ଦିଗପହଣ୍ଡି,୧୧।୩ (ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ସ୍ଥିତ ଖେମୁଣ୍ଡି ଓକିଲ ସଂଘର ବରିଷ୍ଠ ସଦସ୍ୟ ଲକ୍ଷ୍ମୀ ନାରାୟଣ ପାଢ଼ୀଙ୍କ ବାଇକ ଚୋରି ମାମଲାରେ ବୁଧବାର କୋର୍ଟଙ୍କ ଗୁରୁତ୍ୱପୂର୍ଣ୍ଣ ରାୟ ପ୍ରକାଶ ପାଇଛି। ଆବଶ୍ୟକ ସାକ୍ଷ୍ୟ ପ୍ରମାଣ ଅଭାବରୁ ଅଭିଯୁକ୍ତ ଜଗନ୍ନାଥ ବିଷୋୟୀଙ୍କୁ ଦିଗପହଣ୍ଡି ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ (JMFC) ନିଳିମା ଷଡ଼ଙ୍ଗୀ ନିର୍ଦ୍ଦୋଷରେ ଖଲାସ କରିଛନ୍ତି।
ଗତ ୨୦୨୫ ନଭେମ୍ବର ୨୦ ତାରିଖ ରାତିରେ ଓକିଲ ପାଢ଼ୀ ତାଙ୍କର ୟାମାହା ବାଇକଟିକୁ ନିଜ ଘର ସମ୍ମୁଖରେ ରଖିଥିଲେ। ପରଦିନ ସକାଳେ ବାଇକଟି ଚୋରି ହୋଇଯାଇଥିବା ଜାଣିବାକୁ ପାଇ ସେ ଦିଗପହଣ୍ଡି ଥାନାରେ ଏତଲା ଦେଇଥିଲେ। ପୋଲିସ ଏହି ଅଭିଯୋଗକୁ ଭିତ୍ତି କରି ମାମଲା ରୁଜୁ କରିବା ସହ ସାନଖେମୁଣ୍ଡି ବ୍ଲକ ଜଗନ୍ନାଥପୁର ଗ୍ରାମର ଜଗନ୍ନାଥଙ୍କୁ ଗିରଫ କରିଥିଲା। ପୋଲିସ ତାଙ୍କ ନିକଟରୁ ବାଇକ ଜବତ କରି କୋର୍ଟରେ ଚାର୍ଜସିଟ ଦାଖଲ କରିଥିଲା।
ମାମଲା ନମ୍ବର ଜି.ଆର – ୫୨୨/୨୫ ଅନୁଯାୟୀ, ସମୁଦାୟ ୫ ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା। ଅଭିଯୁକ୍ତ ଜଗନ୍ନାଥ ନିଜ ପାଇଁ ଓକିଲ ରଖିବାକୁ ଅସମର୍ଥ ହେବାରୁ, କୋର୍ଟଙ୍କ ପକ୍ଷରୁ ଓକିଲ ମନୋରଞ୍ଜନ ପଣ୍ଡାଙ୍କୁ ତାଙ୍କ ପାଇଁ ମାମଲା ପରିଚାଳନା କରିବାକୁ (SDC ଭାବେ) ନିଯୁକ୍ତ କରାଯାଇଥିଲା।
ବୁଧବାର ଏହି ମାମଲାର ଚୂଡ଼ାନ୍ତ ଶୁଣାଣି ସମୟରେ, ଅଭିଯୁକ୍ତଙ୍କ ବିରୋଧରେ କୌଣସି ଦୃଢ଼ ସାକ୍ଷ୍ୟ ପ୍ରମାଣ ମିଳି ନ ଥିଲା। ଫଳରେ ମାଜିଷ୍ଟ୍ରେଟ ଷଡ଼ଙ୍ଗୀ ଅଭିଯୁକ୍ତଙ୍କୁ ସମସ୍ତ ଦଫାରୁ ମୁକ୍ତ କରିବା ସହ ନିର୍ଦ୍ଦୋଷରେ ଖଲାସ କରିଛନ୍ତି।
