ଛତ୍ରପୁର,୧୧।୬(ଦିଲୀପ ସାମଲ): ଛତ୍ରପୁର ପୌରପରିଷଦରେ ସମସ୍ତଙ୍କ ଆଖିକୁ ଲୁହରେ ଓଦା କରି ପଞ୍ଚଭୂତରେ ଲୀନ ହେଲେ ଛତ୍ରପୁର ପୌରପରିଷଦ ଅଧ୍ୟକ୍ଷା ସ୍ଵର୍ଗତା ଶର୍ମିଷ୍ଠା ପ୍ରଧାନ। ମୃତ୍ୟୁ ବେଳେ ତାଙ୍କୁ ୩୮ ବର୍ଷ ବୟସ ହୋଇଥିଲା। ଚର୍ଚ୍ଚ ରୋଡ ସ୍ଥିତ ବାସଭବନରେ ଭୁବନେଶ୍ବର ଏମ୍ସରୁ ତାଙ୍କ ପାର୍ଥିବ ଶରୀର ପହଁଞ୍ଚିବା ପରଠାରୁ ଶେଷ ଦର୍ଶନ କରିବା ପାଇଁ ନିଜ ସମ୍ପର୍କୀୟଙ୍କ ସହିତ ବହୁ ସଂଖ୍ୟାରେ ତାଙ୍କ ପ୍ରଶଂସକଙ୍କ ଭିଡ଼ ଲାଗିରହିଥିଲା।
ସୂଚନାଯୋଗ୍ୟ ଯେ ଦୀର୍ଘଦିନ ଧରି ଭୁବନେଶ୍ଵର ଏମ୍ସ ଠାରେ ଶର୍ମିଷ୍ଠା ଚିକିତ୍ସିତ ହୋଇଆସୁଥିଲା। ବୁଧବାର ସନ୍ଧ୍ୟା ୬ଟା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତ୍ୟୁ ଖବର ପାଇବା ପରଠାରୁ ଛତ୍ରପୁର ସହରରେ ଶୋକର ଛାୟା ଖେଳି ଯାଇଥିଲା। ଖବର ପାଇବା ମାତ୍ରେ ବୁଧବାର ରାତିରେ ଓଡ଼ିଶାର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା, ରାଜ୍ୟ ପରିବହନ, ଖଣି, ଇସ୍ପାତ ଓ ବାଣିଜ୍ୟ ବିଭାଗର ମନ୍ତ୍ରୀ ବିଭୂତି ଭୂଷଣ ଜେନା, ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ବିଭାଗର ମନ୍ତ୍ରୀ ଗୋକୁଳାନନ୍ଦ ମଲ୍ଲିକ, ଛତ୍ରପୁର ବିଧାୟକ କୃଷ୍ଣ ଚନ୍ଦ୍ର ନାୟକ, ଦିଗପହଣ୍ଡି ବିଧାୟକ ସିଦ୍ଧାନ୍ତ ମହାପାତ୍ର ପ୍ରମୁଖ ‘ଏକ୍ସ’ ମାଧ୍ୟମରେ ଟ୍ୱିଟ୍ କରି ଗଭୀର ଶୋକ ପ୍ରକାଶ କରିଥିଲେ।
ଶର୍ମିଷ୍ଠା ଜଣେ ଲୋକପ୍ରିୟ, ସ୍ନେହୀ ଏବଂ ଦକ୍ଷ ଜନପ୍ରତିନିଧି ଥିଲେ। ତାଙ୍କର ବିୟୋଗରେ ଛତ୍ରପୁର ସମତେ ଆଖପାଖର ସମସ୍ତ ଲୋକମାନେ ଦୁଃଖରେ ମର୍ମାହତ ହୋଇପଡ଼ିଛନ୍ତି। ସ୍ଥାନୀୟ ବିଧାୟକ କୃଷ୍ଣ ଚନ୍ଦ୍ର ନାୟକ, ଜିଲା ଭାଜପା ଅଧ୍ୟକ୍ଷ ସରୋଜ କୁମାର ସାବତ, ପୌରପରିଷଦର ଉପାଧ୍ୟକ୍ଷ ଜି. ପାପା ରାଓ, ସମସ୍ତ କାଉନସିଲର୍, ଜିଲାପରିଷଦ ମୁଖ୍ୟ ଉନ୍ନୟନ ଅଧିକାରୀ ସମୀର କୁମାର ଜେନାଙ୍କ ସମେତ ଅନେକ ସମାଜ ସେବୀ, ବୁଦ୍ଧିଜୀବୀ, ପୌରପରିଷଦ ଅଧିକାରୀ ଏବଂ କର୍ମଚାରୀମାନେ ଅଶ୍ରୁଳ ଶ୍ରଦ୍ଧାଞ୍ଜଳି ଦେଇଥିଲେ ।
ସ୍ଵର୍ଗତା ଶର୍ମିଷ୍ଠାଙ୍କ ପାର୍ଥିବ ଶରୀରକୁ ହଜାର ହଜାର ଲୋକଙ୍କ ସମାଗମରେ ନଗର ପରିକ୍ରମା ପରେ ଭାଜପା କାର୍ଯ୍ୟାଳୟରେ ଶେଷ ଦର୍ଶନ ଲାଗି କିଛି ସମୟ ରଖିବା ପରେ ପୌରପରିଷଦ କାର୍ଯ୍ୟାଳୟରେ କିଛି ସମୟ ରଖା ଯାଇଥିଲା। ପରେ ତାଙ୍କ ଶେଷକୃତ୍ୟ ସ୍ଥାନୀୟ ପୂତିଗୋପାଳପୁର ଶ୍ମସାନରେ ତାଙ୍କ ଏକମାତ୍ର ପୁତ୍ର ମୁଖାଗ୍ନି ଦେଇଥିଲେ। ସ୍ଵାମୀ ତଥା ଯୁବ ଭାଜପା ନେତା କେ. ଚନ୍ଦ୍ରଶେଖର ରେଡ୍ଡୀ ସ୍ଵର୍ଗତା ସ୍ତ୍ରୀ ଶର୍ମିଷ୍ଠାଙ୍କୁ କୋହ ଭରା ହୃଦୟରେ ଶେଷ ବିଦାୟ ଦେଇଥିଲେ।
