ଭୁବନେଶ୍ୱର,୨୬।୬ (ଶର୍ମିଷ୍ଠା ପାଣିଗ୍ରାହୀ): ନାଟକ ମାଧ୍ୟମରେ ଓଡ଼ିଶାର କଳା ଓ ସଂସ୍କୃତିକୁ ଲୋକଙ୍କ ପାଖରେ ପହଞ୍ଚାଇବାର ପ୍ରୟାସ କରୁଛନ୍ତି ଯୁବ ନାଟ୍ୟକାର, ନିର୍ଦ୍ଦେଶକ ତଥା ଅଭିନେତା ବିଶାନ ବଳଭଦ୍ର ଶତପଥୀ। ଖୁବ୍ କମ୍ ସମୟରେ ସେ ଦର୍ଶକଙ୍କ ଭଲ ପାଇବା ଜିଣିବାର ପ୍ରଥମ ପାହାଚ ଚଢ଼ି ସାରିଛନ୍ତି। ପ୍ରଥମ ନିର୍ଦ୍ଦେଶିତ ନାଟକ ‘ବୟସର ଅନ୍ତେ’ ମାଧ୍ୟମରେ ନାଟକ ଜଗତରେ ଏକ ଉଦାହରଣ ସୃଷ୍ଟି କରିଛନ୍ତି। ଦର୍ଶକ ପ୍ରଥମଥର ପାଇଁ ଟିକେଟ କରି ନାଟକ ଦେଖିଛନ୍ତି, ଯାହା ତାଙ୍କ ନାଟକର ମାନକୁ ପ୍ରତିପାଦିତ କରୁଛି। ଢେଙ୍କାନାଳରେ ଜନ୍ମିତ ବିଶାନ ମେକାନିକାଲ ଇଞ୍ଜିନିୟରିଂ ପରେ ହାଇଦ୍ରାବାଦସ୍ଥିତ ସରୋଜିନୀ ନାଇଡୁ ସ୍କୁଲ ଅଫ୍ ଆର୍ଟସ୍ରେ ଥିଏଟର ଆର୍ଟସରେ ଅଧ୍ୟୟନ କରିଛନ୍ତି। ମାତ୍ର ୨୬ବର୍ଷ ବୟସରେ ଯୁବ ନାଟ୍ୟ ନିର୍ଦ୍ଦେଶକ ଭାବେ ସ୍ବତନ୍ତ୍ର ପରିଚୟ ହାସଲ କରିବା ପୂର୍ବରୁ ସେ ରାଜ୍ୟ ବାହାରେ ଅନେକ ନାଟକରେ ଅଭିନୟ କରିଛନ୍ତି। ଏଥିସହ ଫିଲ୍ମ ‘ଜ୍ୱିଗାଟୋ’, ଶୁଭମୁକ୍ତି ଅପେକ୍ଷାରେ ଥିବା ଚଳଚ୍ଚିତ୍ର ‘ନିୟତି’ରେ ମଧ୍ୟ ସେ ଅଭିନୟ କରିଛନ୍ତି। ବହୁମୁଖୀ ଯୁବ କଳାକାର ବିଶାନଙ୍କ ସହ ଧରିତ୍ରୀର ସ୍ବତନ୍ତ୍ର ଆଳାପ।
