ଭୁବନେଶ୍ୱର,୧୧।୭ (ଅଭୟ ଦାଶ): ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ ମନ୍ତ୍ରଣାଳୟ ଅଧୀନ ଖଦି ଏବଂ ଗ୍ରାମୋଦ୍ୟୋଗ ଆୟୋଗ (ଖଦି ଆଣ୍ଡ ଭିଲେଜ ଇଣ୍ଡଷ୍ଟ୍ରିଜ କମିଶନ ବା କେଭିଆଇସି) ଉଲ୍ଲେଖନୀୟ ସଫଳତା ସହ ନୂତନ ମାଇଲଖୁଣ୍ଟ ହାସଲ କରିଛି। ଏପରିକି ୨୦୨୩-୨୪ ଆର୍ଥିକ ବର୍ଷରେ ଆୟୋଗ ଉତ୍ପାଦନ, ବିକ୍ରୟ ଏବଂ ନୂତନ ନିଯୁକ୍ତି ସୃଷ୍ଟିରେ ଏକ ନୂଆ ରେକର୍ଡ ମଧ୍ୟ ସୃଷ୍ଟି କରିଛି। ଏହି ପରିପ୍ରେକ୍ଷୀରେ କେଭିଆଇସି ଅଧ୍ୟକ୍ଷ ମନୋଜ କୁମାର ୨୦୨୩-୨୪ ଆର୍ଥିକ ବର୍ଷର ଅସ୍ଥାୟୀ ତଥ୍ୟ ପ୍ରକାଶ କରି କହିଛନ୍ତି, କେଭିଆଇସିର ପୂର୍ବ ସମସ୍ତ ତଥ୍ୟକୁ ଅତିକ୍ରମକରି ଆୟୋଗ ନୂଆ ଇତିହାସ ସୃଷ୍ଟି କରିଛି। ଏପରିକି କେଭିଆଇସି ୧.୫ ଲକ୍ଷ କୋଟି ଟଙ୍କାର କାରବାର ଅତିକ୍ରମ କରିଥିବାବେଳେ ୨୦୧୩-୧୪ ଆର୍ଥିକ ବର୍ଷ ତୁଳନାରେ ନୂତନ ନିଯୁକ୍ତି ୩୯୯.୬୯%, ଉତ୍ପାଦନ ୩୧୪.୭୯% ଏବଂ ନୂତନ ନିଯୁକ୍ତି ୮୦.୯୬% ବୃଦ୍ଧି ଘଟିଛି। ସେହିଭଳି ୨୦୧୩-୧୪ ଆର୍ଥିକ ବର୍ଷ ତୁଳନାରେ ୨୦୨୨-୨୩ ଆର୍ଥିକ ବର୍ଷର ବିକ୍ରିରେ ୩୩୨.୧୪%, ଉତ୍ପାଦନରେ ୨୬୭.୫୨% ଏବଂ ନୂତନ ନିଯୁକ୍ତି ସୃଷ୍ଟିରେ ୬୯.୭୫% ବୃଦ୍ଧି ଘଟିଛି, କେଭିଆଇସିର ଏହି ଉଲ୍ଲେଖନୀୟ ପ୍ରଦର୍ଶନ ୨୦୪୭ ସୁଦ୍ଧା ବିକଶିତ ଭାରତର ସ୍ବପ୍ନକୁ ସାକାର କରିବା ଏବଂ ଭାରତକୁ ବିଶ୍ୱର ତୃତୀୟ ବୃହତ୍ତମ ଅର୍ଥନୀତିରେ ପରିଣତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛି। ସ୍ବାଧୀନ ଭାରତର ଇତିହାସରେ ପ୍ରଥମ ଥର ପାଇଁ ୨୦୨୩-୨୪ଆର୍ଥିକ ବର୍ଷରେ କେଭିଆଇସି ଉତ୍ପାଦର ବିକ୍ରି ପରିମାଣ ପ୍ରାୟ ୧.୫୫ ଲକ୍ଷ କୋଟି ଟଙ୍କା ଅତିକ୍ରମ କରିଛି। ୨୦୨୨-୨୩ ଆର୍ଥିକ ବର୍ଷରେ ବିକ୍ରି ପରିମାଣ ୧.୩୪ଲକ୍ଷ କୋଟି ଟଙ୍କା ଥିଲା। ସେହିପରି ବିଗତ ୧୦ବର୍ଷ (ଆର୍ଥିକ ବର୍ଷ)ରେ ଗ୍ରାମାଞ୍ଚଳର କାରିଗରମାନଙ୍କ ଦ୍ୱାରା ପ୍ରସ୍ତୁତ ଦେଶୀ ଖଦି ଓ ଗ୍ରାମୋଦ୍ୟୋଗ ଉତ୍ପାଦର ବିକ୍ରି ୨୦୧୩-୧୪ ଆର୍ଥିକ ବର୍ଷରେ ୩୧,୧୫୪.୨୦କୋଟି ଟଙ୍କା ଥିବା ବେଳେ ୨୦୨୩-୨୪ ଆର୍ଥିକ ବର୍ଷରେ ଏହା ସର୍ବାଧିକ ୧,୫୫,୬୭୩.୧୨ କୋଟି ଟଙ୍କାକୁ ବୃଦ୍ଧି ପାଇଛି, ଯାହା କି ଏ ପର୍ଯ୍ୟନ୍ତର ସବୁଠାରୁ ବଡ଼ ସଫଳତା। ୨୦୨୩-୨୪ ଆର୍ଥିକ ବର୍ଷରେ କେଭିଆଇସିର ପ୍ରୟାସ ଗ୍ରାମୀଣ ଅଞ୍ଚଳରେ ୧୦.୧୭ ଲକ୍ଷ ନୂତନ ନିଯୁକ୍ତି ସୃଷ୍ଟି କରିଛି, ଯାହା ଗ୍ରାମୀଣ ଭାରତର ଅର୍ଥନୀତିକୁ ସୁଦୃଢ଼ କରିଛି। ୨୦୧୩-୧୪ ଆର୍ଥିକ ବର୍ଷରେ ୨୬,୧୦୯.୦୮କୋଟି ଟଙ୍କା ଥିବା କେଭିଆଇସି ଉତ୍ପାଦର ଉତ୍ପାଦନ ୨୦୨୩-୨୪ ଆର୍ଥିକ ବର୍ଷରେ ୧,୦୮,୨୯୭.୬୮ କୋଟି ଟଙ୍କାରେ ପହଞ୍ଚତ୍ଛି, ଯାହା କି ୩୧୪.୭୯% ବୃଦ୍ଧି ପାଇଥିବା ବେଳେ ୨୦୨୨-୨୩ ଆର୍ଥିକ ବର୍ଷରେ ଉତ୍ପାଦନ ୯୫,୯୫୬.୬୭କୋଟି ଟଙ୍କା ରହିଛି। ଏହି କ୍ରମାଗତ ଉତ୍ପାଦନ ବୃଦ୍ଧି ହେଉଛି କେଭିଆଇସି ଗ୍ରାମାଞ୍ଚଳରେ ଐତିହାସିକ କାର୍ଯ୍ୟ କରିଥିବାର ଦୃଢ଼ ପ୍ରମାଣ। ବିଗତ ୧୦ ବର୍ଷରେ ଖଦି ଏବଂ ଗ୍ରାମୀଣ ଶିଳ୍ପ ଉତ୍ପାଦ ପ୍ରତି ବର୍ଷ ନୂଆ ନୂଆ ବିକ୍ରି ରେକର୍ଡ ସୃଷ୍ଟି କରିଛି। ୨୦୧୩-୧୪ ଆର୍ଥିକ ବର୍ଷରେ ବିକ୍ରି ୩୧,୧୫୪.୨୦ କୋଟି ଟଙ୍କା ଥିବା ବେଳେ ୨୦୨୩-୨୪ ଆର୍ଥିକ ବର୍ଷରେ ଏହା ୧,୫୫,୬୭୩.୧୨କୋଟି ଟଙ୍କାରେ ପହଞ୍ଚିଛି, ଯାହା କି ୩୯୯.୬୯% ବୃଦ୍ଧି ପାଇଛି। ଗତ ୧୦ ବର୍ଷ ମଧ୍ୟରେ ଖଦି କପଡ଼ାର ଉତ୍ପାଦନରେ ମଧ୍ୟ ଅଭୂତ ପୂର୍ବ ବୃଦ୍ଧି ଘଟିଛି। ବର୍ତ୍ତମାନ ସାରା ଦେଶରେ ୪.୯୮ ଲକ୍ଷ ଗ୍ରାମୀଣ ଖଦି କାରିଗର (ସ୍ପିନର ଏବଂ ବୁଣାକାର) ଏବଂ ଶ୍ରମିକ ଖଦି କପଡ଼ା ନିର୍ମାଣରେ ନିୟୋଜିତ ଅଛନ୍ତି। ନୂଆଦିଲ୍ଲୀସ୍ଥିତ ଖଦି ଓ ଗ୍ରାମୋଦ୍ୟୋଗ ଭବନର ବ୍ୟବସାୟରେ ମଧ୍ୟ ଅଭୂତପୂର୍ବ ଅଭିବୃଦ୍ଧି ଘଟିଛି। ଏପରିକି ୨୦୧୩-୧୪ ଆର୍ଥିକ ବର୍ଷରେ ଭବନର ବ୍ୟବସାୟ ୫୧.୧୩ କୋଟି ଟଙ୍କା ଥିବା ବେଳେ ୨୦୨୩-୨୪ ଆର୍ଥିକ ବର୍ଷରେ ଏହା ୮୭.୨୩% ବୃଦ୍ଧି ପାଇ ୯୫.୭୪ କୋଟି ଟଙ୍କାରେ ପହଞ୍ଚିଛି। ଉଲ୍ଲେଖଯୋଗ୍ୟ, ୨୦୨୨-୨୩ ଆର୍ଥିକ ବର୍ଷରେ ଖଦି ଗ୍ରାମୋଦ୍ୟୋଗ ଭବନ ନୂଆଦିଲ୍ଲୀରେ ୮୩.୧୩ କୋଟି ଟଙ୍କାର ବ୍ୟବସାୟ ହୋଇଥିଲା।
