ଥୁଆମୂଳ ରାମପୁର, ୨୩/୦୧(ଦୁର୍ଗା କୀର୍ତ୍ତି): ପୂର୍ତ୍ତ ବିଭାଗର ନିମ୍ନମାନର କାର୍ଯ୍ୟାଦେଶ ଏବଂ ଠିକାଦାରଙ୍କ ମନମୁଖୀ କାର୍ଯ୍ୟ ଯୋଗୁଁ ଥୁଆମୂଳ ରାମପୁର ଅଞ୍ଚଳରେ ଜନଅସନ୍ତୋଷ ତୀବ୍ର ହେବାରେ ଲାଗିଛି । ବିଶେଷ କରି କଲେଜ ଛକଠାରେ ନିର୍ମାଣାଧୀନ ମହୁଲପାଟଣା ରାସ୍ତାର ଅବସ୍ଥା ଶୋଚନୀୟ ହୋଇପଡ଼ିଛି । ପିଚୁ ପଡ଼ିବାର କିଛି ଘଣ୍ଟା ମଧ୍ୟରେ ଏହା ହାତ ମାରିଲେ ଛାଡ଼ି ଯାଉଥିବା ଦେଖିବାକୁ ମିଳିଛି। ରାସ୍ତା ନବୀକରଣ ନାଁରେ କୋଟି କୋଟି ଟଙ୍କାର ହରିଲୁଟ୍ ଚାଲିଥିବା ବେଳେ ବିଭାଗୀୟ କର୍ତ୍ତୃପକ୍ଷ ନିରବଦ୍ରଷ୍ଟା ସାଜିଛନ୍ତି। ରିପୋର୍ଟ ଅନୁଯାୟୀ, ଗୁଣପୁର, ଗୋପୀନାଥପୁର ଏବଂ ମହୁଲପାଟଣାକୁ ସଂଯୋଗ କରୁଥିବା ରାସ୍ତା କାମ ବର୍ଷ ବର୍ଷ ଧରି ଅଧାପନ୍ତରିଆ ପଡ଼ିରହିଛି। ଥାନା ଏବଂ ମେଡିକାଲ ଛକ ଭଳି ଗୁରୁତ୍ୱପୂର୍ଣ୍ଣ ସ୍ଥାନରେ ଡ୍ରେନେଜ୍ ବ୍ୟବସ୍ଥା ନଥିବାରୁ ସାମାନ୍ୟ ବର୍ଷାରେ ଏଠାରେ କୃତ୍ରିମ ବନ୍ୟା ସୃଷ୍ଟି ହେଉଛି। କେଉଁଠି ଡ୍ରେନ୍ ନିର୍ମାଣ ହୋଇଛି ତ, ତାହା ରାସ୍ତା ସ୍ତରଠାରୁ ଉପରେ ରହିଥିବାରୁ ପାଣି ନିଷ୍କାସନ ହୋଇପାରୁନାହିଁ। ଫଳରେ ନୂତନ ରାସ୍ତା ଅଳ୍ପ ଦିନରେ ନଷ୍ଟ ହେବା ସୁନିଶ୍ଚିତ।
ତାଳବନ୍ଧ ପଡ଼ା ଦେଇ ଯାଇଥିବା ମୁଖ୍ୟ ରାସ୍ତା କାର୍ଯ୍ୟ ଦୀର୍ଘ ୬ ମାସ ହେବ ଶେଷ ହେଉନାହିଁ। ନିର୍ମାଣରେ ଅହେତୁକ ବିଳମ୍ବ ଯୋଗୁଁ ଉଡ଼ୁଥିବା ଧୂଳିଧୂଆଁରେ ସ୍ଥାନୀୟ ବାସିନ୍ଦା ଅଣନିଶ୍ୱାସୀ ହୋଇପଡ଼ିଲେଣି । ଅନ୍ୟପଟେ ରାସ୍ତା ମଝିରେ ବିଦ୍ୟୁତ୍ ଖୁଣ୍ଟ ଓ ବଡ଼ ବଡ଼ ଗଛ ରହିଥିଲେ ମଧ୍ୟ ସେଗୁଡ଼ିକୁ ହଟା ନଯାଇ ପିଚୁ କାମ ସାରିଦିଆଯାଉଛି, ଯାହା ଦୁର୍ଘଟଣାକୁ ସିଧାସଳଖ ନିମନ୍ତ୍ରଣ କରୁଛି। ଏ ସମ୍ପର୍କରେ ପୂର୍ତ୍ତ ବିଭାଗ ଯନ୍ତ୍ରୀ ମିତିକେତନ୍ କାର୍ଜିଙ୍କୁ ପଚାରିବାରୁ ସେ କହିଛନ୍ତି ଯେ, “ରାସ୍ତା କଡ଼ରେ ଥିବା ବିଦ୍ୟୁତ୍ ଖୁଣ୍ଟ ଏବଂ ଗଛ ସବୁ ହଟାଇବା ପାଇଁ ପୂର୍ବରୁ ବିଦ୍ୟୁତ୍ ବିଭାଗକୁ ନିର୍ଦ୍ଦେଶ ଦିଆଯାଇଛି। ସେହିପରି ଯେଉଁ ସ୍ଥାନରେ ଡ୍ରେନର ଆବଶ୍ୟକତା ରହିଛି, ସେଠାରେ କିଭଳି ତୁରନ୍ତ ଡ୍ରେନ୍ ନିର୍ମାଣ କରାଯାଇପାରିବ ସେଥିପାଇଁ ଆମେ ଚେଷ୍ଟା କରୁଛୁ।” ଯନ୍ତ୍ରୀଙ୍କ ଏହି ସଫେଇ ସତ୍ତ୍ୱେ କ୍ଷେତ୍ର ସ୍ତରରେ କାର୍ଯ୍ୟର ମାନକୁ ନେଇ ସାଧାରଣରେ ଅସନ୍ତୋଷ କମିନାହିଁ। ପ୍ରଶାସନ ଏହି ଗମ୍ଭୀର ବିଷୟର ତୁରନ୍ତ ତଦନ୍ତ କରି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହୋଇଛି ।
