ନୂଆଦିଲ୍ଲୀ,୨ା୧:ଗତବର୍ଷ ନଭେମ୍ବରରେ କେନ୍ଦ୍ର ସରକାର ଅନୁମୋଦନ କରିଥିବା ‘ଓ୍ବାନ୍ ନେଶନ୍ ଓ୍ବାନ୍ ସବ୍ସ୍କ୍ରିପ୍ଶନ’ (ଓଏନ୍ଓଏସ୍) ଯୋଜନାର ପ୍ରଥମ ପର୍ଯ୍ୟାୟ ବୁଧବାର ନବବର୍ଷରେ ଆରମ୍ଭ ହୋଇଛି। ମୋଟ ୬,୦୦୦ କୋଟି ଟଙ୍କା ଆବଣ୍ଟନରେ କରାଯାଇଥିବା ଏହି ଯୋଜନାରୁ ୧.୮ କୋଟି ଛାତ୍ରୀଛାତ୍ର, ଗବେଷକ ଓ ଫାକଲ୍ଟି ସଦସ୍ୟ ଲାଭାନ୍ବିତ ହେବେ। ଦେଶର ସମସ୍ତ ବ୍ୟକ୍ତିଙ୍କୁ ଗବେଷଣାମୂଳକ ଇ-ଜର୍ନାଲର ସୁବିଧା ଉପଲବ୍ଧ କରାଇବା ଉଦ୍ଦେଶ୍ୟରେ ଭାରତ ସରକାରଙ୍କ ପ୍ରମୁଖ ବୈଜ୍ଞାନିକ ପରାମର୍ଶଦାତା (ପିଏସ୍ଏ)ଙ୍କ କାର୍ଯ୍ୟାଳୟ ପକ୍ଷରୁ ଓଏନ୍ଓଏସ୍ କାର୍ଯ୍ୟକ୍ରମ ଆରମ୍ଭ ହୋଇଛି। ଏହାଦ୍ୱାରା ବିଜ୍ଞାନ, ଟେକ୍ନୋଲୋଜି, ଇଞ୍ଜିନିୟରିଂ, ଗଣିତ (ଏସ୍ଟିଇଏମ୍), ମେଡିସିନ, ମ୍ୟାନେଜ୍ମେଣ୍ଟ, ହ୍ୟୁମାନିଟିଜ୍ ଏବଂ ସାମାଜିକ ବିଜ୍ଞାନ ଆଦି ବିଷୟରେ ଆଗଧାଡ଼ିର ପ୍ରକାଶକଙ୍କ ଗବେଷଣାମୂଳକ ନିବନ୍ଧଗୁଡ଼ିକରେ ସେମାନେ ଜ୍ଞାନ ଆହରଣ କରିପାରିବେ। ଏହି ଯୋଜନାରେ ଦେଶର ବିଶ୍ୱବିଦ୍ୟାଳୟ, କଲେଜ, ଗବେଷଣା ଓ ଉନ୍ନୟନ ପ୍ରତିଷ୍ଠାନ ଭଳି ୬,୪୦୦ ଅନୁଷ୍ଠାନକୁ ସାମିଲ କରାଯାଇଛି। ୨୦୨୫, ୨୦୨୬ ଓ ୨୦୨୭ ଏହି ଭଳି ଭାବେ ୩ ବର୍ଷ ଧରି ପିଏମ୍-ଓଏନ୍ଓଏସ୍ ପାଇଁ ୬,୦୦୦ କୋଟି ଟଙ୍କା ଅନୁଦାନ ଦିଆଯିବ।
