କରିଛନ୍ତି।
ଭୂପେନ୍ଦ୍ର ଯାଦବ ରାହୁଲ ଗାନ୍ଧୀଙ୍କୁ ନେଇ କହିଛନ୍ତି, ସେ ସମଗ୍ର ଓବିସି ସମ୍ପ୍ରଦାୟକୁ ଅପମାନିତ କରିଛନ୍ତି। ରାହୁଲଙ୍କ ଦଣ୍ଡ ଉପରେ କଂଗ୍ରେସ ପଦଯାତ୍ରା କରିବାକୁ ଯାଉଛି, ମୁଁ ଜାଣିବାକୁ ଚାହେଁ, ସେମାନେ କାହିଁକି ଏହି ପଦଯାତ୍ରା କରିବାକୁ ଚାହୁଁଛନ୍ତି। ଓବିସି ସମ୍ପ୍ରଦାୟକୁ ଅପମାନିତ କରିବାର ଅଧିକାର ଥିବାରୁ ସେ ଏହି ପଦଯାତ୍ରା କରିବାକୁ ଯାଉଛନ୍ତି କି? ମିଛ କହିବା ରାହୁଲଙ୍କ ଚରିତ୍ର ଏବଂ ଅହଙ୍କାରରେ ବଞ୍ଚିବା ତାଙ୍କ ପ୍ରକୃତି। କୋର୍ଟଙ୍କ ନିଷ୍ପତ୍ତି ପରେ ଦଳ ଏଭଳି ବିରୋଧ ପ୍ରଦର୍ଶନ କରିବା ଦେଶର ନ୍ୟାୟପାଳିକା ପାଇଁ ଅପମାନ ହେବ ନାହିଁ କି ବୋଲି ସେ ପ୍ରଶ୍ନ କରିଛନ୍ତି।
ସୂଚନାଯୋଗ୍ୟ, ୨୦୧୯ ଲୋକ ସଭା ନିର୍ବାଚନ ବେଳେ କର୍ନାଟକର କୋଲାରରେ ଏକ ରାଲିରେ ପ୍ରଚାର ବେଳେ ରାହୁଲ ମୋଦି ସରନେମ ବା ଉପନାମକୁ ନେଇ ଏକ ବିବାଦୀୟ ମନ୍ତବ୍ୟ ଦେଇଥିଲେ। ସବୁ ‘ମୋଦି’ ଚୋର ବୋଲି ମନ୍ତବ୍ୟ ଦେଇଥିଲେ ରାହୁଲ। ଏହାକୁ ନେଇ ଭାଜପା ବିଧାୟକ ତଥା ତତ୍କାଳିନ ପୂର୍ଣ୍ଣେସ୍ ମୋଦି କୋର୍ଟରେ ଦ୍ୱାରସ୍ଥ ହୋଇଥିଲେ। ଆଇପିସିର ଧାରା ୪୯୯, ୫୦୦ ଅନୁଯାୟୀ ରାହୁଲ ଗାନ୍ଧୀଙ୍କ ବିରୋଧରେ ଏକ ଅପରାଧ ପଞ୍ଜିକୃତ ହୋଇଥିଲା। ଏହି ମାମଲାରେ ସୁରତ ଜିଲା କୋର୍ଟ ରାହୁଲଙ୍କୁ ଦୋଷୀ ସାବ୍ୟସ୍ତ କରିଛନ୍ତି।
