ଲକ୍ଷ୍ନୌ,୯।୧୧: ସୋସିଆଲ ମିଡିଆରେ ସମ୍ପ୍ରତି ଏକ ଅଜବ ଭିଡିଓ ଦେଖିବାକୁ ମିଳୁଛି । ଏହା ଭାଇରାଲ ହେବାରେ ଲାଗିଛି ଯେଉଁଥିରେ ମାଟିତଳୁ ହ୍ୟାଣ୍ଡ ପମ୍ପରେ ମଦ ବାହାରୁଛି। ଏହି ଭିଡିଓ ଉତ୍ତରପ୍ରଦେଶର ଝାନ୍ସୀର ହୋଇଥିବା ଜଣାଯାଇଛି। ଯେଉଁଠାରେ ପୋଲିସ ଘଟଣାସ୍ଥଳରେ ପହଞ୍ଚି ମଦକୁ ପୋତି ଦେଉଥିବାର ଦେଖିବାକୁ ମିଳୁଛି। ପୋଲିସ ଏହାକୁ ଜବତ କରି ନିଜ ହେପାଜତରେ ନେଇଛି।
ବାସ୍ତବରେ, ପୀୟୁଷ ରାୟ ନାମକ ଜଣେ ବ୍ୟକ୍ତି ନିଜର ସୋସିଆଲ ମିଡିଆ ଏକ୍ସ ହ୍ୟାଣ୍ଡେଲରେ ଏକ ଭିଡିଓ ପୋଷ୍ଟ କରିଛନ୍ତି। ଯେଉଁଥିରେ ଦେଖିବାକୁ ମିଳୁଛି ହ୍ୟାଣ୍ଡ ପମ୍ପରୁ ମଦ ବାହାରୁଛି। ଯେତେବେଳେ ଏକ୍ସାଇଜ ବିଭାଗ ଏହି ବିଷୟରେ ସୂଚନା ପାଇଲା, ସେମାନେ ଘଟଣାସ୍ଥଳରେ ପହଞ୍ଚି କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ଭିଡିଓ ପୋଷ୍ଟ କରି ବ୍ୟକ୍ତି ଲେଖିଛନ୍ତି ମୋ ଦେଶର ଜମିରୁ ବାହାରୁଛି ମଦ! ଉତ୍ତରପ୍ରଦେଶର ଝାନ୍ସୀ ଜିଲାରେ ମଦ ଚୋରା ଚାଲାଣକାରୀମାନେ ମଦକୁ ପାତ୍ରରେ ରଖି ମାଟି ତଳେ ପୋତି ଦେଇଥିଲେ। ଏହା ଉପରେ ଏକ ହ୍ୟାଣ୍ଡ ପମ୍ପ ସ୍ଥାପନ କରିଥିଲେ। ଆବଶ୍ୟକତା ଅନୁଯାୟୀ ମଦ ହ୍ୟାଣ୍ଡ ପମ୍ପ ଦ୍ୱାରା ବାହାର କରାଯାଉଥିଲା।
ଏହି ମାମଲା ମଉରାନିଗଞ୍ଜ ପୋଲିସ ଷ୍ଟେଶନ ଅଞ୍ଚଳର ବେସରିଆ ଡେରାର ଅଟେ। ମଦ ଏଠାରେ ତିଆରି ହୋଇ ବିକ୍ରି ହେଉଥିବା ଅଭିଯୋଗ ହୋଇଛି। ସୂଚନା ଆଧାରରେ ପୋଲିସ ଏଠାରେ ଚଢ଼ାଉ କରିଥିଲା। ଏହା ସହିତ ପୋଲିସ ବିଭାଗର ବରିଷ୍ଠ ଅଧିକାରୀମାନେ ମଧ୍ୟ ଘଟଣାସ୍ଥଳରେ ହ୍ୟାଣ୍ଡ ପମ୍ପରୁ ବହୁ ପରିମାଣର ମଦ ଉଦ୍ଧାର କରିଥିଲେ । ଗଣମାଧ୍ୟମ ରିପୋର୍ଟ ଅନୁଯାୟୀ, ଯେତେବେଳେ ଏହି ଘଟଣା ସାମ୍ନାକୁ ଆସିଲା ସେତେବେଳେ ପୋଲିସ କଡା କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ମଦ ବିକ୍ରେତାଙ୍କୁ ମଧ୍ୟ ଗିରଫ କରାଯାଇଛି।
