ନୂଆଦିଲ୍ଲୀ, ୧୬ା୫(ପି.ଟି.)-ତାସ୍କେଣ୍ଟରେ ମେ’ ୨୩ରୁ ୩୧ ପର୍ଯ୍ୟନ୍ତ ହେବାକୁଥିବା ବିଶ୍ୱ ଜୁନିୟର ଚାମ୍ପିୟନଶିପ୍ରେ ଭାଗ ନେବା ଲାଗି ୟୁଥ ଅଲିମ୍ପିକ୍ସ ସ୍ବର୍ଣ୍ଣ ବିଜେତା ଭାରୋତ୍ତୋଳକ ଜେରେମି ଲାଲରିନୁଙ୍ଗା (୬୭କେଜି) ମଙ୍ଗଳବାର ଗସ୍ତ କରିବେ। ତାଙ୍କ ସହିତ ଅଚିନ୍ତା ଶିଉଳି(୭୩କେଜି) ମଧ୍ୟ ଯିବେ। ଭାରତୀୟ ଭାରୋତ୍ତୋଳନ ମହାସଂଘ (ଆଇଡବ୍ଲ୍ୟୁଏଲ୍ଏଫ୍)ତରଫରୁ ସେମାନଙ୍କ ଗସ୍ତ ପାଇଁ ଆବଶ୍ୟକ ବ୍ୟବସ୍ଥା କରାଯାଇଛି। ଦୁଇଜଣଙ୍କ ଲାଗି ବିମାନ ଟିକେଟ ହୋଇସାରିଥିବା ଆଇଡବ୍ଲ୍ୟୁଏଲ୍ଏଫ୍ ସମ୍ପାଦକ ସହଦେବ ଯାଦବ ସୂଚନା ଦେଇଛନ୍ତି। ଉଜବେକିସ୍ତାନରେ ଲାଲ୍ରିନିଙ୍ଗା ଓ ଶିଉଳିଙ୍କୁ କ୍ୱାରାଣ୍ଟାଇନରେ ରହିବାକୁ ପଡ଼ିବ ନାହିଁ। ସେମାନଙ୍କୁ କେବଳ ନେଗେଟିଭ ସାର୍ଟିଫିକେଟ ଦେବାକୁ ପଡ଼ିବ। ମୁଖ୍ୟ କୋଚ୍ ବିଜୟ ଶର୍ମାଙ୍କ ଅନୁପସ୍ଥିତିରେ ଦୁଇ ଭାରୋତ୍ତୋଳକଙ୍କ ସହ କୋଚ୍ ପ୍ରମୋଦ ଶର୍ମା ଓ ବିଜାଇ ରୋହିଲା ଯିବେ। ବିଜୟ ଶର୍ମା ବର୍ତ୍ତମାନ ଅଲିମ୍ପିକ ଷ୍ଟାର ଭାରୋତ୍ତୋଳିକା ମୀରାବାଈ ଚାନୁଙ୍କ ସହ ଆମେରିକାରେ ଅଛନ୍ତି।
