ବ୍ରହ୍ମପୁର,୨ା୪:ଗଞ୍ଜାମ ଜିଲା ଦିଗପହଣ୍ଡି ନିର୍ବାଚନମଣ୍ଡଳୀର କୁକୁଡ଼ାଖଣ୍ଡି ବ୍ଲକ ଅଧ୍ୟକ୍ଷ କାମାକ୍ଷା ପ୍ରସାଦ ପାତ୍ରଙ୍କ ୨୦୨୪ ଜୁନ ୬ରେ ମୃତ୍ୟୁ ହୋଇଥିଲା। ଏହାପରେ ବ୍ଲକ ଉପାଧ୍ୟକ୍ଷା ବିଷ୍ଣୁପ୍ରିୟା ପାତ୍ର ସରକାରୀ ନିୟମ ଅନୁଯାୟୀ ୧୮୦ ଦିନ ପର୍ଯ୍ୟନ୍ତ ଅଧ୍ୟକ୍ଷ ଦାୟିତ୍ୱ ତୁଲାଇଥିଲେ। ବର୍ତ୍ତମାନ ୯ ମାସ ବିତିଯାଇଥିବା ବେଳେ ଅଧ୍ୟକ୍ଷ ପଦ ଖାଲି ପଡ଼ିଛି। ଏହି ପଦବୀ ହାତେଇବା ଆଶାରେ ଗୋଟେ ପଟେ ଅଙ୍କୁଶପୁର ପଞ୍ଚାୟତ ସମିତି ସଭ୍ୟା ସୁନୀତା ସେଠୀ ନିଜ ସମର୍ଥକଙ୍କ ସହ ଦିଲ୍ଲୀ ଗସ୍ତ କରି କେନ୍ଦ୍ରୀୟ ନେତୃବୃନ୍ଦ ତଥା ଭାଜପାର ରାଷ୍ଟ୍ରୀୟ ସାଧାରଣ ସମ୍ପାଦକ ଦୁଷ୍ମନ୍ତ ଗୌତମ ଓ ବନ୍ଦର ଓ ଜାହାଜ ଚଳାଚଳ ରାଷ୍ଟ୍ରମନ୍ତ୍ରୀ ଶ୍ରୀପଦ ନାୟକଙ୍କ ଉପସ୍ଥିତିରେ ଭାଜପାରେ ସାମିଲ ହୋଇଛନ୍ତି। ଅନ୍ୟପଟେ ବ୍ଲକ ଉପାଧ୍ୟକ୍ଷା ବିଷ୍ଣୁପ୍ରିୟା ନିଜ ସମର୍ଥକଙ୍କୁ ସାଙ୍ଗରେ ନେଇ ଭୁବନେଶ୍ବରରେ ରାଜ୍ୟ ବାଣିଜ୍ୟ ଓ ପରିବହନ ମନ୍ତ୍ରୀ ତଥା ଗୋପାଳପୁର ବିଧାୟକ ବିଭୂତି ଭୂଷଣ ଜେନା ଏବଂ ଦିଗପହଣ୍ଡି ବିଧାୟକ ସିଦ୍ଧାନ୍ତ ମହାପାତ୍ରଙ୍କ ଉପସ୍ଥିତିରେ ଭାଜପାରେ ଯୋଗ ଦେଇଛନ୍ତି। କିନ୍ତୁ ଏଠାରେ ଆଲୋଚନାର ବିଷୟ ହେଉଛି, ପୂର୍ବତନ ବାଚସ୍ପତି ତଥା ଦିଗପହଣ୍ଡି ନିର୍ବାଚନ ମଣ୍ଡଳୀର ଟାଣୁଆ ବିଜେଡି ନେତା ସ୍ବର୍ଗତ ସୂର୍ଯ୍ୟ ପାତ୍ରଙ୍କ ନିକଟରେ ବିଷ୍ଣୁପ୍ରିୟା ଏବଂ ସୁନିତା ବ୍ଲକ ଅଧ୍ୟକ୍ଷ ପଦ ନିମନ୍ତେ ସେତେବେଳେ ଜୋରଦାର ପ୍ରୟାସ କରିଥିଲେ। ପର ମୁହୂର୍ତ୍ତରେ ଦ୍ୱିତୀୟ ଥର ପାଇଁ ଅଧ୍ୟକ୍ଷ ପଦ ହାତେଇବାରେ ସଫଳ ହୋଇଥିଲେ ସ୍ବର୍ଗତ କାମାକ୍ଷା ପ୍ରସାଦ ପାତ୍ର। ଅଧ୍ୟକ୍ଷ ହେବା ଆଶା ମଉଳିଯିବା ପରେ ବିଷ୍ଣୁପ୍ରିୟାଙ୍କୁ ଉପାଧ୍ୟକ୍ଷା ପଦରେ ସନ୍ତୁଷ୍ଟ ରହିବାକୁ ପଡ଼ିଥିଲା। ବର୍ତ୍ତମାନ ଭାଜପା ରାଜ୍ୟ ଏବଂ କେନ୍ଦ୍ରରେ କ୍ଷମତାରେ ରହିଛି। ତେଣୁ ବିଷ୍ଣୁପ୍ରିୟା ଓ ସୁନୀତା ଉଭୟ ବ୍ଲକ ଅଧ୍ୟକ୍ଷ ପଦ ହାତେଇବା ଲକ୍ଷ୍ୟରେ ନିଜ ସମର୍ଥକଙ୍କ ସହ ବିଜେଡି ଛାଡ଼ି ଭାଜପା ଶିବିରକୁ ଲମ୍ପ ଦେଇଥିବା ଆଲୋଚନା ହେଉଛି। ସୁନୀତା ପ୍ରଥମେ ଭାଜପାରେ ଯୋଗଦେବାର ଗୋଟିଏ ଦିନପରେ ବିଷ୍ଣୁପ୍ରିୟା ତରବରିଆ ଭାବରେ ଭାଜପାରେ ଯୋଗଦେବା ବ୍ଲକ ରାଜନୀତିକୁ ସରଗରମ କରିଛି। କ୍ଷମତା ଲୋଭରେ ଉଭୟଙ୍କ ମଧ୍ୟରେ ଜୋରଦାର ଲଢେଇ ଚାଲିବ ବୋଲି ଅଞ୍ଚଳବାସୀଙ୍କ ମଧ୍ୟରେ ଚର୍ଚ୍ଚା ହେଉଛି। ତେବେ ଅଧ୍ୟକ୍ଷ ପଦ ଦିଲ୍ଲୀ ଯାଇ ଭାଜପାରେ ଯୋଗ ଦେଇଥିବା ଗୋଷ୍ଠୀ ନା ଭୁବନେଶ୍ବର ଯାଇ ଭାଜପାରେ ସାମିଲ ହୋଇଥିବା ଗୋଷ୍ଠୀଙ୍କୁ ମିଳିବ ସେ ନେଇ ଚର୍ଚ୍ଚା ହେଉଛି।
