କେନ୍ଦୁଝର, ୭ା୧୦(ସ୍ବ.ପ୍ର.): ପେଟପାଟଣା ପାଇଁ ଅନେକ ଲୋକ ବିଭିନ୍ନ ପ୍ରକାରର କାମ କରୁଛନ୍ତି। ଏଭଳି ଝୁମ୍ପୁରା ବ୍ଲକର ଇସଲାମ ଭାରତୀ, ଅନଓ୍ବାର ଖାନ ଗାଁ ଗାଁ ବୁଲି ଲୋକଙ୍କ ପାଇଁ ତକିଆ, ଗଦି, ରେଜେଇ ଆଦି କାମ କରନ୍ତି। ଏଥିପାଇଁ କପା, ଶିମିଳି, ସ୍ପଞ୍ଜ ତୁଳା ବ୍ୟବହାର କରିଥାନ୍ତି। ସେମାନଙ୍କ ଘର ବିହାର ରାଜ୍ୟ ପାଟନା ଅଞ୍ଚଳରେ। କିନ୍ତୁ ଝୁମ୍ପୁରାରେ ଥଇଥାନ ହୋଇ ଦୀର୍ଘ ୩୦ ବର୍ଷ ହେଲା ତୁଳା କାମ କରିଆସୁଛନ୍ତି ବୋଲି ଇସଲାମ କୁହନ୍ତି।
ଏହି ତୁଳା କାମ ସେମାନଙ୍କ କୌଳିକ ବୃତ୍ତି। ଏଥିପାଇଁ କଠିନ ପରିଶ୍ରମ କରିବାକୁ ପଡୁଥିଲେ ହେଁ ଅନେକ ସମୟରେ ପରିଶ୍ରମ ଅନୁଯାୟୀ ଲାଭ ମିଳୁନାହିଁ ବୋଲି ସେମାନେ କହିଛନ୍ତି। ଆଜିକାଲି ବିଭିନ୍ନ କମ୍ପାନୀର ଗଦି ବଜାରରେ ମିଳୁଥିଲେ ହେଁ ଏହି ତୁଳା ଗଦି, ରେଜେଇ, ତକିଆ ଆଦିର ଚାହିଦା ରହିଛି ା ବିଶେଷ କରି ଗ୍ରାମାଞ୍ଚଳରେ ଅଧିକ ରହିଛି। ବିଭିନ୍ନ କାରଣରୁ କପା, ଶିମିଳି ତୁଳାର ଉତ୍ପାଦନ କମୁଥିବାରୁ ଏହାର ସ୍ଥାନ ଆଜିକାଲି ଶସ୍ତା ସ୍ପଞ୍ଜ ତୁଳା ବା ନାଇଲନ ତୁଳା ନେଇଛି ା କିନ୍ତୁ କପା, ଶିମିଳି ତୁଳା ଦେହ ପକ୍ଷେ ସ୍ବାସ୍ଥ୍ୟ କର। ଏଣୁ ଏହାକୁ ବଡ଼ବଡ଼ିଆ ମାନେ ଅଧିକ ବ୍ୟବହାର କରୁଛନ୍ତି । ସେମାନେ ବାଲେଶ୍ୱରରୁ ତୁଳା କିଣି ଆଣି ଗାଁ ଗାଁ ବୁଲି ଲୋକଙ୍କ ଆବଶ୍ୟକତା ଅନୁଯାୟୀ କାମ କରିଥାନ୍ତି। ମାସକୁ ପରିଶ୍ରମ କରି ୧୦/୧୨ ହଜାର ଟଙ୍କା ରୋଜଗାର କରିଥାନ୍ତି। ଆଗରୁ ତୁଳା, କନା ସବୁର ଦାମ୍ କମ ଥିଲା। ଏବେ ସବୁ ମହଙ୍ଗା ହୋଇଗଲାଣି। ଏଣୁ ଆଗଭଳି ଲାଭ ହେଉନାହିଁ ବୋଲି ସେମାନେ କୁହନ୍ତି ା ସକାଳ ୮ଟାରେ ଘରୁ ଲୁନା ଗାଡିରେ ତୁଳା ଓ ରେଜେଇ ପ୍ରସ୍ତୁତ ସାମଗ୍ରୀ ଧରି ବାହାରିଯାଆନ୍ତି ା କାମ ସାରି ୪ଟାରେ ଫେରନ୍ତି ା ଅନେକ ସମୟରେ କାମ ମିଳିଗଲେ ଡେରିରେ ଫେରିଥାନ୍ତି। ଅନେକ ଦିନ କାମ ନ ମିଳିଲେ ନିରାଶ ହୋଇ ଫେରନ୍ତି ା ରାସ୍ତା କଡରେ ବା ଗାଁ ମୁଣ୍ଡରେ ଛାଇରେ ବସି ଘରୁ ପ୍ରସ୍ତୁତ କରି ନେଇଥିବା ଖାଦ୍ୟକୁ ମଧ୍ୟାହ୍ନରେ ଖାଇଥାନ୍ତି ବୋଲି କୁହନ୍ତି। ଖରା ଓ ଶୀତ ଦିନରେ ବ୍ୟବସାୟ ଭଲ ହୋଇଥାଏ। ଇସଲାମଙ୍କ ଘରେ ସ୍ତ୍ରୀ, ୩ ଝିଅ ଓ ୨ ପୁଅ ଅଛନ୍ତି ା ସେହିପରି ଅନଓ୍ବାରଙ୍କ ତିନି ଝିଅ। ସମସ୍ତେ ମଦ୍ରାସାରେ ପଢୁଛନ୍ତି।
