କୋରାପୁଟ,୧୩ା୯(ଅମିତାଭ ବେହେରା): ଓଡ଼ିଶାର ଉଚ୍ଚ ନ୍ୟାୟାଳୟଙ୍କ ଆଦେଶ ଅନୁସାରେ ପୁନଃ ନିଯୁକ୍ତି ପାଇଁ ବୁଧବାର କୋରାପୁଟ ଜିଲାପାଳଙ୍କଠାରେ ଦାବି ରଖିଛନ୍ତି ୬ ଛଟେଇ ଜଳସେଚନ ବିଭାଗ କର୍ମଚାରୀ। ଅପର କୋଲାବ ପ୍ରକଳ୍ପରୁ ଛଟେଇ ହୋଇଥିବା ଏହି କର୍ମଚାରୀ କହିଛନ୍ତି, ମାନ୍ୟବର ହାଇକୋର୍ଟ ୨୦୧୯ର ରିଟ୍ ପିଟିଶନ (ସି)(ଓଏସି) ସଂଖ୍ୟା-୧୦୭୯ର ଶୁଣାଣି କରି ଗତ ୧୩-୧୦-୨୨ର ଆଦେଶ ସଂଖ୍ୟା ୧ରେ ଦର୍ଶାଇଛନ୍ତି ଯେ, ୨୦୦୭ ଓଡ଼ିଶା ପ୍ରଶାସନିକ ଟ୍ରିବ୍ୟୁନାଲର ୧୫୨୨(ସି)କୁ ଭିତ୍ତି କରି ପୁନଃ ନିଯୁକ୍ତି ବିଚାର କରାଯାଉ। ଏପରିକି ଏହାକୁ ନେଇ ବହୁ ଛଟେଇ କର୍ମଚାରୀ ପୁନଃ ଚାକିରି ପାଇଛନ୍ତି। କିନ୍ତୁ ବହୁ ଛଟେଇ ଏନ୍ଏମ୍ଆର ପୁନଃ ନିଯୁକ୍ତିକୁ ଅପେକ୍ଷା କରିଛନ୍ତି। ମାନ୍ୟବର ସୁପ୍ରିମକୋର୍ଟ ମଧ୍ୟ ଆଦେଶ ଦେଇଥିଲେ ଯେ, ଚାକିରି ପାଇଥିବା ଏନ୍ଏମ୍ଆର୍ଙ୍କଠାରୁ ବହୁ ବରିଷ୍ଠ ମଧ୍ୟ ପୁନଃ ନିଯୁକ୍ତି ଅପେକ୍ଷା ରହିଛନ୍ତି, ସେମାନଙ୍କ କଥା ବିଚାର କରାଯାଉ। ଏସବୁ ବିଷୟ ପତ୍ରସଂଖ୍ୟା ୫୬୯ରେ ଇନ୍ଦ୍ରାବତୀ ଏବଂ କୋଲାବ ବେସିନ ମ୍ୟାନେଜର ତଥା ମୁଖ୍ୟଯନ୍ତ୍ରୀ ଗତ ମାର୍ଚ୍ଚ ୧ ତାରିଖରେ ବିଭାଗର ସର୍ବୋଚ୍ଚ ଯନ୍ତ୍ରୀଙ୍କୁ ଅବଗତ କରାଇଛନ୍ତି। ତଥାପି ବିଭାଗ ନୀରବ ରହିଥିବା ହେତୁ ଗତ ୨୦୦୧ରୁ ଚାକିରି ହରାଇଥିବା ୧୧ ଜଣ ଏନ୍ଏମ୍ଆର୍ କର୍ମଚାରୀ ନାନା ସମସ୍ୟାର ସମ୍ମୁଖୀନ ହୋଇଚାଲିଥିବା କୁହାଯାଇଛି। ୧୧ ଜଣଙ୍କ ମଧ୍ୟରୁ ୩ଜଣଙ୍କ ଦେହାନ୍ତ ହୋଇଥିବା ବେଳେ ଏହି ଆଦେଶ ବଳରେ ପୂର୍ବରୁ ୨୫ ଛଟେଇ କର୍ମଚାରୀ ଚାକିରି ମଧ୍ୟ ଫେରି ପାଇଛନ୍ତି। ଏଭଳି କ୍ଷେତ୍ରରେ କାଳେନ୍ଦ୍ରୀ ବାଘ, ବିଦେଶୀ ଗୌଡ଼, ସାଇ ରାମା ରାଓ, ଦୟାମଣି ନାୟକ, ସୁଜାମଣି ସୁନା, ପି.ଶଙ୍କର ରାଓ ଆମ କ୍ଷେତ୍ରରେ ସରକାର କାହିଁକି ବିଳମ୍ବ କରୁଛନ୍ତି ବୋଲି ପ୍ରଶ୍ନ କରିଛନ୍ତି। ଜିଲାପାଳଙ୍କ ସହ ସେମାନେ ଏହି ପତ୍ରର ନକଲ ମାନ୍ୟବର ଜଳସମ୍ପଦ ମନ୍ତ୍ରୀ, ସଚିବ, ୫-ଟି ସଚିବଙ୍କୁ ମଧ୍ୟ ପ୍ରଦାନ କରିଛନ୍ତି।
