ପାରଳାଖେମୁଣ୍ଡି,୧୪।୧(ଗିରିଧାରୀ ପରିଛା): ଗଜପତି ଜିଲା ନୂଆଗଡ଼ ବ୍ଲକ ଅନ୍ତର୍ଗତ ଖଜୁରିପଡାଠାରେ ଥିବା ଶଶି ଔଷଧ ଦୋକାନ ଉପରେ ଡ୍ରଗ ନିରୀକ୍ଷକଙ୍କ ଅଚାନକ ଚଢ଼ାଉ ହୋଇଛି । ଆଜି ସକାଳେ ଗଜପତି ଜିଲାର ଡ୍ରଗ ନିରୀକ୍ଷକ ପ୍ରସନ୍ନ କୁମାର ମଲ୍ଲିକ କୌଣସି ଏକ ବିଶ୍ୱସ୍ତ ସୂତ୍ରରୁ ଖବର ପାଇ ଶଶି ଔଷଧ ଦୋକାନରେ ସାମ୍ପଲ ଔଷଧ ବିକ୍ରି ହେଉଥିବା ଜାଣି ଅଚାନକ ଏକ ୪ଜଣିଆ ଟିମ ଦୋକାନରେ ପଶି ଚଢ଼ାଉ କରିଥିଲେ । ପ୍ରାୟ ୪ଘଣ୍ଟାରୁ ଅଧିକ ସମୟ ଧରି ଏହି ଚଢ଼ାଉ ଜାରି ରହିଥିଲା। ଚଢ଼ାଉବେଳେ ଅନେକ କମ୍ପାନୀର ସାମ୍ପଲ ଔଷଧ ମିଳିଥିବା ସୂଚନା ମିଳିଛି। ତେବେ ଏହି କାରବାର ବହୁଦିନ ପୂର୍ବରୁ ଏଭଳି ଚାଲିଥିବା ସନ୍ଦେହ କରାଯାଉଛି। ତେବେ ଆଗକୁ ଏହି ଘଟଣାର ସବୁ ଦିଗକୁ ନେଇ ତଦନ୍ତ କରାଯିବା ସହ କେଉଁ କେଉଁ କମ୍ପାନୀର ଔଷଧ ରହିଛି ସେ ସମସ୍ତ ଘଟଣାକୁ ନେଇ ଏକ ମାମଲା ରୁଜୁ କରାଯିବ ବୋଲି ସୂଚନା ଦେଇଛନ୍ତି ଡ୍ରଗ ନିରୀକ୍ଷକ ଶ୍ରୀ ମଲ୍ଲିକ।
ଗଜପତି ଜିଲାରେ ଏହି ଗୋଟିଏ ଘଟଣା ସାମ୍ନାକୁ ଆସିଛି କିନ୍ତୁ ବାସ୍ତବିକ କ୍ଷେତ୍ରରେ ଜିଲ୍ଲାରେ ବିଭିନ୍ନ ବ୍ଲକ ସହ ସଦର ମହକୁମାଠାରେ ମଧ୍ୟ ଏହି ପ୍ରକାର କାରବାର ବ୍ୟାପକ ଭାବେ ଚାଲିଛି ଏହା କେବଳ ଭାତ ହାଣ୍ଡିର ଗୋଟିଏ ଭାତ। ଯଦି ଜିଲା ଡ୍ରଗ୍ସ ବିଭାଗ ପକ୍ଷରୁ ଯାଞ୍ଚ କରାଯାଏ ତେବେ ଗାଁଗହଳି ବ୍ୟତୀତ ସହରାଞ୍ଚଳରେ ମଧ୍ୟ ଅନେକ ଔଷଧ ଦୋକାନରେ ଏହି କାରବାରର ଛାପ ମିଳିପାରିବ ଏଥିରେ କୌଣସି ସନ୍ଦେହ ନାହିଁ। ତେବେ ଲୋକଙ୍କ ଆବଶ୍ୟକତା କ୍ଷେତ୍ରରେ କିଛି ବ୍ୟବସାୟୀ ଅଳ୍ପ ଲାଭ ପାଇଁ ଲୋକଙ୍କ ଜୀବନ ସହ ଖେଳୁଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସାଧାରଣରେ ଦାବି ହେଉଛି।
