ଫାଙ୍କା ଗୁଳିଚାଳନା କରି ସୁନା ବ୍ୟବସାୟୀଙ୍କ ଠାରୁ ଲୁଟ୍‌
7:42 amSeptember 7, 2023September 7, 2023 / 08

କଟକ/କଟକ ସଦର, ୭ା୯(କାର୍ତ୍ତିକ ସାହୁ/ସୁଶାନ୍ତ କୁମାର ଜେନା)ସ୍ପଷ୍ଟ ଦିବାଲୋକରେ ଜଣେ ସୁନା ବ୍ୟବସାୟୀଙ୍କଠାରୁ ଲୁଟ୍‌ କରିଛନ୍ତି ୪ ଦୁର୍ବୃତ୍ତ। ଫାଙ୍କା ଗୁଳିଚାଳନା କରି ସେମାନେ ବ୍ୟବସାୟୀଙ୍କୁ ଭୟଭୀତ ମଧ୍ୟ କରିଛନ୍ତି। ବନ୍ଧୁକ ମୁନରେ ଲୁଟି ନେଇଛନ୍ତି ଲକ୍ଷାଧିକ ଟଙ୍କାର ସୁନା, ରୁପା ଅଳଙ୍କାର। ଏଭଳି ଏକ ଘଟଣା ଘଟିଛି କଟକ ଜିଲା କନ୍ଦରପୁର ଥାନା ଅନ୍ତର୍ଗତ ମତ୍ତଗଜପୁର ରେଲୱେ ଷ୍ଟେଶନ ନିକଟ ତାଳଦଣ୍ଡା କେନାଲ ବନ୍ଧ ରାସ୍ତାରେ। ଲୁଟ୍‌ର ଶିକାର ହୋଇଥିବା ବ୍ୟକ୍ତି ଜଣକ ହେଲେ କନ୍ଦରପୁର ଥାନା ଅନ୍ତର୍ଗତ ହାଟସାହିର ଅଲେଖ ପାତ୍ରଙ୍କ ପୁଅ ବିକି ଓରଫ ବିକାଶ ପାତ୍ର (୨୫)। ବିକାଶଙ୍କ ଅଭିଯୋଗ କ୍ରମେ ଏନେଇ କନ୍ଦରପୁର ଥାନାରେ ଏକ ମାମଲା (ନଂ. ୧୭୧/୨୦୨୩) ରୁଜୁ ହୋଇ ତଦନ୍ତ ଆରମ୍ଭ କରାଯାଇଥିବା ଆଇଆଇସି ବିପିନ୍‌ ବିହାରୀ ହୋତା ସୂଚନା ଦେଇଛନ୍ତି। ଆଗକୁ ପାର୍ବଣ ଆସୁଥିବାବେଳେ ଦୁର୍ବୃତ୍ତଙ୍କ ଏଭଳି କାଣ୍ଡ କମିଶନରେଟ ପୋଲିସକୁ ଖୋଲା ଚାଲେଞ୍ଜ ସଦୃଶ ହୋଇଥିବା ଚର୍ଚ୍ଚା ହେଉଛି।
ପୋଲିସ ସୂତ୍ରରୁ ପ୍ରକାଶ ଯେ, ବିକାଶ ପାତ୍ର ଗାଁ ଗହଳିରେ ସୁନା, ରୁପା ଗହଣା ବେପାର କରି ଗୁଜୁରାଣ ମେଣ୍ଟାନ୍ତି। ସବୁଦିନ ଭଳି ସେ ନିଜ ସ୍କୁଟିରେ ଅଳଙ୍କାର ବ୍ୟାଗ୍‌ ବାନ୍ଧି ବ୍ୟବସାୟ କରିବାକୁ କଟକ ଅଭିମୁଖେ ଯାଉଥିଲେ। ବୁଧବାର ପୂର୍ବାହ୍ନ ପ୍ରାୟ ୧୧ଟାରେ ୨ଟି ବାଇକ୍‌ରେ ୪ ଜଣ ଦୁର୍ବୃତ୍ତ ତାଙ୍କୁ ପିଛା କରିଥିଲେ। ମତ୍ତଗଜପୁର ରେଳ ଷ୍ଟେଶନ ନିକଟରେ ଦୁର୍ବୃତ୍ତମାନେ ତାଙ୍କ ସ୍କୁଟିକୁ ଗୋଇଠା ମାରିବାରୁ ବିକାଶ ଭାରସାମ୍ୟ ହରାଇ ତଳେ ପଡ଼ିଯାଇଥିଲେ। ଏହାର ସୁଯୋଗନେଇ ଦୁର୍ବୃତ୍ତମାନେ ତାଙ୍କ ଠାରୁ ୩ଟି ସୁନା ଚେନ(୩୦ଗ୍ରାମ), ରୁପା ପାଉଁଜି ସହ ଚାନ୍ଦି ଅଳଙ୍କାର ଓ ୨୫ ହଜାର ଟଙ୍କା ଛଡ଼ାଇ ନେଇଥିଲେ। ବିକାଶ ସେମାନଙ୍କୁ ବାଧା ଦେବାକୁ ଚେଷ୍ଟା କରିବାରୁ ସେମାନେ ୪ରାଉଣ୍ଡ ଫାଙ୍କା ଗୁଳିଚାଳନା କରି ଭୟଭୀତ କରିଥିଲେ। ଏହାପରେ ସେମାନେ କଟକ ଆଡ଼କୁ ଦ୍ରୁତ ଗତିରେ ପଳାଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚତ୍ ତନାଘନା କରିଛି। ଘଟଣାସ୍ଥଳରୁ ୩ ରାଉଣ୍ଡ ଗୁଳି ଓ ଗୋଟିଏ ଖୋକା ଜବତ ହୋଇଥିବା ଜଣାପଡ଼ିଛି। ଡିସିପି ପିନାକ ମିଶ୍ର କହିଛନ୍ତି, ମତ୍ତଗଜପୁରଠାରେ ଲୁଟ୍‌ ଘଟଣା ସମ୍ପର୍କରେ ସୂଚନା ମିଳିବା ପରେ ପୋଲିସ ଓ ସାଇଣ୍ଟିଫିକ୍‌ ଟିମ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଛନ୍ତି। ଏଥିସହ କମିଶନରେଟ ପୋଲିସର ବରିଷ୍ଠ ଅଧିକାରୀମାନେ ଘଟଣାସ୍ଥଳ ପରିଦର୍ଶନ କରି ମାମଲା ଅନୁଧ୍ୟାନ କରିଛନ୍ତି। ସ୍ପେଶାଲ ସ୍କ୍ବାଡ୍‌ ମଧ୍ୟ ଏଥିପାଇଁ ଗଠନ ହୋଇଛି। ଖୁବ୍‌ଶୀଘ୍ର ଅଭିଯୁକ୍ତମାନଙ୍କୁ ଧରିବାରେ ସଫଳ ହେବୁ ବୋଲି ଡିସିପି କହିଛନ୍ତି।
ଅପରାଧୀମାନେ ବିଭିନ୍ନ ଭାବରେ ନିଜର କାର୍ଯ୍ୟ ହାସଲ ପାଇଁ ପୋଲିସକୁ ଖୋଲା ଚ୍ୟାଲେଞ୍ଜ ଦେଇଆସିଥିବାବେଳେ ଏହାର ପୁନରାବୃତ୍ତି ଘଟିଛି। କିଛି ବର୍ଷ ପୂର୍ବେ ମତ୍ତଗଜପୁର ରେଲୱେ ଷ୍ଟେଶନ ନିକଟ ତାଳଦଣ୍ଡା କେନାଲ ବନ୍ଧ ରାସ୍ତାରେ ବହୁ ଭାବରେ ରାହାଜାନି ହେଉଥିଲା। ହେଲେ ପୋଲିସର ଘନଘନ ପାଟ୍ରୋଲିଂ ଓ ତୀକ୍ଷ୍ଣ ନଜର ଯୋଗୁଁ ତାହା ବନ୍ଦ ରହିଥିଲା। ହେଲେ ପୁଣି ଏଭଳି ଘଟଣା ଘଟିବା ପୋଲିସ କାର୍ଯ୍ୟଧାରାକୁ ଅଧିକ ଶାଣିତ କରିବାକୁ ଆହ୍ବାନ ବୋଲି ଚର୍ଚ୍ଚା ହେଉଛି। ପାର୍ବଣ ଋତୁ ପୂର୍ବରୁ ଅପରାଧୀମାନଙ୍କୁ କରାୟତ୍ତ ନ କଲେ କମିଶନରେଟ ପୋଲିସ ପାଇଁ ସହରର ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣ କରିବା କଷ୍ଟକର ହୋଇପଡ଼ିବ ବୋଲି ବୁଦ୍ଧିଜୀବୀ ଓ ସଚେତନ ନାଗରିକମାନେ ମତପ୍ରକାଶ କରିଛନ୍ତି।