ଦେବଗଡ଼,୨୫ା୪(ଶଶାଙ୍କ ଶେଖର ଝାଙ୍କର): ସରକାରୀ କାର୍ଯ୍ୟାଳୟ ନିର୍ମାଣ ନିମନ୍ତେ ବାରକୋଟ ବ୍ଲକ ବିଜୟନଗର ପଞ୍ଚାୟତର ଅଁଳାପୋଶି (ଘୁରୁଡୁଖମଣ ରାଜସ୍ବ ଗ୍ରାମ ଅଧିନସ୍ଥ ପଡ଼ା ଗ୍ରାମ)ରେ ସରକାରଙ୍କ ପକ୍ଷରୁ ଜମି ଅଧିଗ୍ରହଣ ସମୟରେ ଉତ୍ତେଜନା ପ୍ରକାଶ ପାଇଥିଲା। ଅଁଳାପଶି ଗ୍ରାମର ବହୁ ପୁରୁଷ ଏବଂ ମହିଳା ପିଲାଛୁଆ ଧରି ଏହାର ବିରୋଧ କରିବା ସହ ଜେସିବି ମେଶିନ ସମ୍ମୁଖରେ ବସି ରହିବାରୁ ସେଠାରେ ଏକ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ଫଳରେ ସେଠାରେ ପୋଲିସକୁ ୨ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରିବାକୁ ପଡ଼ିଥିଲା। ତେବେ ଦେବଗଡ଼ ଥାନା ଅଧିକାରୀ ଶବ୍ୟସାଚୀ ଶତପଥୀ ମାଜିଷ୍ଟ୍ରେଟ୍ ଦାୟିତ୍ୱରେ ଥିବା ବାରକୋଟ ତହସିଲର ଅତିରିକ୍ତ ତହସିଲଦାର ବବୃବାହନ ଦତ୍ତ,ବିଜୟନଗର ପଞ୍ଚାୟତର ସରପଞ୍ଚ ଦୀପକ ନାୟକ, ପୂର୍ବତନ ସରପଞ୍ଚ ଦେବାନନ୍ଦ ନାୟକ ଓ ସାମାଜିକ କର୍ମୀ ହୀରାଧର ସାହୁଙ୍କ ଉପସ୍ଥିତିରେ ଆନ୍ଦୋଳନକାରୀଙ୍କୁ ବୁଝାଇବା ସହ ଅକ୍ତିଆରରେ ରଖିଥିବା ସରକାରୀ ଜମିକୁ ଦଖଲମୁକ୍ତ ପାଇଁ ଛାଡ଼ି ଦେବାକୁ ୪ ଦିନର ଅବଧି ପ୍ରଦାନ କରିଥିଲେ। ଫଳରେ ପରିସ୍ଥିତି ଶାନ୍ତ ପଡ଼ିବା ସହ ଗ୍ରାମବାସୀ ଏବଂ ପୋଲିସ କର୍ମଚାରୀ ନିଜ ନିଜ ବାଟରେ ଫେରିଯାଇଥିଲେ।ଅନ୍ୟପକ୍ଷରେ ଗ୍ରାମବାସୀ ପ୍ରଶାସନର ନିଷ୍ପତ୍ତି ବିରୋଧରେ ସୋମବାର ପୁଣିଥରେ ଜିଲାପାଳଙ୍କ ଅଭିଯୋଗ ପ୍ରକୋଷ୍ଠର ଦ୍ୱାରସ୍ଥ ହେବେ ବୋଲି ଜଣାପଡ଼ିଛି ।
ସୂଚନାଯୋଗ୍ୟ, ଅଁଳାପୋଶି ଗ୍ରାମ ନିକଟସ୍ଥ ୪୯ ନମ୍ବର ଜାତୀୟ ରାଜପଥ କଡ଼ରେ ସରକାରୀ କାର୍ଯ୍ୟାଳୟ ନିର୍ମାଣ ପାଇଁ ପ୍ରଶାସନ ପକ୍ଷରୁ ଇତି ମଧ୍ୟରେ ଜମି ଚିହ୍ନଟ ପ୍ରକ୍ରିୟା ଶେଷ ହୋଇଯାଇଛ। ମାତ୍ର ଦୀର୍ଘ ୬୦ ବର୍ଷରୁ ଊର୍ଦ୍ଧ୍ୱ ସମୟ ହେଲା ଉକ୍ତ ଗ୍ରାମର ଜଙ୍ଗଲ ଏବଂ ସରକାରୀ ଜମି ଉପରେ ନିର୍ଭର କରି ଚଳୁଥିବା ଦର୍ଶାଇ ସେଠାରେ କୌଣସି କାର୍ଯ୍ୟାଳୟ ନିର୍ମାଣ ପାଇଁ ଜମି ଛାଡ଼ିବେ ନାହିଁ ବୋଲି ଅଁଳାପୋଶି ଗ୍ରାମବାସୀ ଜିଲା ପ୍ରଶାସନକୁ ପୂର୍ବରୁ ଲିଖିତ ଚେତାବନୀ ଦେଇଥିଲେ। ସେହିପରି ଗତ ବୁଧବାର ସେମାନେ ବାରକୋଟ ତହସିଲଦାରଙ୍କ କାର୍ଯ୍ୟାଳକୁ ଆସି ତହସିଲଦାରଙ୍କୁ ସାକ୍ଷାତ କରିବା ସହ ବିକଳ୍ପ ବ୍ୟବସ୍ଥା ନ କରିବା ପର୍ଯ୍ୟନ୍ତ ସେମାନେ ଚାଷ କରୁଥିବା ଜମିକୁ ସରକାରୀ କାର୍ଯ୍ୟାଳୟ ନିର୍ମାଣ ପାଇଁ ଛାଡ଼ିବେ ନାହିଁ ବୋଲି ଲିଖିତ ଚେତାବନୀ ଦେଇଥିଲେ।
