ଥିରୁଭାନନ୍ତପୁରମ୍,୧୫ା୧୨: କେରଳରେ ଜଣେ ପ୍ରେମିକ ତାଙ୍କ ପ୍ରେମିକାଙ୍କୁ ହତ୍ୟା କରିଛନ୍ତି। ଏହି ମାମଲା ସମ୍ପର୍କରେ ପୋଲିସ କହିଛି, ଗୁରୁବାର ସକାଳେ ଓ୍ବାଝାଲିଆ ନିକଟରେ ସ୍ପଷ୍ଟ ଦିବାଲୋକରେ ଜଣେ ୪୭ ବର୍ଷୀୟା ମହିଳାଙ୍କୁ ତାଙ୍କ ଲିଭ୍-ଇନ୍-ପାର୍ଟନର ହତ୍ୟା କରିଛନ୍ତି। ସିନ୍ଧୁ ନାମକ ମୃତା ମହିଳାଙ୍କୁ ଧାରୁଆ ଅସ୍ତ୍ରରେ ଆକ୍ରମଣ କରାଯାଇଥିଲା। ଅଭିଯୁକ୍ତ ରାଜେଶ (୪୬) ବୋଲି ଜଣାପଡ଼ିଛି। ସିନ୍ଧୁ ଏକ ଦୋକାନ ନିକଟରେ ଠିଆ ହୋଇଥିବା ବେଳେ ରାଜେଶ ତାଙ୍କୁ ଆକ୍ରମଣ କରିଥିଲେ।
ପୋଲିସର ସୂଚନାନୁସାରେ, ସିନ୍ଧୁଙ୍କ ବେକ, ମୁଣ୍ଡ ଏବଂ ହାତରେ ଆଘାତ ଲାଗିଥିଲା। ପରେ ପୋଲିସ ତାଙ୍କୁ ସରକାରୀ ମେଡିକାଲ କଲେଜ ଡାକ୍ତରଖାନାକୁ ନେଇଥିଲା। କିନ୍ତୁ ସେଠାରେ ତାଙ୍କର ଜୀବନ ଚାଲିଯାଇଛି। ଅଭିଯୁକ୍ତ ଗତ ୧୨ ବର୍ଷ ଧରି ତାଙ୍କ ପରିବାରକୁ ପଠାନମଥିଟାରେ ଛାଡ଼ିବା ପରେ ଓ୍ବାଝାଲିଆର ବାସିନ୍ଦା ସିନ୍ଧୁଙ୍କ ସହ ରହୁଥିଲେ।
ଜଣେ ପୋଲିସ ଅଧିକାରୀ କହିଛନ୍ତି, ଦୁହିଁଙ୍କର କିଛି ସମୟ ଧରି ଝଗଡ଼ା ହୋଇଥିଲା। ନିକଟରେ ସିନ୍ଧୁ ରାଜେଶଙ୍କଠାରୁ ଦୂରରେ ରହିବା ପାଇଁ ଅନ୍ୟ ଏକ ଘରକୁ ଯାଇଥିଲେ। ଏହି ସମୟରେ ଗୁରୁବାର ସକାଳେ ରାଜେଶ ସିନ୍ଧୁ ଯାତ୍ରା କରୁଥିବା ସେହି ବସ୍ରେ ଚଢ଼ିଥିଲେ। ମଝିରେ ଦୁହିଁଙ୍କ ମଧ୍ୟରେ କୌଣସି କଥାକୁ ନେଇ ଝଗଡ଼ା ହୋଇଥିଲା ଏବଂ ତା’ପରେ ଉଭୟ ସମାନ ବସ୍ଷ୍ଟପ୍ରେ ଓହ୍ଲାଇଥିଲେ। ଏହି ସମୟରେ ରାଗରେ ଏକ ଦୋକାନ ନିକଟରେ ଠିଆ ହୋଇଥିବା ସିନ୍ଧୁଙ୍କୁ ତୀକ୍ଷ୍ଣ ଅସ୍ତ୍ରରେ ଆକ୍ରମଣ କରିଥିଲେ ରାଜେଶ। ବର୍ତ୍ତମାନ ପୋଲିସ ଅଭିଯୁକ୍ତ ରାଜେଶଙ୍କୁ ଗିରଫ କରିଛି।
