ଭଞ୍ଜନଗର,୨୭।୬(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ନିକଟସ୍ଥ କୁଲାଡରେ ଧୂମଧାମରେ ପାଳିତ ହୋଇଯାଇଛି ରଥଯାତ୍ରା। ଅପରାହ୍ନରେ ଭଞ୍ଜ ରାଜବଂଶର ଉତ୍ତରାଧିକାରୀ ପ୍ରଶାନ୍ତ ଭଞ୍ଜ ଛେରା ପହଁରା କରିବା ପରେ ଭକ୍ତମାନେ ରଥକୁ ଟାଣିଥିଲେ। ରଥଯାତ୍ରାରେ ହଜାର ହଜାର ଭକ୍ତ ଯୋଗଦେଇଥିବା ଜଣାପଡିଛି।
ଘୁମୁସରର ରାଜା ପ୍ରତାପ ଧନଞ୍ଜୟ ଭଞ୍ଜଙ୍କ ଦ୍ୱାରା ଷୋଡ଼ଶ ଶତାବ୍ଦୀରେ ଜଗନ୍ନାଥ, ବଳଭଦ୍ର, ସୁଭଦ୍ରାଙ୍କ ପ୍ରତିମୂର୍ତ୍ତି ସ୍ଥାପନ ହୋଇଥିଲା। ଏହାପରେ ରାଜା କୃଷ୍ଠ ଭଞ୍ଜ ୧୭୫୪ରେ ଘୁମୁସରର ରାଜା ହେବାପରେ ରାଜପ୍ରସାଦକୁ ଲାଗି ଜଗନ୍ନାଥ ମନ୍ଦିର ର୍ନିମାଣକରି ଠାକୁରଙ୍କୁ ସ୍ଥାପନ କରିଥିଲେ। ସେହି ସମୟରୁ କୁଲାଡ ରଥଯାତ୍ରା ପାଳିତ ହୋଇଆସୁଛି। ଶହ ଶହ ବର୍ଷ ଧରି ଭଞ୍ଜ ରାଜବଂଶ ପକ୍ଷରୁ ଉକ୍ତ ରଥଯାତ୍ରା ପାଳିତ ହୋଇ ଆସୁଥିଲା। ପରବର୍ତ୍ତୀ ପର୍ଯ୍ୟାୟରେ ମନ୍ଦିର ପରିଚାଳନା ଦାୟିତ୍ୱ ଦେବୋତ୍ତର ବିଭାଗ ଅଧିନକୁ ଚାଲି ଆସିଥିଲା। ତେଣୁ ଭଞ୍ଜନଗର ଉପଖଣ୍ଡ ପ୍ରଶାସନ ବର୍ତ୍ତମାନ ପରିଚାଳନା ଦାୟିତ୍ୱ ବୁଝୁଛି। ଭଞ୍ଜନଗର ତହସିଲଦାର ମନ୍ଦିରର ତଦାରଖ କରୁଛନ୍ତି।
ତେଣୁ ଆଜି ରଥଯାତ୍ରା କିଭଳି ଶାନ୍ତିଶୃଙ୍ଖଳାର ସହ ପାଳିତ ହେବ, ସେଥିପାଇଁ ଭଞ୍ଜନଗର ଉପ ଜିଲାପାଳ ଉମା ଶଙ୍କର ବେହେରା, ବିଡ଼ିଓ ଭାରତୀ ଦେବୀ, ଅତିରିକ୍ତ ତହସିଲଦାର ଅବିନାଶ ମହାର ପ୍ରମୁଖ ଉପସ୍ଥିତ ରହି ଯାତ୍ରାକୁ ତଦାରଖ କରୁଛନ୍ତି। ଆଇନଶୃଙ୍ଖଳା ଦାୟିତ୍ୱରେ
ଏସଡିପି ଓ ସୁଜିତ୍ ନାୟକ,ଥାନା ଅଧିକାରୀ ଜିବନାନନ୍ଦ ଜେନା ପ୍ରମୁଖ ଅଛନ୍ତି। ଅପରାହ୍ନରେ ଭଞ୍ଜ ରାଜବଂଶର ଉତ୍ତରାଧିକାରୀ ପ୍ରଶାନ୍ତ ଭଞ୍ଜ ଛେରା ପହଁରା କରିବା ପରେ ଭକ୍ତମାନେ ରଥକୁ ଟାଣିଥିଲେ।
ରଥଯାତ୍ରାରେ ହଜାର ହଜାର ଭକ୍ତ ଯୋଗଦେଇଥିବା ଜଣାପଡିଛି । ଏଥିସହ ଭଞ୍ଜନଗର ରଥାସହି, ଭେଜିପୁଟ, ବଡକୋଦଣ୍ଡା ପ୍ରମୁଖ ସ୍ଥାନରେ ରଥଯାତ୍ରା ପାଳିତ ହେଉଛି। ଅପରପକ୍ଷେ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ଆଜି ପୁରୀ ରଥଯାତ୍ରାରେ ଯୋଗଦେଇ ଭକ୍ତଙ୍କ ସେବା କରୁଛନ୍ତି। ତେଣୁ ସେ ପୁରୀ ମଣିରାମ ମଠରେ ଆଜକୁ ୪ ଦିନ ହେବ ଡେରା ପକାଇ ଅଛନ୍ତି। ଆଜି ତାଙ୍କ ତରଫରୁ ହଜାର ହଜାର ଭକ୍ତଙ୍କୁ ପକୁଡ଼ି, ଚଣା ତରକାରୀ, ପଣା ପ୍ରମୁଖ ବଣ୍ଟନ କରାଯାଇଥିଲା । ଏଥିପାଇଁ ଭଞ୍ଜନଗରରୁ ଅନେକ ସ୍ବେଛାସେବୀ ପୁରୀ ଯାଇ ଉକ୍ତ ସେବା କାର୍ଯ୍ୟରେ ଯୋଡ଼ି ହୋଇଥିଲେ।
