ଉମରକୋଟ, ୩୧।୧(ଡି.ଏନ୍.ଏ.): ସ୍କୁଲରେ ଶିକ୍ଷକ ନିଯୁକ୍ତି ଓ ମଧ୍ୟାହ୍ନ ଭୋଜନ ବ୍ୟବସ୍ଥା କରାଇବା ଦାବିରେ ନବରଙ୍ଗପୁର ଜିଲା ଉମରକୋଟ ବ୍ଲକ ରାଜପୁର ଏବଂ ଡଙ୍ଗରୀଗୁଡ଼ା ଗ୍ରାମବାସୀ ଡଙ୍ଗରିଗୁଡ଼ାସ୍ଥିତ ସରକାରୀ ଉନ୍ନୀତ ବିଦ୍ୟାଳୟରେ ତାଲା ପକାଇଛନ୍ତି। ସମସ୍ୟା ସମାଧାନ ନ ହେବା ଯାଏ ତାଲା ଖୋଲାଯିବ ନାହିଁ ବୋଲି ସେମାନେ କହିଥିଲେ। ସିଆର୍ସିସି ଘଟଣାସ୍ଥଳରେ ପହଞ୍ଚତ୍ ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିଥିଲେ। ମଙ୍ଗଳବାର ଘଟଣା ସମ୍ପର୍କରେ ଡିଇଓଙ୍କୁ ଜଣାଇବା ସହ ତୁରନ୍ତ ସମସ୍ୟା ସମାଧାନ କରାଯିବ ବୋଲି ସେ ପ୍ରତିଶ୍ରୁତି ଦେଇଥିଲେ। ସୋମବାର ପିଲାଙ୍କ ପାଠପଢ଼ା ବନ୍ଦ ଥିଲା।
ସୂଚନାନୁଯାୟୀ ରାଜପୁରସ୍ଥିତ ପ୍ରାଥମିକ ବିଦ୍ୟାଳୟରେ ପ୍ରଥମ ରୁ ପଞ୍ଚମ ଯାଏ ୧୧୫ ପିଲା ପଢ଼ନ୍ତି। ୨ କିଲୋମିଟର ଦୂରରେ ଥିବା ଡଙ୍ଗରୀଗୁଡା ସରକାରୀ ଉନ୍ନୀତ ବିଦ୍ୟାଳୟ (୫-ଟି)ରେ ଷଷ୍ଠ ରୁ ଦଶମ ପର୍ଯ୍ୟନ୍ତ ୨୦୧ ପିଲା ପାଠ ପଢୁଛନ୍ତି। ଡଙ୍ଗରୀଗୁଡ଼ା ସ୍କୁଲ ସେପ୍ଟେମ୍ବରରେ ଆରମ୍ଭ ହୋଇଛି। ଶିକ୍ଷା ବିଭାଗ ପକ୍ଷରୁ ଦୁଇଟି ସ୍କୁଲକୁ ମିଶାଇବାକୁ ଚେଷ୍ଟା କରାଯାଇଥିଲା। ରାଜପୁର ଗ୍ରାମବାସୀ କିନ୍ତୁ ଏହାକୁ ବିରୋଧ କରିଥିଲେ। ସ୍ଥାୟୀ ସମସ୍ୟା ସମାଧାନ ନ ହେବା ଯାଏ ୫-ଟି ବିଦ୍ୟାଳୟରେ ପଢ଼ୁଥିବା ଷଷ୍ଠରୁ ଅଷ୍ଟମ ଶ୍ରେଣୀର ୧୧୭ ଜଣ ପିଲା ମଧ୍ୟାହ୍ନ ଭୋଜନ ପାଇଁ ରାଜପୁର ପ୍ରାଥମିକ ବିଦ୍ୟାଳୟକୁ ଯିବେ ବୋଲି ବିଇଓ କହିଥିଲେ। ଗ୍ରାମବାସୀ କିନ୍ତୁ ଏହାକୁ ବିରୋଧ କରିଥିଲେ। ପିଲାମାନେ ୨କିମି ଯିବା ଆସିବା କରିବା ବିପଦପୂର୍ଣ୍ଣ। ତେଣୁ ଉକ୍ତ ବିଦ୍ୟାଳୟରେ ହିଁ ଷଷ୍ଠରୁ ଅଷ୍ଟମ ପିଲାଙ୍କ ପାଇଁ ଖାଇବା ବ୍ୟବସ୍ଥା କରିବାକୁ ସେମାନେ ଦାବି କରିଥିଲେ। ବିଦ୍ୟାଳୟରେ ସ୍ଥାୟୀ ପ୍ରଧାନଶିକ୍ଷକ ନାହାନ୍ତି, କିଛି ଦିନ ତଳେ ହିନ୍ଦୀ ଓ କ୍ରୀଡ଼ା ଶିକ୍ଷକଙ୍କୁ ଅନ୍ୟତ୍ର ବଦଳି କରିଦିଆଯାଇଛି। ଫଳରେ ପିଲାଙ୍କ ପାଠ ପଢ଼ାରେ ଅନେକ ସମସ୍ୟା ଦେଖିବାକୁ ମିଳୁଛି ବୋଲି ଗ୍ରାମବାସୀ ଅଭିଯୋଗ କରିଥିଲେ। ଏହାର ସ୍ଥାୟୀ ସମାଧାନ ଦାବିରେ ଅଭିଭାବକ ଓ ଗ୍ରାମବାସୀ ସ୍କୁଲରେ ତାଲା ପକାଇଥିଲେ। ଏ ନେଇ ବିଇଓ ବିକାଶ ଚନ୍ଦ୍ର ସରକାରଙ୍କୁ ପଚାରିବାରୁ ପ୍ରଧାନ ଶିକ୍ଷକ ରଜନୀକାନ୍ତ ମାନାଙ୍କୁ ଗ୍ରାମବାସୀ ଓ ସରପଞ୍ଚଙ୍କ ସହ କଥା ହୋଇ ସମସ୍ୟା ସମାଧାନ ପାଇଁ କହିଥିଲି। ସମସ୍ୟା ସମାଧାନ ହୋଇ ଯାଇଥିବ ଭାବିଥିଲି। ମୁଁ ପ୍ରଧାନ ଶିକ୍ଷକ ଓ ଗ୍ରାମବାସୀଙ୍କ ସହ କଥା ହୋଇ ସମାଧାନ କରିବି ବୋଲି ସେ କହିଛନ୍ତି। ଶିକ୍ଷକ ନିଯୁକ୍ତି ସରକାରଙ୍କ ଅଧୀନରେ। ଡିଇଓଙ୍କୁ ଜଣାଇ ଶୀଘ୍ର ସମାଧାନ ନେଇ ଚେଷ୍ଟା କରିବି ବୋଲି ସେ କହିଛନ୍ତି।
