ଭୁବନେଶ୍ୱର,୨୩ା୭(ବ୍ୟୁରୋ): ରାଜ୍ୟ ସରକାର ଉଭୟ ଚିଲିକାର ଗୁଣବତ୍ତା ଓ ମତ୍ସ୍ୟଜୀବୀମାନଙ୍କର ଜୀବିକାକୁ ସାମଗ୍ରିକ ଓ ସାମୂହିକ ଭାବେ ଉନ୍ନତି କରିବା ପାଇଁ ପ୍ରତିଶ୍ରୁତି ବଦ୍ଧ। ଶୁକ୍ରବାର ବିରୋଧୀଙ୍କ ଆଗତ ମୁଲତବୀ ଆଲୋଚନା ଉତ୍ତରରେ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ପ୍ରଦୀପ କୁମାର ଅମାତ ଏହି ସୂଚନା ଦେଇଛନ୍ତି ।
ମନ୍ତ୍ରୀ କହିଛନ୍ତି , ଚିଲିକା ହେଉଛି ବିବିଧତାର ଗୁରୁତ୍ୱପୂର୍ଣ୍ଣ ସ୍ଥାନ। ଏସିଆ ମହାଦେଶର ବୃହତମ ହ୍ରଦ। ଏଥିରେ ଇରଓ୍ବାଡି ଡଲଫିନ, ୮୮୪ ପ୍ରଜାତିର ଉଦ୍ଭିଦ ଏବଂ ୩୩୬ ପ୍ରଜାତିର ମାଛ ମଧ୍ୟ ଦେଖାଯାଆନ୍ତି। ହ୍ରଦଟି ୧୦ ଲକ୍ଷରୁ ଊର୍ଦ୍ଧ୍ୱ ବିଦେଶାଗତ ପକ୍ଷୀମାନଙ୍କର ଶୀତଦିନିଆ ବାସସ୍ଥଳୀ ଅଟେ। ଚିଲିକାରେ ଶୀତଦିନେ ୨୨୮ ପ୍ରଜାତିର ପକ୍ଷୀମାନଙ୍କର ସମାଗମ ହୋଇଥାଏ। ମତ୍ସ୍ୟ ନିର୍ଦ୍ଦେଶାଳୟରୁ ମିଳିଥିବା ତଥ୍ୟ ଅନୁଯାୟୀ ୧,୮୯,୯୫୮ ସଂଖ୍ୟକ ମତ୍ସ୍ୟଜୀବୀ ଚିଲିକା ଉପରେ ନିଜର ଜୀବନ ଜୀବିକା ପାଇଁ ନିର୍ଭରଶୀଳ ହୋଇଥାଆନ୍ତି । ଚିଲିକା ଅଞ୍ଚଳରେ ୨୦୦ ପ୍ରାଥମିକ ମତ୍ସ୍ୟଜୀବୀ ସମବାୟ ସମିତି ଗଠନ କରାଯାଇଛି। ଏହି ସମିତିଗୁଡ଼ିକରେ ୪୫,୮୧୨ ଜଣ ସଭ୍ୟ ଅଛନ୍ତି। ରାଜ୍ୟ ସରକାରଙ୍କ ତରଫରୁ ୧୪୧ ଟିପିଏଫ୍ସିକୁ ୨ ଲକ୍ଷ ଲେଖାଏ ଟଙ୍କା ପ୍ରଦାନ କରାଯାଇଛି। ମତ୍ସ୍ୟଜୀବୀଙ୍କ ଆର୍ଥିକ ତଥା ସାମାଜିକ ଉନ୍ନତି ନିମନ୍ତେ ସରକାରୀ ନିବନ୍ଧକ ସମିତି(ମତ୍ସ୍ୟ) ଚିଲିକା ମଣ୍ଡଳକୁ ୭ କୋଟି ୯୯ ଲକ୍ଷ ୬୦ ହଜାର ଟଙ୍କାର ଅନୁଦାନ ଦେଇଛନ୍ତି। ଏହାଦ୍ୱାରା ଚିଲିକା ଅଞ୍ଚଳର ୬୦୦୦ରୁ ଊର୍ଦ୍ଧ୍ୱ ମତ୍ସ୍ୟଜୀବୀ ଋଣ ପାଇ ଉପକୃତ ହୋଇଛନ୍ତି।
ଚିଲିକା ହ୍ରଦରେ ୩୩୬ ପ୍ରକାର ମାଛ, ୨୯ ପ୍ରଜାତିର ଚିଙ୍ଗୁଡ଼ି, ୩୫ ପ୍ରଜାତିର କଙ୍କଡ଼ା ରହିଛନ୍ତି। ଚିଲିକାରୁ ୨୦୨୧-୨୨ରେ ୧୨୨୧୮୭.୫୮ ମେଟ୍ରିକ ଟନ ମାଛ, ୬୭୬୨.୦୨ ଟନ ଚିଙ୍ଗୁଡ଼ି ଏବଂ ୪୮୭.୭୦ ମେଟ୍ରିକ ଟନ କଙ୍କଡ଼ା ଉତ୍ପାଦିତ ହୋଇଛି। ୧, ୪୧, ୫୨୮ ସଂଖ୍ୟକ ମତ୍ସ୍ୟଜୀବୀଙ୍କୁ ଗୋଷ୍ଠୀ ବୀମା ଦୁର୍ଘଟଣା ଯୋଜନାରେ ଅନ୍ତର୍ଭୁକ୍ତ କରାଯାଇଛି। ମାଛ ବିକ୍ରୟ ସୁବିଧା ନିମନ୍ତେ ୯ଟି ମାଛ କିୟୋସ୍କ ପ୍ରତିଷ୍ଠା ପାଇଁ ୯ ଜଣ ହିତାଧିକାରୀଙ୍କୁ ଅନୁମତିପତ୍ର ପ୍ରଦାନ କରାଯାଇଛି। ଚିଲିକା ମତ୍ସ୍ୟଜୀବୀ ପରିବାରର ୧୮୪୯ ଜଣ ମେଧାବୀ ଛାତ୍ରୀଛାତ୍ରଙ୍କୁ ମେଧାବୃତ୍ତି ବାବଦରେ ୯୫.୨୮ ଲକ୍ଷ ଟଙ୍କାର ସହାୟତା ଦିଆଯାଇଛି। ଚିଲିକା ପରିପାର୍ଶ୍ୱରେ ଥିବା ପୁରୀ ଜିଲାର କୃଷ୍ଣପ୍ରସାଦ, ବ୍ରହ୍ମଗିରି, ଖୋର୍ଦ୍ଧା ଜିଲାର ଟାଙ୍ଗୀ ଓ ଚିଲିକା ବ୍ଲକ ଏବଂ ଗଞ୍ଜାମ ଜିଲାର ଖଲିକୋଟ ଓ ଗଞ୍ଜାମ ବ୍ଲକଗୁଡ଼ିକରେ ମତ୍ସ୍ୟଚାଷର ବିକାଶ ପାଇଁ ୧୨୭ ମହିଳା ସ୍ବୟଂ ସହାୟକ ଗୋଷ୍ଠୀକୁ ଗୋଷ୍ଠୀ ଗ୍ରାମ ପଞ୍ଚାୟତ ପୋଖରୀରେ ମାଛ ଚାଷ କରିବା ପାଇଁ ସହାୟତା ଦିଆଯାଇଛି। ମତ୍ସ୍ୟ ପୋଖରୀ ଯୋଜନାରେ ୧୬୨ଟି ନୂତନ ପୋଖରୀ ଖୋଳାଯାଇ ୨୨୧.୦୨ ଲକ୍ଷ ଟଙ୍କା ସବ୍ସିଡି ପ୍ରଦାନ କରାଯାଇଛି। ଚିଲିକା ଉନ୍ନୟନ କର୍ତ୍ତୃପକ୍ଷ ପ୍ରତିମାସରେ ଚିଲିକା ହ୍ରଦର ଗୁଣବତ୍ତାର ପରୀକ୍ଷଣ କରୁଛନ୍ତି। ପ୍ରତି ବର୍ଷ ହେଲ୍ଥ ରିପୋର୍ଟ କାର୍ଡ ପ୍ରକାଶ କରାଯାଉଛି।
ଚିଲିକା କୂଳରେ ଲକ୍ଷାଧିକ ଲୋକଙ୍କ ଜୀବନଜୀବିକା ପ୍ରଭାବିତ ହେଉଛି। ୨୦% ଲୋକ ମାଛ ଧରିବା ଉପରେ ନିର୍ଭର କରୁଥିବା ବେଳେ ଅନ୍ୟ ଲୋକମାନେ ମଧ୍ୟ ଚିଲିକା ଉପରେ ନିର୍ଭର କରୁଛନ୍ତି। ଚିଲିକା ପାର୍ଶ୍ୱବର୍ତ୍ତୀ ଗ୍ରାମଗୁଡ଼ିକୁ ଜଳସେଚନ ସୁବିଧା ନାହିଁ। ସରକାର ଚିଲିକା ପାଇଁ ଏକ ସ୍ବତନ୍ତ୍ର ନୀତି କରନ୍ତୁ ବୋଲି ବିରୋଧୀ ଦାବି କରିଛନ୍ତି। ମୁଲତବୀ ଆଲୋଚନାରେ ଭାଗ ନେଇ ଭାଜପା ସଭ୍ୟ ବିଷ୍ଣୁ ଚରଣ ସେଠୀ, ଲଳିତେନ୍ଦୁ ବିଦ୍ୟାଧର ମହାପାତ୍ର, ମୁକେଶ ମହାଲିଙ୍ଗ, କଂଗ୍ରେସ ସଭ୍ୟ ସୁରେଶ କୁମାର ରାଉତରାୟ, ସନ୍ତୋଷ ସିଂ ସାଲୁଜା ପ୍ରମୁଖ ଚିଲିକାକୁ ନେଇ ଗଭୀର ଅସନ୍ତୋଷ ପ୍ରକାଶ କରିଥିଲେ।
