ବାରିପଦା ଅଫିସ,୧୮।୪-ମୟୂରଭଞ୍ଜ ଜିଲା ବଡ଼ସାହି ତହସିଲ ଅଞ୍ଚଳରେ ଲଘୁ ଖଣିଜ ପଦାର୍ଥ ଲୁଟ୍ ହେଉଥିବା ନେଇ ବାରମ୍ବାର ଅଭିଯୋଗ ହୋଇଆସୁଛି। ଜାଲ ପରମିଟ୍ କିମ୍ବା ବେଆଇନ ଗଚ୍ଛିତ କରି ମାଫିଆମାନେ ଖଣିଜ ଚାଲାଣ କରୁଥିବା ବେଳେ ରାଜସ୍ବ ବିଭାଗ ନୀରବଦ୍ରଷ୍ଟା ସାଜିଛି। ଲକ୍ଷ ଲକ୍ଷ ଟଙ୍କାର ଜରିମାନା କରିବା ପରିବର୍ତ୍ତେ ମାତ୍ର ସ୍ବଳ୍ପ ଜରିମାନା କରି ବାଲି ଚାଲାଣକୁ ପ୍ରୋତ୍ସାହିତ କରାଯାଉଥିବା ନେଇ ଜିଲାପାଳ ଓ ରାଜସ୍ବ ମନ୍ତ୍ରୀଙ୍କ ନିକଟରେ ଗ୍ରାମବାସୀ ଅଭିଯୋଗ କରିଛନ୍ତି।
ଘଟଣାରୁ ପ୍ରକାଶ, ବୁଢାବଳଙ୍ଗ ନଦୀର ଆରପଟା ବାଲି ଖାଦାନ ତହସିଲ କାର୍ଯ୍ୟାଳୟଠାରୁ ମାତ୍ର ୨କି.ମି. ଦୂରରେ ଅବସ୍ଥିତ। ଏହି ଖାଦାନଠାରୁ ମାତ୍ର ୨ଶହ ମିଟର ଦୂରରେ ବେଆଇନ ଭାବେ ବାଲି ଗଚ୍ଛିତ କରି ଚୋରାରେ ବିକ୍ରି କରାଯାଉଥିଲା। ଗ୍ରାମବାସୀଙ୍କଠାରୁ ଅଭିଯୋଗ ପାଇ ତହସିଲଦାର ମମତାଜ ମହାରଣା ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ଗଚ୍ଛିତ ହୋଇଥିବା ଏକ ହଜାର ସିୟୁଏମ୍ ବାଲିକୁ ମାତ୍ର ୯୫ହଜାର ଟଙ୍କା ଜରିମାନା ଓ ରେଡକ୍ରସ ବାବଦକୁ ୫ହଜାର ମିଶାଇ ଏକ ଲକ୍ଷ ଟଙ୍କା ଜରିମାନା କରିଥିଲେ। ସେହି ବାଲିିକୁ ୨ମାସ ମଧ୍ୟରେ ଉଠାଇବାକୁ ତହସିଲ କାର୍ଯ୍ୟାଳୟ ଚିଠି ନଂ. ୮୫୨ ତା୭।୪।୨୧ରିଖରେ ନିର୍ଦ୍ଦେଶ ଦେଇଛନ୍ତି। ଉକ୍ତ ଚିଠିକୁ ନକଲ କରି ଜରିମାନା କରାଯାଇଥିବା ବ୍ୟକ୍ତିଙ୍କ ସ୍ବାକ୍ଷରରେ ଡମ୍ପର ଓ ଟ୍ରକ ଯୋଗେ ବାଲିକୁ ସ୍ଥାନାନ୍ତର ପୂର୍ବକ ବିକ୍ରି କରାଯାଉଛି। ଗୋଟିଏପଟେ ଗଚ୍ଛିତ ବାଲିରୁ ବିକ୍ରି କରାଯାଉଥିବା ବେଳେ ସେହି ସ୍ଥାନରେ ଟ୍ରାକ୍ଟର ଯୋଗେ ନଦୀରୁ ବାଲି ଉତ୍ତୋଳନ କରାଯାଇ ପୁନର୍ବାର ଗଚ୍ଛିତ କରାଯାଉଛି। ତେବେ ଦୁଇ ମାସ ମଧ୍ୟରେ ହଜାର ହଜାର ସିୟୁଏମ ବାଲିକୁ ଫାଇନ ଦର୍ଶାଇ ଲୁଟ୍ କରାଯାଉଥିବା ନେଇ ଗ୍ରାମବାସୀ ବୁଧିଆ ସିଂ, ଶିବୁ ନାଏକ, ଗଣେଶ ଟୁଡୁ ପ୍ରମୁଖ ଅଭିଯୋଗ କରିଛନ୍ତି ା ଅନ୍ୟ ପକ୍ଷେ ଗରିବ ଲୋକଟି ବିଜୁ ପକ୍କା ଘର ପାଇଁ ବାଲି ନେଉଥିବା ବେଳେ ଟ୍ରାକ୍ଟରରେ ଥିବା ୩ସିୟୁଏମ ବାଲି ପ୍ରତି ୧୦ରୁ ୨୦ହଜାର ଟଙ୍କା ଜରିମାନା ଆଦାୟ କରାଯାଉଛି। ତେବେ ଆରପଟା ସୈରାତର ପ୍ରତି ସିୟୁଏମ ବାଲିର ଦାମ ୮୫୫ ଟଙ୍କା ଥିବା ବେଳେ ଅନ୍ୟାନ୍ୟ ଜରିମାନା ସହ ୧୧ଶହ ଟଙ୍କା ରହିଛି। ବେଆଇନ ଉତ୍ତୋଳନକାରୀଙ୍କ ସହ ସଲାସୁତୁରା କରି ଗଚ୍ଛିତ ବାଲିର ପରିମାଣକୁ ଦୃଷ୍ଟିରେ ରଖିଲେ ତାହା ୧୧ଲକ୍ଷ ଟଙ୍କାରୁ ଊର୍ଦ୍ଧ୍ୱ ହେବ ବୋଲି ଆକଳନ କରାଯାଇଛି। ଅଧିକାରୀଙ୍କ ବାଲିମାଫିଆଙ୍କ କାର୍ଯ୍ୟକଳାପକୁ ନେଇ ସରକାରଙ୍କ କୋଟି କୋଟି ଟଙ୍କା ରାଜସ୍ବହାନୀ ହେଉଛି। ଏ ସମ୍ପର୍କରେ ତହସିଲଦାର ମହାରଣା କହିଛନ୍ତି, ଜବତ ବାଲିକୁ ସ୍ଥାନାନ୍ତର କରିବା ପାଇଁ ନିର୍ଦ୍ଦେଶ ଦିଆଯାଇଛି ା ସରକାରୀ ନିୟମ ଅନୁଯାୟୀ ଜରିମାନା ଆଦାୟ କରାଯାଇଛି।
