ବରଗଡ଼,୩୦।୧(ପ୍ରେମାନନ୍ଦ ଖମାରୀ):ରାଜ୍ୟ ସରକାର ଜୀବିକା ମିଶନ ଇସି(ଏକ୍ଜିକ୍ୟୁଟିଭ କମିଟି) ସଂଘ ପୁନର୍ଗଠନ ନିଷ୍ପତ୍ତି ନେବା ପରେ ଆନ୍ଦୋଳନ ତେଜି ଉଠିଛି। ଏ ନେଇ ବୁଧବାର ନିଖିଳ ଓଡ଼ିଶା ଜୀବିକା ମିଶନ ଇସି ସଂଘ, ବରଗଡ଼ ଜିଲା ଶାଖା ପକ୍ଷରୁ ଜିଲାପାଳଙ୍କ କାର୍ଯ୍ୟାଳୟ ଘେରାଉ କରାଯାଉଥିଲା। ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ାଙ୍କ ଉଦ୍ଦେଶ୍ୟରେ ସଂଘ ପକ୍ଷରୁ ଜିଲାପାଳ ଆଦିତ୍ୟ ଗୋୟଲଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା। ଅତିରିକ୍ତ ଜିଲାପାଳ ମଧୁଛନ୍ଦା ସାହୁ ଦାବିପତ୍ର ଗ୍ରହଣ କରିଥିଲେ। ଦାବିପତ୍ରରେ ଜୀବିକା ମିଶନ ଇସି ସଂଘ ପୁନର୍ଗଠନ ନିଷ୍ପତ୍ତି ପ୍ରତ୍ୟାହାର ସମେତ ୧୧ଦଫା ଦାବି କରାଯାଇଛି। ଦାବି ପୂରଣ ନ ହେଲେ ଆସନ୍ତା ଫେବୃୟାରୀ ୧୩ରୁ ବିଧାନସଭା ସମ୍ମୁଖରେ ଅନିର୍ଦ୍ଦିଷ୍ଟ କାଳ ଯାଏ ଧାରଣା ଦେବା ପାଇଁ ସଂଘ ପକ୍ଷରୁ ଚେତାବନୀ ଦିଆଯାଇଛି।
ଦାବିପତ୍ରରେ ଉଲ୍ଲେଖ ରହିଛି, ମିଶନ ଶକ୍ତି ଏବଂ ଜୀବିକା ମିଶନ ଅଧୀନରେ କାର୍ଯ୍ୟରତ ସମସ୍ତ ଇସିକୁ ପୁନର୍ଗଠନ(ରିଷ୍ଟ୍ରକଚରିଂ) ଆଳରେ ବାହାର କରିବା ପାଇଁ ମସୁଧା ଚାଲିଛି। ଗତ ୮ତାରିଖ ଓଡ଼ିଶା ଜୀବିକା ମିଶନର ନିର୍ଦ୍ଦେଶକ ତଥା ସିଇଓ ନିର୍ଦ୍ଦେଶ ଦେବା ପରେ ଗତ ୨୨ତାରିଖରେ ମିଶନ ଶକ୍ତି ସଚିବ ତଥା କମିଶନର ରାଜ୍ୟର ସମସ୍ତ ଇସିକୁ ହଟାଇବା ପାଇଁ ଗାଇଡ୍ଲାଇନ କରାଯିବା ସହ ଏଥିପାଇଁ ଜିଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି। ଏହାର ପ୍ରତିବାଦରେ ବହୁ ହଜାର ସଂଖ୍ୟାରେ ଜିଲାର ସମସ୍ତ ଇସି ସଦସ୍ୟା ଏକ ବିକ୍ଷୋଭ ଶୋଭାଯାତ୍ରାରେ ଜିଲାପାଳଙ୍କ କାର୍ଯ୍ୟାଳୟରେ ପହଞ୍ଚିଥିଲେ। ସେମାନେ ପହଞ୍ଚିବା ପୂର୍ବରୁ ଜିଲାପାଳଙ୍କ କାର୍ଯ୍ୟାଳୟର ମୁଖ୍ୟ ଫାଟକକୁ ବନ୍ଦକରି ଦିଆଯାଇଥିଲା।
ଫଳରେ ଇସି ସଦସ୍ୟାମାନେ ଜିଲାପାଳଙ୍କ କାର୍ଯ୍ୟାଳୟ ଫାଟକ ସମ୍ମୁଖରେ ବିକ୍ଷୋଭ ପ୍ରଦର୍ଶନ, ନାରାବାଜି ସହିତ ପ୍ରତିବାଦ ସଭା କରିଥିଲେ। ଇସି ପୁନର୍ଗଠନ ପ୍ରତ୍ୟାହାର କରି ସ୍ଥାୟୀ ନିଯୁକ୍ତି, ଭତ୍ତା ବୃଦ୍ଧି, ସେପ୍ଟେମ୍ବରରୁ ବକେୟା ରହିଥିବା ଭତ୍ତା ପ୍ରଦାନ, କମ୍ୟୁନିଟି ଷ୍ଟାଫ୍ଙ୍କ ଭତ୍ତା ପ୍ରଦାନ, ନିର୍ବାଚନ ପୂର୍ବରୁ ସରକାର ଦେଇଥିବା ପ୍ରତିଶ୍ରୁତି ଅନୁଯାୟୀ, ମହିଳା ସ୍ବୟଂ ସହାୟକ ଗୋଷ୍ଠୀର ପ୍ରତ୍ୟେକ ସଦସ୍ୟାଙ୍କୁ ମାସିକ ୧ହଜାର ଟଙ୍କାର ସଶକ୍ତୀକରଣ ଭତ୍ତା ପ୍ରଦାନ, ଭାରତୀୟ ଶ୍ରମ ସମ୍ମିଳନୀର ସୁପାରିସ ଅନୁସାରେ ସମସ୍ତ ଇସି, ସପୋର୍ଟ ଷ୍ଟାଫ୍ ଭଳି ୱାର୍କରଙ୍କୁ ୱାର୍କର ମାନ୍ୟତା ସହିତ ଇପିଏଫ୍, ଇଏସ୍ଆଇ ଏବଂ ବିଭିନ୍ନ ସାମାଜିକ ନିରାପତ୍ତା ଭତ୍ତା ପ୍ରଦାନ କରିବାକୁ ଦାବିପତ୍ରରେ ଉଲ୍ଲେଖ କରାଯାଇଛି।
ନିଖିଳ ଓଡ଼ିଶା ଜୀବିକା ମିଶନ ଇସି ସଂଘର ଜିଲା ସଭାନେତ୍ରୀ ଝରଣା ଦାଶଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରତିବାଦ ସଭାରେ ସଂଘର ସଭାପତି ଜୟନ୍ତ ଦାସ, ମହିଳା ସଭାନେତ୍ରୀ ସତ୍ୟଭାମା ରଥ, କୃଷକ ନେତା ରମେଶ ମହାପାତ୍ର ପ୍ରମୁଖ ଉଦ୍ବୋଧନ ଦେଇ ରାଜ୍ୟ ସରକାରଙ୍କ ଇସି ପୁନର୍ଗଠନ ବ୍ୟବସ୍ଥାକୁ ସମାଲୋଚନା କରିଥିଲେ। ଏହା ସହ ସରକାରଙ୍କ ସେହି ନିଷ୍ପତ୍ତି ପ୍ରତିବାଦରେ ଆସନ୍ତା ଫେବୃୟାରୀ ୧୩ରୁ ଆରମ୍ଭ ହେବାକୁ ଥିବା ବଜେଟ ଅଧିବେଶନ ସମୟରେ ଧାରଣାରେ ପ୍ରତ୍ୟେକ ଇସି ସଦସ୍ୟା ସାମିଲହେବାକୁ ସେମାନେ ଆହ୍ବାନ କରିଥିଲେ। ଉକ୍ତ କାର୍ଯ୍ୟକ୍ରମରେ ଜିଲାର ପ୍ରତ୍ୟେକ ବ୍ଲକ୍ର ଇସି ସଂଘର ସଭାନେତ୍ରୀଙ୍କ ନେତୃତ୍ୱରେ ଇସି ସଦସ୍ୟାମାନେ ସାମିଲଥିଲେ।
