ଭଞ୍ଜନଗର,୨୭।୧୨(ଡି.ଏନ.ଏ): ଗଞ୍ଜାମ ଜିଲା ଭଞ୍ଜନଗର ଥାନା ଅନ୍ତର୍ଗତ ସାଲୁଆପଲ୍ଲୀରେ ୨୦୧୫ରେ ଘଟିଥିବା ସୁନୀତା ନାଇକ (ବିଶୋଇ) ହତ୍ୟା ମାମଲାର ରାୟ ସୋମବାର ପ୍ରକାଶ ପାଇଛି। ଭଞ୍ଜନଗର ଏଡିଜେ ଦେବଦତ୍ତ ପଟ୍ଟନାୟକ ୧୮ ଜଣ ସାକ୍ଷୀଙ୍କ ବୟାନକୁ ଭିତ୍ତିକରି ଅଭିଯୁକ୍ତ ସ୍ବାମୀ ଗନ୍ଧିଆ ନାଇକଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ୧୦ ହଜାର ଟଙ୍କା ଜରିମାନା କରିଛନ୍ତି। ଜରିମାନା ଅନାଦାୟ ଅଧିକ ଏକ ବର୍ଷ କାରାଦଣ୍ଡ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି।
ସୋରଡା ଥାନା ଅନ୍ତର୍ଗତ ଗୋବିନ୍ଦପୁର ଗ୍ରାମର ନିରଞ୍ଜନ ବିଶୋଇଙ୍କ ଝିଅ ସୁନିତା ୨୦୧୩ରେ ଭଞ୍ଜନଗର ଥାନା ଅନ୍ତର୍ଗତ ସାଲୁଆପଲ୍ଲୀର ଗନ୍ଧିଆଙ୍କୁ ବିବାହ କରିଥିଲେ। ବିବାହ ପରେ ଦମ୍ପତି କିଛି ମାସ ଭଲରେ ଚଳିଥିଲେ। ସେମାନଙ୍କର ଏକ ଝିଅ ଜନ୍ମ ହୋଇଥିଲା। ପରେ କୌଣସି କାରଣରୁ ସ୍ବାମୀ-ସ୍ତ୍ରୀଙ୍କ ମଧ୍ୟରେ ବିବାଦ ଦେଖାଦେଇଥିଲା। ବାପଘରୁ ପୁଣି ଯୌତୁକ ବାବଦକୁ କିଛି ଟଙ୍କା ଆଣିବା ପାଇଁ ସୁନିତାଙ୍କୁ ଗନ୍ଧିଆ କହିଥିଲେ। ସ୍ବାମୀଙ୍କ କହିବା ମୁତାବକ ସୁନିତା ବାପଘରୁ ଆଉ ୧୦ ହଜାର ଟଙ୍କା ଆଣିଥିଲେ ମଧ୍ୟ ଗନ୍ଧିଆ ସନ୍ତୁଷ୍ଟ ନ ଥିଲେ। ଟଙ୍କା ପାଇବାର ୧୦ ଦିନ ପରେ ୨୦୧୫ ଅଗଷ୍ଟ ୨୫ ରାତିରେ ଗନ୍ଧିଆ ଛୁରୀ ଭୁଶି ସୁନିତାଙ୍କୁ ହତ୍ୟା କରିଥିଲେ। ଏନେଇ ସେ ସମୟରେ ସୁନୀତାଙ୍କ ବାପା ନିରଞ୍ଜନଙ୍କ ଏତଲାକୁ ଭିତ୍ତିକରି ପୋଲିସ ଏକ ହତ୍ୟା ମାମଲା ରୁଜୁ କରିବା ସହ ଅଭିଯୁକ୍ତ ଗନ୍ଧିଆଙ୍କୁ ଗିରଫ କରିଥିଲା। ଗନ୍ଧିଆ ଘଟଣା ପରଠୁ ବିଚାରାଧୀନ ବନ୍ଦୀ ଭାବେ ରହିଛନ୍ତି। ସରକାରଙ୍କ ପକ୍ଷରୁ ବରିଷ୍ଠ ଆଇନଜୀବୀ ଏମ. ତାଜ ଆଦେନୀ ମାମଲା ପରିଚାଳନା କରୁଥିଲେ।
