ନୂଆଦିଲ୍ଲୀ,୬।୬ : ଓଡିଶାରେ ଘଟିଥିବା ଟ୍ରେନ ଦୁର୍ଘଟଣା ପରେ ବିରୋଧୀ ଦଳ ସରକାରଙ୍କୁ ଘେରିବା ଜାରି ରଖିଛନ୍ତି। ଏହାର ପ୍ରତିବାଦରେ କଂଗ୍ରେସ ପୂର୍ବରୁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ଇସ୍ତଫା ଦାବି କରିସାରିଥିବା ବେଳେ ବର୍ତ୍ତମାନ ବରିଷ୍ଠ କଂଗ୍ରେସ ନେତା ବୀରପ୍ପା ମୋଇଲି ୨୦୧୭ ରେ ରେଳ ବଜେଟକୁ କେନ୍ଦ୍ର ବଜେଟ ସହ ଯୋଡିବାକୁ ସରକାରଙ୍କ ନିଷ୍ପତ୍ତି ଉପରେ ପ୍ରଶ୍ନ କରିଛନ୍ତି। ସେ କହିଛନ୍ତି ରେଳ ବଜେଟକୁ କେନ୍ଦ୍ର ବଜେଟ ଠାରୁ ଅଲଗା ରଖାଯିବା ଉଚିତ ଥିଲା। ୨୦୧୭ ଠାରୁ ରେଳ ବଜେଟକୁ ୟୁନିୟନ ବଜେଟ ସହିତ ସଂଯୋଗ କରିବା ଆରମ୍ଭ କରିବା ଏନଡିଏ ସରକାରଙ୍କର ଏକ ବଡ ଭୁଲ ପଦକ୍ଷେପ ଥିଲା।
କେନ୍ଦ୍ର ସରକାର ବୁଲେଟ ଟ୍ରେନ ବିଷୟରେ କଥାବାର୍ତ୍ତା କରୁଥିବାବେଳେ ମୌଳିକ ଉନ୍ନତି କିମ୍ବା ପର୍ଯ୍ୟାପ୍ତ ଆଧୁନିକୀକରଣ ଏବଂ ପ୍ରଯୁକ୍ତିବିଦ୍ୟା ପ୍ରଦାନ କରୁନାହାଁନ୍ତି। ରେଳ ବଜେଟକୁ ୟୁନିୟନ ବଜେଟ ସହିତ ଯୋଡିବା ରେଳବାଇର ଧ୍ୟାନକୁ ବିଚ୍ୟୁତ କରିଛି। ଏନଡିଏ ସରକାର କରିଥିବା ଏହା ଏକ ବଡ ଭୁଲ। ନିରାପତ୍ତା ଏବଂ ଆଧୁନିକୀକରଣକୁ ଧ୍ୟାନ ନ ଦେଇ କେବଳ ହାଇ ସ୍ପିଡ ଟ୍ରେନ ଉପରେ ଧ୍ୟାନ ଦେବା ଏକ ତରବରିଆ ପଦକ୍ଷେପ। ପୂର୍ବ ପରି ରେଳ ବଜେଟକୁ ଅଲଗା ରଖିବାର ଆବଶ୍ୟକତା ରହିଛି ।
ସେ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ନୈତିକ କାରଣରୁ ଇସ୍ତଫା ଦେବାକୁ ମଧ୍ୟ ଦାବି କରିଛନ୍ତି। ଦ୍ରୁତ ଗତି ଏବଂ ବିସ୍ତୃତ ନେଟୱାର୍କ ସହିତ ରେଳବାଇ ଦୃଢ଼ କାର୍ଯ୍ୟକ୍ଷମ ଇକୋସିଷ୍ଟମ ପାଇବାକୁ ଯୋଗ୍ୟ। ଏହିପରି ଏକ ନେଟୱାର୍କ ସୁରକ୍ଷା ନିଶ୍ଚିତ କରିପାରିବ। ଏଥିପାଇଁ ସରକାର ଭିତ୍ତିଭୂମିର ଉନ୍ନତି ଉପରେ ଧ୍ୟାନ ଦେବା ଉଚିତ।
ପୂର୍ବତନ କେନ୍ଦ୍ର ମନ୍ତ୍ରୀ ଏହା ମଧ୍ୟ କହିଛନ୍ତି ସାଧାରଣ ବଜେଟ ଆରମ୍ଭ ହେବା ପରଠାରୁ ରେଳବାଇ ଏହାର ସୁରକ୍ଷା ପାଣ୍ଠିର ଅଂଶଧନ ସୃଷ୍ଟି କରିପାରି ନାହିଁ। ଆମେ ସେମାନଙ୍କର ରାଜସ୍ବରେ ବିବିଧତା ଆଣିବା, ବଜେଟ ଆବଣ୍ଟନ ବୃଦ୍ଧି କରିବା ଏବଂ ଏହାର ସଠିକ ଏବଂ ସ୍ବଚ୍ଛ ବ୍ୟବହାର ନିଶ୍ଚିତ କରିବା ଜରୁରୀ।
