ମହାକାଳପଡ଼ା, ୯ା୫(ଡି.ଏନ୍.ଏ.): ପେଟକୁ ଦିମୁଠା ଦାନା ଯୋଗାଡ଼ କରିବାକୁ କେତେ ଯେ ସଂଗ୍ରାମ କରିବାକୁ ପଡ଼େ ସେ କଥା ଅଭାବୀ ଗରିବ ଲୋକ ହିଁ ଜାଣି ପାରେ। କେତେବେଳେ ଜୀବିକା ପାଇଁ ନିଜ ଜୀବନକୁ କୁମ୍ଭୀର ଭରା ନଦୀରେ ବାଜି ଲଗାଏ। ନଦୀରୁ ମାଛ, କଙ୍କଡ଼ା ଧରିଲେ ପରିବାର ଚଳେ। ସକାଳୁ ମା’ମାନେ ଛୁଆ ମୁହଁରେ ମୁଠେ ଆହାର ଦେଇ ବାହାରି ପଡ଼ନ୍ତି ସାଥୀମାନଙ୍କ ସହ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ମହାନଦୀ ଶାଖା ଗଳିଆ ନଦୀକୁ ମାଛ ଧରିବାକୁ। ନଦୀରୁ ଅଣ୍ଡାଳି ଯାହା କିଛି ମାଛ, କଙ୍କଡ଼ା ଧରି ବିକିଲେ ଘରେ ଚୁଲି ଜଳେ। ଘରେ କୁନି କୁନି ପିଲା ମା’ ଫେରିବା ବାଟକୁ ଚାହିଁ ରହିଥାନ୍ତି। ଅପରପକ୍ଷରେ ନଦୀରେ ଅଣ୍ଡାଳି ମାଛ ଧରୁଥିବା ବେଳେ କୁମ୍ଭୀରର ଭୟରେ ମନ ଭିତରେ ଆସିଥାଏ। ତଥାପି ମହିଳାମାନେ ଏହାକୁ ଖାତିର ନ କରି ନିଜ ଜୀବନକୁ ବାଜି ଲଗାଇ ମାଛ ଧରୁଥିବା ନଜରକୁ ଆସିଛି।
ଏହି ଗଳିଆ ନଦୀରେ ମହିଳାମାନେ ମୁଣ୍ଡରେ ଠେକା ବାନ୍ଧି ଅଣ୍ଡାଳି ମାଛ ଧରୁଥିଲେ। କୁମ୍ଭୀର ଭରା ନଦୀରେ କାହିଁକି ମାଛ ଧରୁଛ ବୋଲି ମହିଳାମାନଙ୍କୁ ପଚାରିବାରୁ ସେମାନଙ୍କ ଉତ୍ତର ଯାହା ଥିଲା, ତାହା ହୃଦୟସ୍ପର୍ଶୀ। ଚାଷଜମି ନ ଥିବାରୁ ବର୍ଷ ତମାମ ଏହି ନଦୀ ଆମର ସାଥୀ ହୋଇଛି। ଏହି ଗଳିଆ ନଦୀ ଯୋଗାଉଛି ପରିବାରକୁ ଆହାର। ଏହି ନଦୀରୁ ମାଛ ଧରିଲେ ପରିବାର ଚଳେ। ମହିଳାମାନଙ୍କ କହିବା କଥା ମାଛ ଅଣ୍ଡାଳିବା ସମୟରେ କେତେବେଳେ କୁମ୍ଭୀର ଆଗରେ ହେଉ କି ପଛରେ ଭାସୁଥିବା ଦେଖିଥିବା ମିଳେ। ବେଳେ ବେଳେ କୁମ୍ଭୀର ସହ ସାମ୍ନା କରିବାକୁ ପଡ଼େ। ସୂଚନାଯୋଗ୍ୟ, କିଛିଦିନ ତଳେ ଖରିନାସୀ ଗ୍ରାମର କୌଶଲ୍ୟା ମଣ୍ଡଳ ସାଥୀମାନଙ୍କ ସହ ବାରଶହ ଏକର ଜଙ୍ଗଲ ପାର୍ଶ୍ୱ ଭରା ନଦୀରେ ମାଛ ଧରିବା ବେଳେ ପଛ ପଟରୁ ଏକ ବଉଳା କୁମ୍ଭୀର ତାଙ୍କୁ ଟାଣି ଟାଣି ନେଇ ପାଣିରେ ବୁଡ଼ାଇ ଖଣ୍ଡିଆ ଖାବରା କରିଥିଲା। ପରେ ସାଥୀ ମହିଳାମାନେ ଗ୍ରାମବାସୀଙ୍କୁ ଖବର ଦେବା ପରେ କୌଶଲ୍ୟାଙ୍କୁ ଉଦ୍ଧାର କରାଯାଇଥିଲେ ମଧ୍ୟ ମୃତ୍ୟୁବରଣ କରିଥିଲେ। ଅପରପକ୍ଷରେ ବ୍ଲକର ନଦୀ ନାଳ ଘେରା ଅଞ୍ଚଳଗୁଡ଼ିକରେ ବନ ବିଭାଗ କୌଣସି ସତର୍କତା ଓ ସଚେତନା କାର୍ଯ୍ୟକ୍ରମ କରୁ ନ ଥିବା ଅଭିଯୋଗ ହେଉଛି। ଏହି ନଦୀକୂଳିଆ ଅଞ୍ଚଳର ସଚେତନତା ଅଭାବରୁ ଅନେକ ଲୋକଙ୍କ ଜୀବନ କୁମ୍ଭୀର ଅଁାରେ ଚାଲିଯାଉଛି। ସ୍ଥାନୀୟ ମହିଳାମାନଙ୍କୁ ନେଇ ପ୍ରତ୍ୟେକ ନଦୀକୂଳିଆ ଗଁାରେ ସ୍ବତନ୍ତ୍ର ଭାବେ ବୈଠକ କରାଗଲେ ହୁଏତ ନିରୀହ ଜୀବନ ବଞ୍ଚତ୍ପାରନ୍ତା ବୋଲି ଅଞ୍ଚଳର ବୁଦ୍ଧିଜୀବୀ ମତବ୍ୟକ୍ତ କରିଛନ୍ତି। ଏ ସମ୍ପର୍କରେ ରାଜନଗର ଡିଏଫ୍ଓ ସୁଦର୍ଶନ ଗୋପୀନାଥ ଯାଦବଙ୍କୁ ପଚାରିବାରେ ଏଥିପାଇଁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
