ପାଟନା,୨୬।୩ : କଂଗ୍ରେସର ରାହୁଲ ଗାନ୍ଧୀଙ୍କୁ ଲୋକସଭା ସଦସ୍ୟତାରୁ ଅଯୋଗ୍ୟତା ଘୋଷଣା ପରେ ରବିବାର ଦଳର ନେତା ଓ କର୍ମୀମାନେ ସତ୍ୟାଗ୍ରହ ପାଳନ କରିଛନ୍ତି। ବର୍ତ୍ତମାନ ଅନ୍ୟ ଦଳ ମଧ୍ୟ ଏହି ପ୍ରସଙ୍ଗରେ ଖୋଲାଖୋଲି ଭାବେ ରାହୁଲଙ୍କୁ ସମର୍ଥନ କରୁଛନ୍ତି ଏବଂ ବିରୋଧୀ ଦଳର ସ୍ବରକୁ ଦମନ କରିବାକୁ କେନ୍ଦ୍ର ସରକାର ଉଦ୍ୟମ ଅଭିଯୋଗ କରୁଛନ୍ତି। ଜନତା ଦଳ ୟୁନାଇଟେଡର ରାଷ୍ଟ୍ରୀୟ ଅଧ୍ୟକ୍ଷ ଲଲନ ସିଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟୁଇଟ କରି ତାଙ୍କର ପୁରୁଣା ବିବୃତ୍ତି ବିଷୟରେ ମନେ ପକାଇଛନ୍ତି।
ଲଲନ କହିଛନ୍ତି, ଭାଜପାର ଛୋଟରୁ ବଡ ନେତା ପର୍ଯ୍ୟନ୍ତ ସମସ୍ତେ କହୁଛନ୍ତି ଯେ ଦେଶର ସମ୍ମାନିତ ପ୍ରଧାନମନ୍ତ୍ରୀଙ୍କ ବିରୋଧରେ କହିବା ପଛୁଆ ବର୍ଗଙ୍କ ପ୍ରତି ଅପମାନ ଅଟେ । ତେବେ ଏହାକୁ ନେଇ ମୁଁ ହସୁଛି। ମୁଁ ପ୍ରଧାନମନ୍ତ୍ରୀଙ୍କୁ ୨୫ ଜୁଲାଇ୨୦୧୫ରେ ସେ କହିଥିବା ମନ୍ତବ୍ୟ ସ୍ମରଣ କରାଇବା ପାଇଁ ଚାହୁଁଛି। ଯେତେବେଳେ ପ୍ରଧାନମନ୍ତ୍ରୀ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଡିଏନଏ ଉପରେ ପ୍ରଶ୍ନ ଉଠାଇଥିଲେ। କେଉଁ ବର୍ଗରୁ ନୀତୀଶ କୁମାର ଆସନ୍ତି ? ଅନ୍ତତଃ ପକ୍ଷେ ଭାଜପା ନେତାମାନେ ତାହାର ଉତ୍ତର ଦିଅନ୍ତୁ ବୋଲି ଲଲନ କହିଛନ୍ତି।
ରାହୁଲଙ୍କ ସଦସ୍ୟତାକୁ ଯେଭଳି ରଦ୍ଦ କରାଯାଇଛି ତାହା ସ୍ପଷ୍ଟ ଭାବେ ଦର୍ଶାଉଛି ଯେ ଏହି ନିଷ୍ପତ୍ତି ଶୀଘ୍ର ନିଆଯାଇଛି।
