ନୂଆଦିଲ୍ଲୀ/ଢାକା,୨୯।୧୦: ବାଂଲାଦେଶର ବହିଷ୍କୃତ ପ୍ରଧାନମନ୍ତ୍ରୀ ଶେଖ ହସିନା ଚେତାବନୀ ଦେଇଛନ୍ତି ଯେ ତାଙ୍କ ଦଳ ଆୱାମୀ ଲିଗ୍ ଆସନ୍ତା ବର୍ଷର ଜାତୀୟ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ବାରଣ ହେବା ପରେ ଦଳର ଲକ୍ଷ ଲକ୍ଷ ସମର୍ଥକ ନିର୍ବାଚନକୁ ବର୍ଜନ କରିବେ।
ନୂଆଦିଲ୍ଲୀରେ ନିର୍ବାସନରେ ଥିବା ୭୮ ବର୍ଷୀୟା ହସିନା ବୁଧବାର ରଏଟର୍ସକୁ ଇମେଲ୍ ମାଧ୍ୟମରେ ଦେଇଥିବା ଉତ୍ତରରେ କହିଛନ୍ତି ଯେ ତାଙ୍କ ଦଳକୁ ବାଦ୍ ଦେଇ ଗଠିତ ହେବାକୁ ଥିବା କୌଣସି ସରକାର ଅଧୀନରେ ସେ ବାଂଲାଦେଶ ଫେରିବେ ନାହିଁ। ୨୦୨୪ ଅଗଷ୍ଟରେ ଏକ ଛାତ୍ର ଆନ୍ଦୋଳନ ପରେ କ୍ଷମତାଚ୍ୟୁତ ହେବା ପରେ ସେ ଭାରତରେ ରହିବାର ଯୋଜନା କରିଛନ୍ତି।
ନୋବେଲ ଶାନ୍ତି ପୁରସ୍କାର ବିଜେତା ମହମ୍ମଦ ୟୁନୁସ୍ଙ୍କ ନେତୃତ୍ୱରେ ଗଠିତ ଅନ୍ତରୀଣ ସରକାର ହସିନାଙ୍କୁ କ୍ଷମତାଚ୍ୟୁତ କରିବା ପରଠାରୁ ଦେଶରେ ଶାସନ କରୁଛନ୍ତି ଏବଂ ଆସନ୍ତା ଫେବୃଆରୀରେ ନିର୍ବାଚନ କରିବାକୁ ପ୍ରତିଶ୍ରୁତି ଦେଇଛନ୍ତି। ତେବେ, ନିର୍ବାଚନ କମିଶନ ମେ ମାସରେ ଆୱାମୀ ଲିଗ୍ର ପଞ୍ଜୀକରଣକୁ ଜାତୀୟ ସୁରକ୍ଷା ବିପଦ ଏବଂ ଦଳର ବରିଷ୍ଠ ନେତାଙ୍କ ବିରୋଧରେ ଚାଲିଥିବା ଯୁଦ୍ଧ ଅପରାଧ ତଦନ୍ତ ଆଧାରରେ ସସପେଣ୍ଡ୍ କରିଦେଇଛନ୍ତି। ଏହାପୂର୍ବରୁ ୟୁନୁସ୍ଙ୍କ ସରକାର ଦଳର ସମସ୍ତ କାର୍ଯ୍ୟକଳାପ ଉପରେ ନିଷେଧାଦେଶ ଲଗାଇଥିଲେ।
ହସିନା କହିଛନ୍ତି, “ଆୱାମୀ ଲିଗ୍ ଉପରେ ଲାଗିଥିବା ନିଷେଧାଦେଶ କେବଳ ଅନ୍ୟାୟ ନୁହେଁ, ଏହା ଆତ୍ମଘାତୀ।” ସେ ଗୁରୁତ୍ୱାରୋପ କରିଛନ୍ତି ଯେ ପରବର୍ତ୍ତୀ ସରକାର ପାଇଁ ନିର୍ବାଚନୀ ବୈଧତା ଆବଶ୍ୟକ। “ଲକ୍ଷ ଲକ୍ଷ ଲୋକ ଆୱାମୀ ଲିଗ୍କୁ ସମର୍ଥନ କରୁଛନ୍ତି, ତେଣୁ ଯଦି ସେମାନେ ନିର୍ବାଚନରେ ଭୋଟ୍ ନ ଦିଅନ୍ତି, ତେବେ ରାଜନୈତିକ ବ୍ୟବସ୍ଥା କାର୍ଯ୍ୟ କରିବ ନାହିଁ। ଆମେ ଏପର୍ଯ୍ୟନ୍ତ ଆଶା ରଖିଛୁ ଯେ ସାଧାରଣ ବୁଦ୍ଧିର ବିଜୟ ହେବ ଏବଂ ଆମକୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଅନୁମତି ମିଳିବ,” ସେ କହିଛନ୍ତି।
୧୫ ବର୍ଷ ଧରି କ୍ଷମତାରେ ରହି ବାଂଲାଦେଶର ଅର୍ଥନୀତିକୁ ପରିବର୍ତ୍ତନ କରିଥିବା ହସିନାଙ୍କୁ ମାନବାଧିକାର ଉଲ୍ଲଂଘନ ଏବଂ ବିରୋଧୀଙ୍କୁ ଦମନ କରିବାର ଅଭିଯୋଗର ସାମ୍ନା କରିବାକୁ ପଡିଛି। ତାଙ୍କ ବିରୋଧରେ ଛାତ୍ର ଆନ୍ଦୋଳନ ସମୟରେ ହୋଇଥିବା ହିଂସାତ୍ମକ ଦମନ ସମ୍ପର୍କରେ ମାନବତା ବିରୋଧୀ ଅପରାଧ ମାମଲାର ଶୁଣାଣି ସରିଛି ଏବଂ ନଭେମ୍ବର ୧୩ ରେ ରାୟ ଆସିବାର ସମ୍ଭାବନା ଅଛି। ସେ ଏହି ଅଭିଯୋଗକୁ ‘ରାଜନୈତିକ ଉଦ୍ଦେଶ୍ୟ ପ୍ରଣୋଦିତ’ ବୋଲି କହି ଖଣ୍ଡନ କରିଛନ୍ତି।
ନିର୍ବାସନରେ ଦିଲ୍ଲୀରେ ସ୍ୱାଧୀନ ଭାବରେ ରହୁଥିବା ହସିନା କହିଛନ୍ତି ଯେ, “ଯଦି ସେଠାରେ ସରକାର ବୈଧ ହୁଏ, ସମ୍ବିଧାନକୁ ସମ୍ମାନ ଦିଆଯାଏ ଏବଂ ଆଇନ ଶୃଙ୍ଖଳା ପ୍ରକୃତରେ ପ୍ରଚଳନ ହୁଏ, ତେବେ ମୁଁ ନିଶ୍ଚୟ ଘରକୁ ଫେରିବାକୁ ଭଲ ପାଇବି।”
