ରାୟଗଡ଼ା ଅଫିସ,୨୫।୫: ରାୟଗଡ଼ା ରେଳ ଷ୍ଟେଶନରେ ସୋମବାର ଏକ ଅକ୍ସିଜେନ ବୋଝେଇ ଟ୍ୟାଙ୍କର ଲିକ୍ ହୋଇଥିବାବେଳେ ଅଳ୍ପକେ ଏକ ବଡ଼ ଦୁର୍ଘଟଣା ଟଳିଯାଇଛି। ମାଲବାହୀ ଟ୍ରେନ୍ ଯୋଗେ ରାଉରକେଲାରୁ ୬ଟି ଅକ୍ସିଜେନ ବୋଝେଇ ଟ୍ୟାଙ୍କର ବେଙ୍ଗାଲୁରୁ ଯାଉଥିଲା। ସିଗ୍ନାଲ ନିମନ୍ତେ ରାୟଗଡ଼ା ଷ୍ଟେଶନରେ ଅଟକିଥିଲା। ତେବେ କୌଣସି କାରଣରୁ ଏଠାରେ ଗୋଟିଏ ଟ୍ୟାଙ୍କରରୁ ଅକ୍ସିଜେନ ଲିକ୍ ହୋଇଥିଲା। ଏହା ଜଣାପଡ଼ିବାପରେ ଘଟଣା ବିଷୟରେ ରାଉରକେଲାସ୍ଥିତ ମୁଖ୍ୟ କର୍ତ୍ତୃପକ୍ଷଙ୍କୁ ଅବଗତ କରାଯିବା ସହ ରେଲ୍ଓ୍ବେ କର୍ତ୍ତୃପକ୍ଷ ରାୟଗଡ଼ା ଅଗ୍ନିଶମ ବାହିନୀକୁ ଜଣାଇଥିଲେ। ଅଗ୍ନିଶମ ବାହିନୀ ଏବଂ ରେଲ୍ଓ୍ବେ ଟେକ୍ନିସିଆନ ପହଞ୍ଚି ଲିକ୍କୁ ଆୟତ୍ତ କରିଥିଲେ। ଏହାପରେ ଅକ୍ସିଜେନ ବୋଝେଇ ଟ୍ୟାଙ୍କରଗୁଡ଼ିକ ବିଶାଖାପାଟଣା ଅଭିମୁଖେ ଯାଇଛି। ଅନ୍ୟପକ୍ଷରେ ଠିକଣା ସମୟରେ ପଦକ୍ଷେପ ଯୋଗୁ ଏକ ବଡ଼ ଦୁର୍ଘଟଣା ଟଳିଯାଇଥିବା ଜଣାପଡ଼ିଛି।
