କେନ୍ଦୁଝର,(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ପଣ୍ଡାପଡ଼ା ଥାନାରୁ ପ୍ରାୟ ଅଧ କି.ମି. ଦୂରରେ ସୋମବାର ରାତିରେ ଜଣେ ଗହଣା ବ୍ୟବସାୟୀ ସଞ୍ଜୟ ରାଣାଙ୍କ ଘରୁ ଟଙ୍କା ଓ ସୁନା ରୂପା ଗହଣା ଲୁଟ୍ ହୋଇଛି। ଏ ନେଇ ଉକ୍ତ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି।
ଖବରପାଇ ପୋଲିସ ତନାଘନା ଆରମ୍ଭ କରିଛି। ତେବେ ଲୁଟେରାଙ୍କ ସନ୍ଧାନ ମିଳି ନାହିଁ। ଲୁଟ୍ ପରେ ଦୁର୍ବୃତ୍ତମାନେ ଥାନା ସମ୍ମୁଖ ଦେଇ ହରିଚନ୍ଦନପୁର ଆଡ଼କୁ ପଳାଇ ଯାଇଥିବା ସୂଚନା ମିଳିଛି। ସକାଳେ ପୋଲିସ ବିଶେଷଜ୍ଞ ଟିମ୍ ପହଞ୍ଚି ତଦନ୍ତ କରିଛନ୍ତି। ଏଭଳି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି।ଲୁଟ ପରିମାଣ ପାଖାପାଖି ୭୦ ଲକ୍ଷରୁ ଊର୍ଦ୍ଧ୍ୱ ହେବ ବୋଲି ଅଭିଯୋଗ ହେଉଛି। ସେଥିରୁ ଜଣେ ବ୍ୟବସାୟୀଙ୍କୁ ଦେବାପାଇଁ ରଖିଥିବା ପ୍ରାୟ ୬ ଲକ୍ଷ ଟଙ୍କା ମଧ୍ୟ ଲୁଟ୍ ହୋଇଛି।
ସ୍ଥାନୀୟ ଲୋକଙ୍କ କହିବା ଅନୁଯାୟୀ, ସୋମବାର ବ୍ୟବସାୟୀ ଜଣଙ୍କ ଦୋକାନ ବନ୍ଦ କରି ସୁନା ଓ ରୂପା ଗହଣା ଏକ ବ୍ୟାଗରେ ଧରି ସବୁ ଦିନ ଭଳି ଘରକୁ ଯାଇଥିଲେ। ଘରେ ବ୍ୟାଗ ରଖି ମାର୍କେଟ ଆସିଥିଲେ। ତାଙ୍କୁ ପିଛା କରିଥିବା ଦୁର୍ବୃତ୍ତମାନେ କିଛି ସମୟ ପରେ ଘରେ ପହଞ୍ଚି କବାଟ ବାଡେଇ ଥିଲେ। ସଞ୍ଜୟଙ୍କ ମା’ କବାଟ ଖୋଲିବା ପରେ ତିନି ଜଣ ଦୁର୍ବୃତ୍ତ ବନ୍ଧୁକ ଦେଖାଇ ଭୟଭୀତ କରି ଭିତରକୁ ପଶି ତାଙ୍କ ଓ ଗହଣା ଥିବା ବ୍ୟାଗ ତଥା ଘର୍ ଲକର ଖୋଲି ସେଠାର ଥିବା ଟଙ୍କା ଆଦି ନେଇଯାଇଥିଲେ। ସେମାନେ ଲୁଟ୍କରି ଚାରି ଚକିଆ ଗାଡ଼ିରେ ଫେରାର ହୋଇଯାଇଥିଲେ। ଏଣୁ ଗାଡ଼ିରେ ଚାଳକ ଥିଲେ ନା ନିଜେ ଲୁଟ କରି ଗାଡ଼ି ଧରି ଫେରାର ହୋଇଗଲେ ତାହା ଜଣା ପଡିନାହିଁ। ସେମାନେ ହିନ୍ଦୀରେ କଥା ହେଉଥିଲେ ବୋଲି ସୂଚନା ମିଳିଛି। ଖବରପାଇ ସମସ୍ତ ପୋଲିସ ଥାନାକୁ ଜଣାଇ ରାସ୍ତା ବନ୍ଦି କରି ଛାନ୍ଭିନ କରିଥିଲେ ହେଁ ଦୁର୍ବୃତ୍ତମାନେ ଫେରାର ହୋଇ ଯାଇଥିଲେ।
